أيتها النيابة العامة.. لديك ما يكفي لاتخاذ إجراءات قانونية ضد هؤلاء

هشام علي ود قلبا

السادة / بنك السودان
أفتكر عندكم آلية لمتابعة ومراقبة حركة الحسابات ، ومؤخراً طالعنا أخبار متنوعة عن إجراءات أتخذت ضد حسابات حركتها مشبوهة خلال حرب سعر الصرف ..
طيب موظف الدولة المعلوم تفاصيل مخصصاته كمدير إدارة في شركة حكومية ، عشرات المليارات تدخل وتمرق من حسابه الشخصي بين ليلة وضحاها ، ومافي زول فيكم يقول “بغم” ؟؟!!

السيد / مناوي
أفتكر إنك ما بتملك حق (الأستغناء) عن أي حقوق للمجتمعات المحلية في أموال المسؤلية المجتمعية للشركات .. ياخ موش كفاية إنت ما عندك شيء تقدمه للمجتمعات المحلية ، كمان عاوز تحرد وتستغنى عن حقوقهم ؟؟!!
وما فهمنا شيء من كلامك ، هل القروش دي تبرعات شخصية لتنصيبك ؟؟ أم تبرعات لخدمة مجتمعات وأهل دارفور ؟؟ أم حقوق مسؤلية مجتمعية ؟؟ في السطر الأول من تغريدتك بتقول (تبرعات) وبعدها بسطر بتقول (مسؤلية مجتمعية) !!
ثم ثانياً .. إنت بعدما خططت ودبرت وشاورت وزير المعادن ومدير الشركة السودانية للموارد المعدنية ، وكنت قاب قوسين أو أدنى من إستلام “الكاش” لو ما النار ولعت .. داير تجي هسي تنط !!

السادة / النيابة العامة
أفتكر عندكم في القانون الجنائي ما يكفي من المواد لإتخاذ إجراءات قانونية في مواجهة كل من أشترك في مهزلة “أتاوات” الشركة السودانية للموارد المعدنية.

السادة / ديوان المراجع القومي
أفتكر إنه البلد دي لو فيها مراجع عام .. كان سمعنا صوته خلال السنتين الفاتو.

السيد / حمدوك
أفتكر إنه حسم الموضوع ما محتاج إستدعاءات وقومة نَفَس.

الأخ / أردول
أفتكر لحدي هنا وكفاية.