مشاهد انسانية ووطنية من موكب ام درمان اليوم

الخرطوم – الشاهد :

نشرت صفحة صوت الثورة صورا تعكس لمحات ولوحات سودانية وانسانية ووطنية نادرة في موكب امدرمان اليوم 9يناير 2020
#مناظر_حب في #موكب_9يناير_امدر

✵ موكب امدرمان كان فيهو كمية حب اظهرت المعدن الحقيقي للشعب السوداني رغم تلاتين سنة ظلم من حكومة الكيزان ……
✵ منظر الطفل وهو بوزع في سندوتشات للمتظاهرين في الشارع والله يشرح القلب ويزيدنا تصميم علي مواصلة الثورة حتي النصر رغم كل الصعوبات التي تواجهنا ……
✵ منظر المتظاهرين وهم يجمعون الشيرنق جمب المستشفي عشان يدوها للزول الاتكسر قزاز عربيتو بسبب البمبان الفكوهو ناس الامن كان حاجة فوق التصور ….
منظر الامهات والاخوات علي طول شارع الاربعين وفي احياء امدر وهن يوزعن في الموية والخل والخميرة للمتظاهرين كان حب م عندي. ….
✵ منظر صاحب الصيدلية الفي الشارع الجاء طالع وهو شايل كمية كبيرة جدا من الكمامات وجدعا للمتظارين كان حاجة مبالغة جدا …
✵ منظر الضيافة اللقوها الثوار داخل بيوت المواطنين في بانت والموردة والعباسية وغيرها من الاحياء حاجة م معقولة عديل …. اقسم بالله في سيد بيت وزع للمتظاهرين الاحتموا بي بيتو عصير…. وفي ناس بيت تاني ادو واحد من المتظاهرين فنيلة لانو قميصو اتشرط كلو …..
✵ منظر ذلك الكهل السبعيني وهو يتوكأ علي عصاته في سوق امدرمان وبيده قاروره فيها خميرة وموية وبكورك في المتظاهرين انو يرشو بيها الكمامات منظر يشرح القلب ياخ
✵ منظر العاملين في المستشفي وهم بوصلوا في البنات الحاصروهن كلاب الامن جوة واصر العاملين علي توصليهن لحدي المواصلات في الشهداء بوريك نحن الشعب السوداني فعلا في الشدة بأس يتجلي ……
✵ منظر الاولاد الاتلقوا كمية من الضرب جمب المستشفي دفاعا عن البنات بأكد ليك انو جيلا جاي حلو الشهد … فتية يمرحوا في براح الارض …..

✵ منظر ابواب البيوت الفاتحة في كل احياء امدر في شارع المظاهرة امام المتظاهرين لتقيهم بأس كلاب النظام بذكرك حميد لمن قال :
انا ماشي راجع لبيوت تفتح لي ادق او م ادق … طوالي ادفر الباب واخش … لابتسألني الجابك شنو ولا حتي عل الداعي خير. …..
✵ منظر نساء حي الضباط وهن يهتفن في وجه الامنجية مقابل الضو حجوج ليفكن الخناق عن المتظاهرين بوريك انو ايدين بنيات الفريق .. قادرات علي حمل السلاح ان داهم الحلال خطر ………
✵ منظر بنيات في عمر الصبا متلفحات بالطرح وبجرن في حجر كبير جر عشان يقفلن الشارع الجانبي في وجه الامنجية ومايهاجموا المتظاهرين من ورا
✵ منظر بنات بانت وهن يزغردن في وجوهنا من طرف ابواب البيوت
موكب_9يناير ادانا ذكري عظيمة حاتفضل جوانا مهما حصل وادانا دافع زيادة عشان نكمل ……..