كان لا بد من زيادة العدد حتى تكفي الكيكة لكل الفاتحين خشومهم

علي الكوباني :

البغلة في الابريق

ـ رغم طمام البطن الحاصل لكن بنرجو من الله..انو تلحق الحكومة الجديدة في لملمة التدهور وتنجح في انتشال بلدنا من الهاوية..
ـ للاسف الشديد رهط من 25 استوزروا بالامس في السودان.. وواحد في الطريق..في بلد منكوبة واقتصادها منهار..لكن يبدو انه كان لا بد من زيادة العدد حتى تكفي الكيكة لكل الفاتحين خشومهم في وقت مطلوب فيهو تقشف حكومي شديد وتقليل المنصرفات وبالذات انو ميزانية البلد معتمدة على حلب المواطن المنكوب
ـ بالامس ما عارف لكن حسيت بأنو حمدوك زي (العريس المجبور يغطي قدحو..وما فضل ليهو الا يتلب من شباك الفندق زي العروس الكان غصبوها على العريس الشين شناة العدو وما بتقابل)..
غايتو بطريقة عدي من وشك خلص تقديم الحكومة المترهلة دي على أمل في انها تنضبط بتكوين المجلس التشريعي (وده الظاهر انو ما في زول دايرو الا حمدوك..لانو حيكون شوكة في حلق الكثيرين..عسكريين على مدنيين)
– يا اخوانا بلدنا حاليا زي المصاب في حادث كبير وجابوهو الطوارئ..ومن ابجديات الطب..انو اول شي تتأكد من ال(ABC).. وهي انك تأمن على أنو ممر الهواء سالك لحدي الرئتين..وثانيا تتأكد ان المصاب بتنفس مش (راقد حطبه)..وثالثا تأمن على استقرار الدورة الدموية..لو غير كده.. طوالي تقوم تركب ليهو انبوب لادخال الهواء..ولو ما بتنفس تعمل تنفس صناعي..ولو ضغطو نازل ونبضو ضعيف تركب ليهو دربات سوائل لحدي ما تلحقو بنقل دم..وبعد تستقر حالة المريض الحرجة..اعمل ليهو العمليات المستعجلة ومضايرة الاصابات الداخلية..وبعدها لمن يتعافى اكتر شوف العمليات البعدها ان شاء الله لو حتى جراحات تجميل وغيرو..
وهسه بالنسبة لحمدوك وحكومتو الجديدة…ومعاهم والبرهان وحميدتي ومجلسهم السيادي والشركائي.. لازم يعرفوا انو البلد محتاجة لاسعاف سريع جدا جدا..عشان كده (دقوا شير) بسرعة ولموا من اموال المنظومة الدفاعية وشركات الجيش والامن..واموال الدعم السريع والدهب وغيرو من المدكن..(وألحقوا البلد بدقيق مدعوووم…ووقود هبطرش مدعوووم..ودواء مدعوووم) عشان تسعفوا المصاب ده ما يموت وعشان بعدين(تلقوا بلد تحكموها من اساسو)… ايووا اعنيكم كلكم (مدنيين على عسكر) ..عشان ما في واحد من العسكر يفتكر انو حيمشي حمدوك وقوى الحرية لانهم فشلوا وهو ما فشل..وانو (ده التفويض الدايرنو ليك يا عسكور مبروك عليك)..ابدا كلكم شركاء في الفشل او في السلامة يااااا (مجلس الشركاء)..وما اظن عندكم وقت كتير للتنظير والمحركة والمجلسة.. لانو ثورات وانتفاضات الطلاب انطلقت شرارتها في الاقاليم بعد فاض بأهلهم ضيق وغلاء المعيشة..ونجح زحف دبايب الكيزان السامة في تحويل بعض مظاهرات الطلاب السلمية لتصبح عبارة سلب ونهب وحرق للاسواق وترويع للناس..لتعم الفوضى والخراب ويتهيأ الجو لعسكرهم لاعادة فلم الانقاذ
# ألحقوا المصاب ده قبل ما يتحول للمشرحة وبعدها نكير بسألكم انتوا ما هو
بِس