العائلة السعيدة

الطيب عبد الماجد

يوميات علوب
( جعفر ) قال لي عملنا لينا قروب في (؟الواتس ) فيهو أهلنا القريبين كلهم سميناهو
( العائلة السعيدة )
قال لي تسمع السعيدة دي تقول العايلة المالكة …
سعادة واحدة مافي
نفس العايله دي ذاتا مضاربين قبل كم شهر في موضوع ورثه كدا وصلو المحكمة ..!!

المهم قال لي غايتو أهو زينا زي بقيت العوايل في السمح وفي الشين في ( الثقلا ) وفي الظراف ( ديل ما كتار ) وفينا اللطيفين وفي الغتيتين( كتار شديد )
المهم تشكيلة كدا

وعملنا القروب دا لرأب الصدع والحوار من الداخل وجمعنا فيهو كل أطراف الأزمة …!!
قلت ليهو ماشاءالله بقيت تتكلم زيهم …

قال لي الأمور مشت كويس والقروب مليان زهور وجمعة مباركة وصباح الخير ومساءالنور
و( ستنا ) رقدوها في ( الاطبا ) …..و( موسى ) جا من الدوحة ……والقصص دي …..!!

لحدي ما جا عمنا عاطل كدا إسمو( الفضل ) ماصدق لقى ليهو قروب …ونزل فينا ..
بنزل في اليوم ( طلطاشر ) موضوع وكل واحد أفرغ من التاني حتى ( الحكم والامثال ) ضاربة …
جزء كبير منها بايت وصلاحتو منتهية …!!

قال لي عادي يكتب ليك ( الصديق وقت الضيق )
معقولة لكن يا ( الفضل ) ياخ ….!!

أخجل

و ( النكت ) قال يا قديمة مشت في الواتس دا سبعمية مره
ولا النكت ( البطمم ) البطن ديك

يعني قبل يومين منزل النكته دي

( قال في واحد حلق …لبستو اختو )

بالله دا كلام دا يا أخوانا

( الزول دا صاحي)

لا …وميت من الضحك

النكتة البتمرض دي عرفناها
دا شنو يا الفضل

بقيت تضحك براك مش كدا
داير العلاج انت والله
طبعا ولا في زول بعلق ذاتو ….

الظاهر القصة دي حرقتو قال لي يوم صحينا من الصباح لقينا مولع القروب وخاتي حطبو

منزل موضوع عن ( الميراث والمواريث )
وكاتب تحتو
انو البغش في حق الناس مصيرو النار …!!

فنكأ جرحاً لم يندمل وأشعل فتيل فتنة نامت

وأصلا و قالو ( التوم ) خالنا دا حلف القسم بالكضب وكان داخل في موضوع الورثة دا ومتصدر مجموعة كدا …
ما اعطي انطباع إنو هو المقصود ….!!

المهم القروب اتجهجه

تسمع الورثه تقول مزرعتين في ( سوبا ) وبيتين في ( المعمورة ) …وشقة الرحاب ….!!

القصة دي كلها في بيت خارج الخطة الإسكانية
شالتو المطرة مرتين ….واقف فيه الباب بس
والباب ذاتو هسا قالو سرقو ….!!

( فعلا الغرقان بتمسك بي ( هبشة )

غايتو يا ( التوم ) بوظت علاقتك مع ربنا ساكت …!!

المشكله هسا ما ( التوم ) المشكله عمك الداير
يصحي الفتنه دا

وفي القروب برضو في قريبتنا ( سحر ) ….
( ما تسمع الإسم الرقيق دا ) …..
عباره عن ( ملتوف ) ….
( سحر ) دي بتستمتع بالفتن زي القصص
( هواية كدا ) عندها نقص في فايتمين الحنان ….
وتلعب معاي أنا ياحلو …..!!

