فخري حمد محمد:

قبل ما ابدا احكي عن الأسباب خلوني اسرد ليكم اربعه حكايات مشابهه عاصرتها في جامعه جوبا والاخيره أحداثها جاريه الان وبغض النظر عن الوصف العنصري الطلع ضد رنا

الحكايه الأولى

عن واحد اسمو وضاح قبل ما يحرق نفسو انو كادر مؤتمر وطني غواصه في الجبهه الديمقراطيه كنت مندهش انو زول كل إمكانياته انو عامل ليو محيط نسائي من الحسناوات في الجامعه ومع ذالك تقدم في التنظيم لدرجه كان اساسي في كل الاجتماعات السريه للتنظيمات المطالبه بالاتحاد في وقتها وطبعا المؤتمر الوطني كان حضور في شخصه (اكبر فضيحه للجبهه الديمقراطيه في جامعه جوبا) . زول زي دا كيف وصل للدرجه دي 🤔

الحكايه التانيه

عن كادربن هما شهاب ربنا يرحمه ومايكل كريستوفر ،برضو كانو من اقوى الكوادر في الجبهه الديمقراطيه مافي جامعه جوبا بس بل على مستوى تاريخ الحركه الطلابيه في السودان وليهم الفضل في انتزاع العديد من الاتحادات من الكيزان في اوج قوتهم برضو اندهشت لمن يوم تفاجئت بإعلان استقالتهم من تنظيم الجبهه الديمقراطيه وانضمامهم للحركه الشعبيه ونفس السؤال كيف يسمح تنظيم زي ج د لتسرب ناس زي ديل 🤔.

الحكايه التالته

لكادر الحركة الشعبيه ين ماثيو كان برضو من أفضل الكوادر لدرجه انو ركن النقاش في الشلتر الغربي يفيض وناس الركن بتكمل وهي في الشمس لمن يكون المتحدث ين ماثيو واي متتبع لنضالات الحركة الطلابيه جامعه جوبا لاسترداد الاتحاد حيلاحظ انو ين ماثيو حيكون ليهو شأن كبير في حكومه الحركة الشعبيه وبرضو نفس السؤال أين ين ماثيو الان لا وجود له🤔

الحكايه الرابعه

الصحفي بقال وما ادراك ما بقال وحكايتو جاريه الان🤔 وحكايتو مع المؤتمر الوطني ممكن ترجعو لصفحتو هو برضو يعتبر تسرب كادر

نرجع لقصتنا ونخش في موضوعنا وربطها بحكايه رنا

السؤال المفروض نسالو لماذا يتسرب الكادر عن تنظيمه اللي كان بدافع عنه بشراسه ؟؟؟؟؟؟؟؟

في رائي ممكن تتعدد الأسباب بس ما بتطلع من واحده من الأسباب الحاسردها :

1/ ضعف التنظيمات وعدم مواكبتها لمقابله التطورات ودا نتاج مرض السودان عموما (الانانيه)

2/ التجديد كل التنظيمات يساريه او يمينيه قيادتها عباره ديناصورات مكنكشين في مناصبهم وغير مبتكرين لاساليب جديده للقياده وما مستوعبين انهم عفا عليهم الزمن الواحد منهم ماقدر يساهر لحدي الساعه 9

3/ عدم اتاحه فرصه القياده للكوادر الجديده ودايما بتكون في معارضه لي اي رأى وكمان محاربه ويمكن فصله من تنظيمه

4/ مافي اي لوائح تنظيمه واشتراطات وخطط ممنهجه ومدرسه لاختيار الكادر وتطويره دايما بتلقى التطوير واتاحه الفرص بتم بي قريبي وقريبة وصحبي وصحبك يعني لو انتا مجتهد وبتمتلك كل اسباب التطوير والقياده وماعندك زول كبير في التنظيم غالبا ما بنتهي بيك المطاف انك تكون كادر مصادم وكادر مواجهه الخطر عشان كدا بتتفاجا بكادر برجف وبتتم لمن يجي يلقى خطاب ودي ابسط مقومات الكادر الخطابي كيف زول زي دا يدهو يلقى خطاب لحشود وناس منتظره نتاج ثورتهم (كانت فضيحه للتنظيم)

5/ عدم عداله توزيع الادوار والمنافع يعني في تنظيمك لو جات منحه فرصه تدريب بره حته فيها نثريات و تطوير شخصي دي برضو حتفضل تحلم بيها في تنظيمك لو ما عندك زول
عادي جدا ممكن تصاب في موكب وتخش طلقه في عمودك الفقري َتكون محتاج لعمليه مامتوفره في السودان ونفس تنظيمك يسفر واحد يتعالج بره عشان اتزلط في ركبتو

قبل ما تلومو رنا حقو تحققو وتشوفو الأسباب شنو الختلها تعمل كدا

واخيرا حميتي عندو قروش وبيبني في تنظيم سياسي وقانص لكوادركم وبالشايفو دا في وقت وجيز حينافسكم في الشارع ويمكن يحكم السودان ديمقراطيا

َاخيرا كيف لتنظيمات ماقادره تحافظ على كوادرها حتحكم السودان استحاله
حنكون في جوطه وورجغه كدا الي ان نتخلص من المرض الأساسي البيحكم السودان حاليا (الانانيه)