‫الرئيسية‬ آخر الأخبار الناس مشت وين ؟
آخر الأخبار - يناير 14, 2023

الناس مشت وين ؟

الهادي ود البورت :

أكتر حاجة محيرة في حكاية الركود العايشنو ، هي انخفاض أستهلاك العيش دي .. صحي ممكن يكون ركود في اي شيء بس حتى لدرجة الناس تقلل إستهلاك حاجة اساسية زي العيش ؟.. ياخي 90% مما يدخل في بطون السودانيين ياهو العيش ده ..بي موية أو بي شاي وللا سخينة أو ببوش وللا بي ملاح
..
الحاجة دي لي فترة بتابع فيها حتى في مناطق يفترض سكانها من ذو الدخل الأحسن نسبياً لأنو كل الناس بتعاني بس خلينا نقول ” الناس الأستهلاك العيش ما بشكل ليها مشكلة ”
مثلاً سألت صديق بتاع فرن في الحلفايا قال أنخفض عندي العجنة من 20 شوال إلي 6 شوالات .. واحد ف شرق النيل شارع العليفون أقسم أنو كان من بين 15-20شوال حالياً بينتج أقل من خمسة شوالات
في بورتسودان فرن كبير في شارع ولّع قال بنتج حالياً أقل من نص أنتاج بداية 2022 قلت ليهو يمكن أرتفاع سعر العيشة قال لي ابداً حتى بالسعر 40 جنيه دي كنا في الأول بننتج كويس بقى ينخفض لحدي ما وصلنا أقل من نص العجنة هسه وخفضنا عمالنا طبعاً
في فرضية زيادة عدد المخابز بس ما أظن تضاعف عددها بشكل كبير
..
الحاجة التانية الفيها ركود محيَر برضو أنخفاض الناس البتركب مواصلات .. صاحبنا في الكلاكلة القطعية عندو ” كريز ” قال بيقيف من الساعة تلات صباحاً صف عشان يشيل فردة واحدة الساعة 8 صباحاً .. ويمشي يقيف في بحري لحدي نهاية اليوم عشان يرجع بفردة العصر يمشي بيتو ينوم ويطلع تاني بالليل
في خط ولع عندنا الوضع اســوأ .. الشباب في الحلة الشغالين مولاصلات قالوا ببيتو في الصف من نهار اليوم عشان يشيلو فردة تاني يوم
..
الناس مشت وين ؟

‫شاهد أيضًا‬

الدعم السريع يفرج عن 28 من عناصر الجيش

كادقلي – الشاهد: أطلقت قوات الدعم السريع سراح 28 من الجيش تم أسرهم قبل نحو اسبوع في …