( بتفرمط ) أي علاقة تلقاها قداما وما عندها كبير
كان دخلناها في القروب دا مشكله وكان جليناها
مصيبة بتشيل حالنا ….
في النهاية دخلناها
وقدر ما تكون عندها مشاركة …….القروب كلو بنطط عيونو ويحبس أنفاسو لحدي ما تمر العاصفة دي بسلام

أها قال لي يوم الجمعة الفاتت
والجو روحاني كدا والدعوات تتطاقش والحكم والسلام وجمعة مباركة بالألوان
وريحة البخور دي تقرب تشمها في التلفون …

( سحر ) الظاهر شياطينا كانو حاضرين …..!!

كتبت في ( القروب ) بدون مناسبة
عن واحد كدا خطب بت قريبتنا إسمها ( تغريد ) والود إسمو ( مصطفى )
…..
أها ( سحر ) دي قالت ( مصطفي ) دا وقت كان في ليبيا
قالت كان بزور الأختام وعندو قضيه
مرفوعة في ( مصراته ) ( تجارة بشر ) ( وهجرة غير شرعية ) بهربو الشباب سنبك وبياخدو فديةً

عليك الله شوف البت دي ….الأمم المتحدة ما بتوجه تهم زي دي
هسا عشان بس ننفي الخبر دا ونصل بلديه ( مصراته )
دي تكون القيامة قامت
( مصراتة ) دي الأمركان ما وصلو ليها…

ولكن قيامة القروب فعلا قامت ( مارك ) سيد الواتس ذاتو بكون شعر بالهزة
غايتو الزول دا لو عرف نوع ناس ( سحر ) ديل مشتركات في الواتس كان قفلو زماااان

أها أهل ( تغريد ) ما إتاخرو في الرد

دخلو ليك على الخط ونبذو ليك ( سحر ) دي شاتوها
علني وقالو ليها إنت غيرانه عشان ما جاك عريس …!!

و ( مصطفى ) اشرف منك ومن أخوك بتاع ( الخرشة ) ….!!

وللللللللع

يازووول القروب بقي ( أوكرانيا ) بس …..
وقف النبق

( إنها الحرب )

و ( سحر ) …من جانبها لم تتأخر
فتحت نار …وقالت معها مستندات وحتنزل صور

( كتمت )

( ليفل الوحش )

( جعفر ) قال لي طوالي أنا وبقية( الآدمن ) التأمنا في إجتماع أزمة طارئ وعاجل وعبرنا عن قلقنا لتدهور الاوضاع بحدة داخل القروب

المباحثات تركزت في إنو البت دي نحظرها ولا نرجى الصور ……
قلنا نصوت ..!!
قال لي أنا وود خالتي ( الباقر ) ( هو زيي كدا بحب الطعمية ) قلنا نرجي الصور
والآدمن التالت معانا ود عمنا امتنع عن التصويت

فقررنا نرجى الصور

( شوف الولاء دا كيف للعايلة )

وطبعا في كمية من العايله الكريمة أصلو ما بشاركو
(!بتاوقو ) بس ومكتفين بالعرض والمتابعة عن بعد

( راجين الصور برضو )
وظهرو الجماعة بتاعين ( باركوها ) ديل
زي قريبنا كدا في ( الجبيل ) إسمو ( عوض ) ….
مما بدا القروب دا هو بتفرج ماعارفين عنو أي حاجه
غير رقمو 0096650837 …..
جانا بي شخصية داعية
رسل ليهو خطبة طويلة عريضة عن المخاصمة في الإسلام حرمتها وتداعياتها والمآلات….مع الإشارة للمصادر

غايتو المعلقة الرسلها شكلو عاطل الزول دا

طوالي ( سحر ) نزلت ليهو ( سكرين شوت ) من صفحتو في الفيس كاتب فيهو

نادو لي حنان ..!!

بعد تلاته دقايق بالظبط

‎ عوض left

ود ام زقدة …..( تاني بتجي ) ….!!!!

