والد الشهيد أحمد كهربا يرفض دعوة للقاء الوسيط الإفريقي ويوجه رسالة لكل اسر الشهداء

الخرطوم – الشاهد:

كتب الكندري والد الشهيد احمد كهربا :
قبل ساعة من الان وانا في رحلة العودة من إفطار الشهيد بابكر بابي روف.
جاءني اتصال تلفوني وانا بالمواصلات. عرفني المتصل بشخصه وطلب مني الأذن في أن يعمل لنا لقاء مع الاتحاد الأفريقي (ابولباد)..
تركته يكمل حديثه وعندها نزلت من الموصلات وكدا خسرت 400 جنيه لكن ما في مشكلة خلينا نرد عليه..
قلت يا ابني منو الاتحاد الأفريقي هذا الذي اطلب منه قصاص ابني هل هو قضاء مستقل تم تعينه أيضا بتوجيهات القاتل الذي اطلب عنقه وباقي السجمانين من القتلة ام هو غير ذلك..
لا لا مادا الاتحاد الأفريقي والايقاد والوسيط ووووو
*مهلا يا ابني اهو ذات الاتحاد الكان ضامن وراعي الوثيقة ولا واحدا جديد…؟؟
لا ما هم اعترفوا ببعض القصور و دايرين يصلحوا غلطتهم…
طيب يا ولدي اولا انا ما 4000 أسرة شهيد ولا مفوض من قبلهم لخوض معترك من السفاهة معليش اعمل شنو لساني كدا..

وثانيا تصحيح غلطتهم دي علاجها حاجة واحدة يجيبوا لينا أولادنا حيين لأنهم هم من كانوا حاضرين ساعة المجزرة وبعد 27 يوم ذات الوسيط رجع لسواطته مع القاتل بصحبة شركائهم من بني جلدتنا المستعجلين على ارزاقهم وكراسيهم بدم أولادنا..

*يا ابوي ما نحنا انتو زاتكم عشان تجيبوا حق أولادكم اخواننا لازم نستعين بالجماعة ديل ونجلس معاهم..

*يا ابني يبدو أنك اما ما فاهم حقك بالضبط شنو ولا ما عندك فرق من قرعة ناصر والبقية الباقية من القرعات..

*يا ود انا اشوف في القاضي الثوري بتاعي قدامي وامشي لي اوكامبو الذي أوحى ما أوحى للمطلوب بتقديرك وابلباد أن يفك البشر وجماعتو النقصو بقدرة اوكامبو والإقليم من 51 مطلوب لي 5 واخيرا اكتفوا بي كوشيب وحايتم تعينوا بعد شوية عضو نيابي معاهم..

يآ ابني الشارع دا هو نيابتنا وقاضينا وبي الشرعية الثورية لقتلة أولادنا ومغتصبي عروضنا وسارقي مواردنا…

وابلباد بتاعك دا قول ليهو الكندري قال ليك انتا واحد سفيه واظنه يعلم يوما كان قد تصرف تصرفا فيه قلة أدب بحسب ما رصدت وشفت بي عيني والدنيا كلها لاحظت ذلك إلا من كانوا معه من الجنسين الساقطين مكون عسكري ومدني قحاطي..

علي كل حال هذا بلاغ هام لكل أسر الشهداء الناس ديل حكايتهم باظت وعايشين لحظات الغرغرة حايدوروا فيكم اتصالات فردا فردا يطلبوا منكم الجلوس مع الصعاليك دل ابلباد وفوكلر ما شابه ذلك..

ان لحق احد فيكم وقع في شباكهم يعرف نفسوا انتحر ثوريا والله البلد دي ماتقدر تعيش فيها تاني من كبر الفضيحة وكسر ضهرك القوى بي أولادك ديل..

كلهم قالوا لكم يا ابو فلان الشهيد كلنا فلان…
ماذا تنتظرون علو مقام ورفعة أكثر من ذلك…

احزروا الوسطاء وقووا أولادكم بحضوركم في وسطهم عند كل موكب وترس هم القاضي والنيابة التي ستشنق البرهان وزمرته من الجنجويدي والحركات وأحزاب الضياع جملة تربية الكيذان ومخرجاتهم…

اذا حصل معكم مثل هذا الموقف وحتما سيحصل ما عليكم الا تبليغ سلطة الثورة ببوست كهذا ولو كمان بقى بي لايف بكون أجمل واوفي ومولع نار…

#قصاصنا_وطن_كدا_واضح_؟؟

20 رمضان