المدخل للمستقبل ذهاب كل الرؤوس المجرمة ومحاسبتهم

راشد عبد القادر:

ومن حقك تقول لى النقطة دى غلط و ما حصلت لكن ما تجى تنطط لى ساكت..
١/ الجيش دا من الدفعه ٣٩ اتحول لجناح عسكرى للحركة الاسلامية وبقى الدخول ليه عبر بوابة الحركة الاسلامية وقطاع الطلاب والهيئة الخيرية لدعم القوات المسلحة و مكاتب التأمين وبكدا اتنزعت منه العقيدة الوطنية واتحول لعقيدة حزبية يأتمر بامر التنظيم.
٢/ قيادات الجيش تم تدجينم من خلال الدعومات والاموال والكراتين والظروف البتجى مباشرة من التنظيم واتعلموا المصلحة الخاصة و المكاسب المادية.
٣/ الجنجويد ديل جابوهم ناس الحركة الاسلامية من الخلا *خطابات البشير قاعدة فى اليوتيوب* ودربوهم وادوهم امكانات ورتب وحولوهم لقوة ضاربة
٤/ الجنجويد ديل وتحت اعين الاسلاميين وقيادتم تم تحويلم لعملاء ومرتزقة للسعودية والامارات مقابل اموال كاش
٥/ كتير من ضباط الجيش دفعوا رشاوى ووساطات عشان يتم اعارتم للجنجويد ويغتربوا لليمن مقابل الدم اليمنى يفتحوا بيوتم و يصلحوا اوضاعم وياكلوا عيالم.
٦/ فاغنر وتهريب الذهب بدأ تحت اعين وطلب الحركة الاسلامية وخطاب البشير مع بوتن وطلب الحماية برضو موجود فى النت.
٧/ الجيش والجنجويد الاتنين معا وبكامل التنسيق مع قيادات امنية اسلامية كتلوا الثوار ونفذوا مذبحة القيادة
٨/ القوات دى تم تصميما لمواجهة بعض فى حال فقدان السلطة وانحياز احد الطرفين و ما تم تاخير الانفجار دا الا لان قوى الثورة قبلت بيهم رغم وسخم بظن انها ممكن تعمل على اصلاحم واعادة الضبط
٩/ طوال ما بعد الثورة ظلت المنظومتين بالاتفاق مع كوادر الحركة الاسلامية تعمل على تأجيج الاوضاع وتأزيم الموقف وتعطيل القضاء والنيابات والزحف الاخضر والاسود وحتى قفل الطريق القومى والميناء وتهديد الامن القومى من جهات كان مفترض توعى انها كمؤسسات واجبا تحفظ الامن القومى لكن دا ما كان اهتماما اصلا لانها فقدت وجهتا منذ ١٩٨٩
١٠/ القول انه الجيش ما كله كعب ما بينفى انه الجنجويد برضو ما كلهم كعبين لكن الكويسين ديل ما بينفعوك ولا حموك ولا عندهم مانع انهم يقتلوك ويسحلوك لو القيادة ادتم امر بذلك لانهم بيعتبروا التعليمات واجبة التنفيذ بتاع الجيش بيقتلك عادى زى بتاع الجنجويد طالما ادوه تعليمات بذلك
١١/ الجنجويد عملاء للامارات والروس والجيش ما عنده مانع يكون عميل لاى جهة وتنسيقه مع مصر والامارات والخليج ضد الثورة كان واضح من اول يوم..
١١/ الاسلاميين صنعوا الوضع السيئ دا ودعموه وساقوا ليه سواقه وكانوا بيظنوا ان القصة يشيلوا الثوار وتعود ليهم السيطرة ما فرق معاهم كتل الثوار ولا قفل الطرق القومية ولا مذبحة القيادة وما كان فى اى كلام عن وطنية طالما الموت والخراب بعيد منهم هم لكن اولاد الناس الاخرين يموتوا وبناتم يغتصبوا ما عندهم اييي مشكلة وخطاب ابوبكر عبدالرازق بتاع والله ما ح نخليها تستقر برضو اظن موجود فى النت.
١٢/ الاطراف دى كلها اتأمرت لحدى ما وصلت لاعتصام الموز وقايلين كدا الامور بتستتب و ما فاهمين ان قوى الثورة كانت هى العازل بين بنزين الجيش ونيران الجنجويد لكنهم اصروا على الجمع بيناتم بدون حاجز فى النص.
اي اسلامى دعم الوضع القذر دا وساهم فى صناعته وعاوز ينكر الاسباب الاساسية وتاريخ الازمة والتأسيس ليها وعاوز يكلمك عن الوطن والوطنية ويتفلهم ليك مفترض تديه بالجزمه فى وشو
١٣/ البرهان والقيادات القاعدة دى طبلت للجنجويد وسلمتم معسكرات ومعدات و٣٠% من التصنيع الحربي مكافأة التآمر على الثورة السودانية وقت الشباب بيهتفوا العسكر للثكنات والجنجويد يتحل فى اكبر تهديد للامن القومى.
١٤/ ما عندك جيش عندك مليشيا الاخوان البرهان *كباشى ياسر العطا والاخرين* زى ما عندك مليشيا الاخوان دقلو والطرفين اوسخ واتفه من بعض وغرقانين فى العمالة والارتزاق والحرب اساسا لصالح الامارات روسيا مصر وغيرم..
انت ثوري تدعم الجيش ما ح اقول عليك خاين لكنك راجى حيطة مايلة وكلاب سعرانه ومجرمين
تدعم الجنجويد ما ح اقول عليك خاين لكنك راجى حيطة مايلة وكلاب سعرانة ومجرمين..
لو علي يتهزموا الاتنين و ما يفضل فيهم طفاى النيران..
العاوز يفكر فى المستقبل وتوقيف الصراع لازم يكون مدخله ذهاب كل الرؤوس المجرمه كلللهم برهان وكباشى وياسر العطا وحميدتى والبقية ومحاسبتم واعدامم واعادة *تأسيس* جيش لا دمج لا اعادة تسريح دى كيانات فاسدة و ما بتتصلح لازم تأسس من جديد.
طالت ولا قصرت الحرب ح تقيف لان الكيانين اتفه من بعض واضعف من بعض ولا قيمة لهم و ح يوصلوا لنقطة الانهاك الكامل قريب جدا..
وابدأ من الان اشتغل على خيارك الوطنى النابع منك من وطنك لا امارات بيفيدوك لا مصر بتفيدك لا اسرائيل لا اى كيان العالم كللله علاقتو بيك مصلحتو بس و ح يشيل منك شنو وفى اول شرارة بيجروا منك يسوقوا ناسم و يخلوك للحريق..