النقابات … ألمي حار ولا لعب قعوي

مسعود الحسن:

شغل النقابات ما بيتم بإصدار البيانات والدعوات لقيام الجمعيات العمومية فقط ولا الاضرابات والدعوة ليها بتنجح بالرغبات… شغل النقابات بيتم بالقعاد في الواطة مع العمال او اي فئات أخرى وجوهر العمل النقابي إيمانك بالقضية ا لبتدافع عنها وعندك الاستعداد انك تضحي في سبيلها… شغل النقابات انك تكون صادق ومخلص ومتجرد من اي غرض؛ الا من تحقيق مصلحة العمال او الفئة المنحاز او المنتمي ليها، فالاحساس بالانتماء للمجموعة وإيمانك بقضيتك هو المدخل السليم والصحيح لأي زول /ة نقابي/ة
** مافي شغل نقابي بيقوم ما لم يتوفر ليهو التزام صارم وانضابط ومعرفة كافية بمهمتك ودي ما بتحقق الا بالوجود اليومي والالمام الكامل بتفاصيل أوضاع العمال وبالدراية الكافية بالقوانين الحاكمة للعمل وكل.القرارات البتصدر من الادارات كان في القطاع العام أو الخاص ومدي ملائمتها او تعارضها مع مصلحة العمال او الفئة المنتمي ليها ودي ما بتحقق ليك الا بالقعاد وسط المستهدفين ومشاركتهم واشراكهم في كل تفصيلة والاستماع لارائهم وتعزيز دور القواعد بأكبر قدر واتخاذ القرارات بديمقراطية واستقلالية كاملة والديمقراطية والاستقلالية في العمل النقابي هما مفتاح النجاح لأي عمل في طور تنفيذه لان القرارات مهما كانت احتجاج / مذكرة/ موكب/ اضراب بتكون مبنية على قناعة والاقتناع مسألة مهمة لانو بدون اقتناع العمال او الفئة حيكون العمل فوقي ولا يمثل القواعد.
** الطريق لاستعادة العمل النقابي محتاج لمبادرات ومبادرين يقوموا بدور التوعية و التعبئة ويقدموا القدوة للاخرين وعشان تحقق اختراق مهم انك تكون متجرد وما عاوز تحقق مصلحة ذاتية… الغيرية مسألة في غاية الأهمية ومن السهل معرفة الانتهازيين وسط النقابات فالاساس في عمل النقابات التطوع والتضحية ونكران الذات من أجل تحسين أوضاع العمال او الفئة وتقديم خدمات اجتماعية تخلق واقع افضل لهم يشجعهم و يمكنهم من انتزاع المزيد الحقوق على مستوى تحسين شروط الخدمة وبيئة العمل والاجر والصحة المهنية والمشاركة في التخطيط والادارة التدريب والتأهيل.. الخ من المكتسبات.
.** على الرغم من اهمية المبادرة في شغل النقابات لكن العمل النقابي بطبيعته عمل جماعي ودا بيعني انو نوسع من المشاركة وشرح اي خطوة يتم اتخاذها وأهميتها للعمال او الفئة وماهي مصلحتهم فيها مهما كانت هذه الخطوة صغيرة ومن المهم الاستماع دون ملل اوضجر او ترفع لأي رأي او مقترح وان نبسط الكلام واستعمال المفردات والكلمات المباشرة المفهومة والقريبة للعمال او الفئة وان انبتعد عن الحذلقة واللف والدوران والتضخيم واوعاك من الكذب والاستهبال لانو العمال حا يكشفوك.
*** العمل النقابي ما أجسام معلقة فوق بتضم ليها عدد متجانس وبيتكلم بلغة واحدة العمل النقابي دا صراع يومي.. واصلا ما بينفع فيهو السرية والاجتماعات المغلقة جوة المكاتب او الدور او النزول بيهو لتحت! العمل النقابي دا شغل حار وعاوز جسارة وصبر وحوامة ومساسقة وسط الوزارات ومواقع العمل والمناقشة في الحوش وبالصوت العالي… ولا بنفع فيهو اصدار بيان وانت في الضل…. العاوز يشتغل نقابات يمش طوالي محل تجمعات العمال والفئات المختلفة ويدور مناقشة ويخاطب المستهدفين… العمل النقابي عمل جماهيري ميداني بامتياز ما هو ترف وتنظير .
..دا طريق النقابات للعاوز نقابات… والعاوز سياسة وطق حنك وحكي بلا ثمرة … ويتكتك ساكت…. يتحول لتجمع سياسي.