انا مالي ..ومالو

ناهد قرناص:

ارسلت لي قائلة ..يا دكتورة عايزين نأخد رايك في قصتنا ..نحن اربعة بنات واخونا واحد ..ما شاء الله عليه ما فيهو كلمة ..لما جاء يتزوج عرضنا عليهو كل بنات العائلة والجيران ..لكنو اصر يتزوج زميلته في الجامعة ..والحقيقة هي بنت جميلة ولطيفة ..وبتعرف الاصول وعمرنا ما سمعنا منها كلمة ..في البداية اخونا لما خطبها قال لينا الزولة دي نباتية ما بتاكل لحمة ..لكن بعد ما اتزوجت اكتشفنا انها ( vegan) عديل كدا ..يعني بترفض تاكل حتى المنتجات الحيوانية لا لبن ولا بيض ولاسمن ..والله يا دكتورة اخونا دا كان صحته سمحة ..لكن هسه بقى ضعيف شديد ..ونحن بقينا خايفين عليهو وامي طوالي بقت تقول ليهو الزولة دي بتقتلك بالجوع ..وهسه بقت تقول ليهو خلاص كان هي ما عايزة تعمل ليك الاكل حقك عرس واحدة تانية ..واخوي بقول انو مبسوط والاكل النباتي صحي ..اها نحن يا دكتورة عايزين تورينا نعمل شنو عشان نحافظ على اخونا وبيتو )

الله يجزيك الف خير يا بنتي على نيتك الطيبة ..لو عايزة نصيحتي .(.افضل حاجة تعملوها انتي واخواتك عشان تحافظوا على اخوك وبيتو ..انكم تخلوه في حالو ) ..الشئ الغريب ان الحياة برغم صعوبتها والساعات التي تنقضي سراعا قبل ان تكمل ما تريد فعله في اليوم ..رغم كل هذا ..ستجد ان الناس ينشغلون بمشاكل غيرهم الى درجة تنصيب انفسهم حكاما يحملون الصافرة ..ويرفعون الكرت الأصفر والاحمر ..ويحتسبون (البالنتي ) ..

اخوكم يا ابنتي ..رجل راشد عاقل تثبت بشهادته رؤية هلال رمضان ..اختار هذه ال(vegan ) بكامل قواه العقلية ..وهي بدورها لم تخذله واثبتت انها انسانة طيبة ولطيفة وتحترم اهله واخواته ..وبالمناسبة ..(الفيقان) هذه لا تخرج من الملة ولا تبطل الوضوء ..هي خيار غذائي عادي ..كأن تجد احدهم لا يحب اكل العصيدة او آخر لا يفضل اكل الباسطة (لا اعتقد انو في زول زي دا …ولو موجود المفروض يخضع لعلاج نفسي) ..وفي هذه الايام افضل شئ تجد انسان نباتي ..اللحمة بقت غالية جدا ..وعما قريب سنصير كلنا نباتيين ويمكن نلحق زوجة اخوك ونبقي (فيقانيين ) عديل كدا ..المهم في الامر ان اخاك لم يشتك بل انه سعيد واستفاد من هذه (الفيقنة) واستعاد رشاقته الغابرة ..وحياته عال العال .

مثل الرسالة اعلاه كثيرا ما ترد على بريدي الخاص ..وان اختلفت القصة ..لكن كلها تصب في مصب واحد ..احدى الاخوات لا يسرها ما يجري في بيت اخيها ..او احدى الامهات لا يعجبها ما تفعله زوجة ابنها او زوج ابنتها ..ولو سألت احداهن هل اشتكى هذا الشخص الذي تحكي عنه ؟ لقالت لك (لا ابدا ..بس انا عايزة مصلحته \مصلحتها ) ..والحقيقة ان المصلحة الفعلية تكمن في الابتعاد حبة عشان تزداد محبة .

اسوأ مكان في الجحيم محجوز لاولئك الذين يتدخلون في حياة الآخرين دون ان يطلب منهم ذلك ..بل يحرصون على اجراء التعديلات حسب رؤيتهم ..وكأن اصحاب الحق ..ليسوا براشدين او قادرين على اتخاذ الخيارات الصحيحة ..اتركوا الناس ليعيشوا حياتهم طالما هي لا تؤذيكم ولا تأتي بالقرب منكم ..واتركوا الناس ما تركوكم .

اجمل ما قرات في هذا الصدد ….قيل ان احدهم في القطار جلس بالقرب من طفل كان يأكل شوكولاتة ..قال الرجل للطفل (هل تعرف ان الشوكولاتة تسبب تسوس الأسنان؟ ) ..فقال الطفل (جدي عمر طويلا مات وعمره يناهز 110 عام) ..فقال له الرجل (هل كان يأكل شوكولاتة ؟) ..الطفل (لا ..ولكنه كان لا يتدخل في شؤون الآخرين )