‫الرئيسية‬ آخر الأخبار دايرين البلد تمشي لقدام مسكو لينا الشباب السلطة
آخر الأخبار - مايو 7, 2022

دايرين البلد تمشي لقدام مسكو لينا الشباب السلطة

د احمد طيب ابراهيم استشاري جراحة الكلي والمسالك البولية:

دايرين البلد تمشي لي قدااااام ؟
جيبوا لينا الشباب
دايرين الفساد يقل ؟
مسكوا لينا الشباب
دايرين البلد تتوحد ؟
مسكوا لينا الشباب
دايرين تقللوا من العنصرية ومن الأنانية و من السرقات ؟
ابعدوا لينا كبار السن….
الجماعة الكبارات ديل اعملوا ليهم مجلس كبير خلوهم يتفاكروا ويتزاكروا ويتشاكلوا ويتعاوروا فيهو .. وسموهوا ((مجلس الشيوخ ))… ذي امريكا…هو نحن بنعرف اكتر من امريكا وللا شيوخنا ديل بعرفوا اكتر من الشيوخ الامريكان….
الرسول زاتو ناصرهوا الشباب و حاربوهوا الشيوخ .الرسول زاتو قال (( يكبر ابن آدم وتكبر معه خصلتان.. حبه للمال وحبه للدنيا ))…عشان كده الزول لما يكبر ببقي خواااف و بخيل و اناني…..بخاف من الموت ومن الحكومة و من الفقر و من البهدلة و من ناس الامن ومن مرتو زاتها بيخاف…
يا جماعة الكبر ما عيب لكن عيب انك تاكل خريفك وخريف أربعة أجيال وراك…. عيب علينا لما يكون في بمبان و زخيرة حية ورصاص و موت نقدم الشباب ولما القنوات الفضائية تظهر و الكتائب تختفي نلبس شالاتنا وبدلاتنا و نقعد نصٌرح و ننظر و نتلاااااا……………يق ..
___ الشباب هو الابدااااع وهو الحياة وهو الامل وهو القادر علي التواصل مع بعضه ومع العالم ومع التنكنولوجيا ومع المستقبل…
شاب واحد ممكن يغير السودان ده …لو مبدع …
خلونا من الشهادات والمؤهلات الكرتونية وابحثوا عن البدعيين….
اوعي تجيبوا لينا ناس شهاداتهم كتيرة يقدونا بالتنظير والكلام الاكاديمي..يجيبوا مبدعين…
انا داير اكلمكم عن شاب واحد فقط و يهودي كمان:
اسمه ((( مارك زوكربيرغ )))) بتعرفوهو وللا ما بتعرفوا….
الزول ده هو صاحب الفيس بوك… وهو الاشتري الوتساب….
عارفين الشاب ده اتولد سنة كم …
يللا خمنوا واخجلوا وكبروا وهللوا …
الوليد ده اتولد في مايو عام 1984 …الوقت داك الصادق المهدي قد مضي علي اول تلقد له كرئيس وزراء السودان …تسعة عشر عام… يعني الزول ده احتمال كبير امه تكون ما اتولدت و الصادق رئيس وزراء ..و كان عمر البشير وقتها عميد في القوات المسلحة و شغال رقيص وكضب في جيهة الميسيرية في المجلد وبابنوسة….
///_///////
مارك ده يا اخوانا سنة 2004 و الكيزان بتحاوروا مع الحركة الشعبية في كيفية اقتسام الثروة والسلطة في السودان وكيف ستتأثر الحركة الاسلامية بالشمال و الحركة الشعبية بالجنوب كان هو طالب في كلية علم النفس في جامعة هاردفارد الامريكية وما عنده ولا شهادة بكالوريوس ولا كان عنده توصية من جورج بوش الاب… كان وليد ساي ذي اولادنا البنرسلون للاباريق و للمصلايات و كبابي الشاي…
اها الوليد ده عمل الفيس بوك عشان يتواصل مع اصحابه في الكلية وبعد شوية مع كل طلاب الكلية و شوية شوية مع كل الجامعات الأمريكية…
و الان مليار ونص في العالم يتواصلون بالفيس بوك…
///////
يا اخوانا ديون السودان كم … من الاستعمار لي حدي يوم حداشر ابريل السنة دي … خمسين مليار دولار …فقط
