ياالله قدرة روح تعب الجسد هين

حسام الصياد:

الجسد دا إتعود خلاص علي الإصابات، يمكن هسي دي الإصابة العشرين، وبقوم عادي اواصل مشواري مع الرفاق، لكن حقيقي المرة دي تعبانة روحي زاتا، الروح التعبت من كلام الناس، من الهمس والغمز، وكأنو الإشتباك دا حلاوة مولد، او كأنو نزهة في حديقة، دا دم وموت وعرق ودموع، وكل إشتباك بكون شايل هم قبل مايحصل، يارب حتصاب كيف الليلة، طلقة في الرأس في القلب، خرطوش في الوش، حفقد عيني، قنبلة صوتية تقطع يدي، الحوار دا بكون في رأسي، وقلبي شايل هم الرفاق اخواني الحيموت منو، الحيتصاب منو، رغم دا كلو برضو بخش وبشتبك، وبشتبك مكره، لأنو فرض علينا فرض، ولقينا دور حماية المواكب ومقاومة العسكر واقع علينا، فرضينا بيهو، لكن اصلا ماعاجبني، بنخوضو ونحن مكرهين، بنخوضو وهو بالنسبة لينا ماغاية ولاهدف، بنتعامل معاهو كوسيلة فقط، وسيلة عشان ندافع بيهو عن المواكب، وعشان تستمر اكبر قدر من الزمن، وبمجرد مايقيف العنف نحن دورنا بنتهي، وحنمشي نهتف مع اخوانا.
فياشباب بالذوق بس ياخ، والله الفينا مكفينا وزيادة، لاهاوين إشتباك لاهاوين نقدد اجسادنا ودمنا يسيل، ولا بنتعامل معاهو كقشرة، وحتي لمن ننزل صورنا وفيديوهاتنا بكون القصد نرفع معنوياتنا، لأنو جوانا بقي دموم من فقد الرفاق، ومن مناظر القمع والدم والمعارك، فبذوق وابقو معانا ماتبقو علينا، ونحن قدامنا الصباح.
#روح_التمرد
#ضد_السلطه