وفي خالاتنا كدا بحبن ( الشمار ) زي عيونن……!!
محسوبات على جناح ( التوم ) دا ..
( زول الحليفة )
واحده اسمها ( أم سلمة ) كتبت قالت …
( يا اخوانا سحر معقوله تكون قالت كدا ساكت ….لو ماعندها حاجه ما بتقول كلام زي دا …..!!!
الناس حقو تكون واعية وفي النهايه الناس أهل

( إنتو خليتو فيها أهل)

( العلما ) في العايلة قالو دا ما كلام ( أم سلمة )
( أم سلمة ) دي طيرة ساكت ما بتقول كلام زي دا
دي ( إنصاف ) المجرمة

مش مراتٍ بحصل تفجير كدا بقول ليك مافي جهة تبنت
الحادثة لكن العمليه فيها بصمات ( القاعدة )

أها قالو ( الكومنت ) دا فيهو بصمات ( إنصاف ) ….!!

أول مره اعرف انا عايلتنا دي فرع من ( المافيا )

( أها ناس ( إنصاف ) برضو راجين الصور ) …..!!
وفي ناس في القروب دا محلقين في عالم تاني
زي قريبنا كدا إسمو ( كمال ) مستقر في اليونان من سنة ( دو ) ….
مرضنا مرض بي قصة هجرتو لليونان دي وتأثيرات الحضاره الاغريقية قال على سلوكو كلام جن كدا

( سلوكك انت ( سقراط )

( الباقر) قال لي هسا الزول دا بكون شغال شنو في اليونان دي ..!!؟
قلت ليهو بكون شغال ( تمثال ) ….!!
غايتو الحاجه الوحيده الاستفدناها منو عرفنا مفتاح اليونان دا للدنيا والزمان طلع 0030
في أخو صاحبنا كدا كان بسأل عن فرص دراسة
( الملاحة البحرية) في أثينا قلتا ليهو بس مافي غير ( كمال )
ضربنا ليهو من تلفون بكري لقينا مسجلو

( كمال المعاط ) )

برضو في ود خالتنا كدا اسمو ( أكرم) الظاهر بحب واحدة من بنات أهلنا ديل وهي ذاتا قاعدة في القروب اسمها ( مها )
المهم الاتنين ديل بفكو باصات لي بعض
( رومانسية طن )
قصص كدا ما عندها علاقة بالقروب وهموم العايلة
لاعبين في خط ستة

قال لي في عز الأزمة دي زولك دا كاتب
( لو أحبك أنا العمر كلو برضو شاعر ما كفاني …! )

وهي عامله رايحة كتبت بعد مساااافة كدا

( والوعدبيناتنا انك كل يوم تكتب اليا ….

لا ياخ ..!!

عليك الله شوف المسخره دي …

طيب ياخ أعملوا ليكم قروب مع بعض ….واحترمو
( الجلاكين ) القاعدين هنا ديل

عندنا عمنا كدا قاعد في القروب ( كنبة بس )
إسمو ( خدر ) لا بقرا لا بكتب خاتنو ساكت عضو فخري

أنا ماعارف الدخلو هنا منو أظنو ( تعويذة )
قالو دي بتو قالت دا كبير العيله وبركتها ….لازم يكون موجود ..نازل بي صورتو كمان …
هيييببع
(خدر للسيادي )

المهم ( الايموشنات ) بين أكرم ومهوية ما تديك الدرب سادا الطريق مجدعة في القروب زي الصبحية

لكن الأزمة كشفت بجلاء عن تصدع واضح وعميق في جدار العايله السعيده ..!!