ايوة فقط خمسين مليار …لانو الفيس بوك بتاع مارك ده …الولد العفين ده قيمته حتي السنه الماضية ثلاثمائة مليار دولار…
معقولة ولد ذي ده عنده تلاتمائة مليار دولار و نحن فرحانين لانه ابو ظبي أودعت مبلغ ٢٥٠ مليون دولار أمانة كده في بنك السودان… والسعودية وعدتنا و قطر كرشتنا ومصر غازلتنا…
وكل من هب ودب بقي يفرض سياسته علينا و يدخل انفه في الشأن السوداني وعلي عينك يا طه (( الفريق طه ))…
__ عارفين الولد ده قروشه دي بتحل ديون عشرة دول إفريقية و من ضمنهم السودان و مصر والجزائر…
__ مارك ده يا شباب والرسالة موجهة ليكم وليس لغير الشباب الان من اغني عشرة رجال أعمال…طبعا بعد ناس المؤتمر الوطني بعد عوض الجاز لو كلام ويكيلكس صحيح ..
اتزوج مارك عام 2011 من صديقته وحبيبته الصينية (( بريسيلايا تيشان )) وهي زميلته في الجامعة و اختصاصية اطفال…
الزواج كان متواضع جدا في بيته وليس في صالة ملكية و العروس ما قالت ليهو (( يا مارومينا يا تخلينا ))…عدد المعاذيم لا يتجاوز المائة ضيف … و كانوا مدعويين لحضور تخريج بريسيلا تيشان و فاجاهم العريس والعروس بإكمال مراسم الزواج…..
__ والله الكفار ديل بخافوا الله اكتر من ناس كتار ..زول عنده تلاتمائة مليار دولار من حر ماله وليس من أموال الشعب الأمريكي يعرس عرسه مهببة ذي دي ….
يا اخي عبدالله البشير ده حفظه الله كل سنة كان بيعرس بي قروش الشعب السوداني و صالات ودهب و معاذيم لما عمر البشير زاتو خجل ….
لا في حاجة تانية داير اقولها ليكم عشان تعرفوا شنو شباب و شنو ابداع و شنو انسانية…
مارك زوكربيرغ و زوجته الصينية دي قرروا يتبرعوا بي 99% من رأس مالهم للأعمال الخيرية الانسانية…
عارفين ليه ؟
لأنهم عارفين ممكن يعملوا قدرها عشرين مرة….لانه الزول االبيصنع حاجة ممكن يعيد صناعتها مية مرة وبي سهولة…..
والزول البسرق حاجة كل مرة بيكون متوقع تكون آخر فرصة ليه عشان يسرق …لانو ممكن يقبضوهوا وممكن يلقاها حرسوها وممكن يلقاها كملت عشان كده الناس السرقونا رفضوا حتي يتبرعوا للفقراء والمعوذين منا….
__ الثورة دي انا برضو حاسس أنكم ما خايفين عليها وانا زاتي ما خايف عليها يا شباب لأنكم صنعتوها و صبيتوها وممكن تاني تعملوها….انا عارف كده وبرهان عارف كده و حميدتي زاتو عارف …
بس حرامية الثورات و الثروات هم ذي بعض …هم واحد عشان كده خايفين وبخوفوا فيكم…
(((( اركزوا زينب وراكم )))).
ي إخوانا نحن دايرين و زراء شباب مدراء عامين وكلاء وزارات شباب ..دايرين كنداكات شبااااب و كنداكات ذي الورد ما دايرين كومرات …ما دايرين زول مغير ركب تاني يحكم البلد دي …
اعملوا للناس الكبار ديل مجلس شيوخ خليهم يتونسوا فيهو ويكضبوا علي بعض ويحكوا بطولاتهم الزائفة دي…و اي كلام يقولوا ليكم غوغلوهو….ايوة شوفوهوا في غوغل وشوفوا تاريخهم في غوغل…التاريخو كويس احترموا والتاريخو وسخان ازنغوهو زنغة كلب في الطاحونة… وما في زول كبير علي الحق وما في كبير علي الوطن … (( الكبير الله بس ))..

ودمتم سالمين

‫شاهد أيضًا‬

الدعم السريع يفرج عن 28 من عناصر الجيش

كادقلي – الشاهد: أطلقت قوات الدعم السريع سراح 28 من الجيش تم أسرهم قبل نحو اسبوع في …