أنا أدعم الدراما السودانية

الهادي بورتسودان :

أعتقد السنة دي رقم قياسي للأعمال الدرامية والمسلسلات في رمضان.. وده نتيجة للفضاء المفتوح بعد هيمنة جهاز الأمن لـ 30 على البلد
الأعمال المنتجة ممكن تعادل الأنتج طوال عهد الكيزان ، لأنو مؤكد مافي واحد من الشباب الأنتجو ديل خاتي في راسو بعبع اسمو السلطة وللا خايف من حاجة وللا ساقوه ناس جهاز الأمن وكفتوه .
في جدل كبير في التايم عليها لكن مهما كان موقفك الأعمال دي وللا رايك فيهم سلبي أو جلطوا في اساسيات دي بدايات مبشرة والفن ده مراية المجتمع وبعالج حاجات وظوهر كتيرة جداً ،
…
الناس ديل بكافة أصنافهم بيحتاجوا للدعم باي شكل :-
– ممكن عادي لو عند نت مفتوح في البيت أو المكتب تفتح الحلقات في اليوتيوب في تلفونك بالذات الناس البره السودان لأنو حساب المشاهدة أعلى – حتى لو ما بتشوفها خليك فاتحها في الموبايل مع السماعة أو خلفية جهازك وانت قاعد في المكتب بتديهم قروش
– ما تتخفف ياخي وتشيل الحلقات وتختها في صفحتك الناس ديل ما عندهم أي حماية فكرية وصفحاتهم ما موثقة .. ما تخرب عليهم – واي زول بنزل حلقات عمل درامي في الفيس مفروض الناس تقفل صفحتو عديل ما ممكن تكوس اللايكات والتفاعل بعرق الناس
– أقلاها لو ما عندك قضية بالمسلسلات أو ما عندك ليها وكت زينا كده أدعمهم في صفحاتهم بكلمة طيبة – وما تتنمر على أعمالهم وتبث طاقة سلبية أنت ما عارف الظروف الأشتغلوا فيها الشباب ديل عشان يبثوا أعمال دي
– وكمان لو فيهم زول ما لقى تلفزيون يعرض أنتاجو الناس تشوف أي طريقة تدعمه نجمات مشاهدات تدق شيرنغ بنكك أي حاجة تساعدو في ورطة الأنتاج
..
حسب متابعتنا لصفحاتهم السنة دي في شباب زي الورد باعوا أراضي وللا أتسلفو وللا شالو دهب حريمهم عشان ينتجوا أعمال .. فيهم ناس السنة الفاتت انتجوا أعمال مع القبضة البغيضة للأنقلاب مالقوا أي رعاية ولا تلفزيون يشيل منهم ،
ياخي السودان ده البلد الوحيد في الدنيا الممثل فيها ملفس وما لاقي حق الفطور.. في حين القونات أكتر ناس مربطين في البلد وسايقين جتكس وما عندهم أي إسهام غير بيسوقو للعسكر والشمولية وسط الناس البسيطين طالما نقاطتهم شغالة ”
..
نقابة الدراميين من أكتر النقابات الخطت خطوات كبيرة في التحول للمدنية .. عشان الناس ما تتحول لنقاد فنيين في الفيس .. النقابة دي هي مناط بيها تقييم الأعمال وحظر الزول البطلع عن ثوابت المجتمع و هي كمان البتقيف معاهم لما واحد فيهم يتعثر .. عشان كده تسجيل عضوية النقابة ضروري للشباب العايزة تشتغل في المجال بشكل أحترافي
..
معظم الدراميين ابعد ما يكون من الشمولية وأكتر حرص على الدولة المدنية إلا بعض الأرزقية المعروفين بالتطبيل للعسكر أو الكيزان ، لكن الدراميين عارفين الشمولية هي عدو الفن الأول لأنها ما بتديهو الحرية – وكان لهم دور كبير في حراك ديسمبر
….
جانب من المسلسات ورابط المشاهدة
محمد جلواك عندو عمل أسمو نادي باريس بيعرضو على قناتو
https://www.youtube.com/@jilwakbook

– فيصل أبوبكر ( جبريل ) عندو مسلسل قشر موز على قناتو
https://www.youtube.com/@AbobakrFaisal

هاني عوض الله (أبو الدبش ) عندو مسلسل أسمو يوميات أبو الدبش على قناتو
https://www.youtube.com/@KABOOSwaKHATAAF

– مسلسل تاشيرة خروج لمجموعة من الشباب على القناة
https://www.youtube.com/@magicshot8780

أحمد الجقر مسلسل زاندا على قناتو في اليوتيوب
https://www.youtube.com/channel/UCDifX0oPeoCbLk5tXAgP4RA

-على ورطة مسسلسل أولاد إبراهيم – على قناة الشركة في اليوتويب
https://www.youtube.com/@TaHaBeesh

-جلال حامد – مسلسل دروب العودة
https://www.youtube.com/@GalalHam

– مصعب عمر – زول سغيل في مسمسل ود المك على قناتو
https://www.youtube.com/@zoolsagel-2310
–

https://www.facebook.com/100044438324074/posts/pfbid0WnHKMfsL1UZz3pnUtYBN5VDWsc7o3RUnBWbFB5Q4gvMrZCryXVnh8SmhR9DpswiRl/?mibextid=Nif5oz