( الحقيقة هي حيطة ..حيطة ما جدار وحيطة مايلة)

المشكله لقينا رقم كدا بتاع ود جيرانا ما عندو علاقة بالعايلة لقيناهو. قاعد في نص القروب
( ظهور اول حالة لجدري ( القروب )
اضافو ودعمنا ( الادمن ) المعانا دا هو ( أشتر ) كدا
( دا الامتنع عن التصويت ) اسمو بكري
والود المدخلنو إسمو ( حليم )
الحاجه الكويسه انو هو مسكين كدا في حالو حليم دا ما بكون انتبه
الكارثة لقينا ( حليم ) دا ذاتو عامل إضافة في القروب لي
تلاتة كدا
بكون قايل ( العايله السعيدة ) دي ( بقالة )

لأنو ( بكري ) الاطرش منحو ( الآدمنية ) برضو

أها التلاتة ديل جابن الدرب وحليم دا معناها كلهم قاعدين وحاضرين فيلم سحر دا كلو ….

( العايلة متلفزة للجمهور تبارك الله )

يازول بي سرعة عملنا ليهم حظر وإبعاد

( تسمع إبعاد تقول أبعدناهم من ( أبوظبي )

في واحد منهم الظاهر متابع بشغف ومتعلق بالقروب شدبد
طوالي ضرب تلفون محتج ليه شالو رغم إنو قال ماعمل حاجة قلنا ليهو معليش دا قروب عائلي وانت أصلًا دخلات بالغلط
المهم اتفهم الموقف واعتذر لينا وشكرنا …وشتت

( بكري ) قال لي ضرب لي بالليل
قال لي موضوع ( مصطفى ) حصل فيهو شنو …..؟؟؟
في جديد ..!؟؟؟
وحلفني بي الله لو سحر نزلت صور نكلمو ….!!

( واضح إنو ( الشمار ) دا في السودان خرج عن السيطرة ) …

التاني دا داك وقت أبعدنا الأول وعرف الدور جاي عليهو
كتب ( سحر لأي زول ..)
وغادر براهو

التالت دا شدة ما ماقدر يستحمل صدمة الخروج
جاب ليهو علاقة نسابة كدا معانا انو هو جزء من الأهل
نظرنا لقيناهو نسب بعيد شديد والبت ذاتا طلقوها
فجاء الطلب على الالتماس ..

( Removed )

أها دا كان بشارك كمان لقينا كاتب في اخر مشاركة

( يا اخوانا الناس تهدا وتحاول تتفاهم …)
( بلد فوضى)

ضربنا لي ( سحر ) قلنا نهدي الوضع ونهددا بالحظر من القروب …..!!
فهددت بنقل المعركة للفيس
…
يالطيف ….!!

أهل ( تغريد ) استبقو ( سحر ) ونزلو ليها هي ذاتا صورة
لما كانت صغيره الشعر منكوش وحفيانه وشايله ليها
فار ….( الفار الواحد دا )

( البت دي الظاهر موهوبه من صغيرة )
في طفل بشيل ليهو فار …..!!!
اها ياها دي شالتنا كلنا …

براحه طفينا النور وعلقنا العمل بالدستور
و جمدنا القروب …..!!
…..
الباقر رسل قال ليها الصور فيهم شنو ..!!؟

رسلت ليهو قالت ليهو الباقر احسن ليك ما تخليني اختك في راسي

رسل ليها دي (( 🙏 ))

جعفر قال لي هسا انت ياعلوب عائلتكم الكبيره فيها
زي ناسنا ديل ..!؟
قلت ليهو ( سحر ) حقتنا اسمها انتصار
اسم الشهرة ….انتصار سم الفار ….
بس الفرق حقتنا مفعله ( الصامت ) حقتكم ( هزاز )
ضحكنا ضحك ……!!

قلت لي جعفر عايلتكم دي ما دايره قروب
دايره ( حبوب ) …
يضحك اب قلبا ميت

قال لي ياعلوب القروب فضلنا فيهو أنا وبكري والباقر
سميناهو ( الانتقالية )
قلت ليهو والريد قسم ياعينيا

جمعتكم طيبة

…غايتو عوض تاني الا يكتب في جريدة ( عكاظ )