كيس المعلومات

عمر عشاري :

في مشكلة معلومات حقيقية ياجماعة في البلد دي

عشان كدا اغلب التحليلات السياسية مابتكون عميقة او مبنية على اسس صحيحة

يعني الزول كان قائل في عهد منفتح قليلا بعد قبضة طويلة يكون في اتاحة للمعلومات وللصحافة

الصحافة بالمناسبة ما الا تقمعها وتعتقل الصحفيين مجرد حجب المعلومات عنها دا برضو سلوك متسلط وغير ديمقراطي

بعدين حاليا في حاجة جديدة ممكن تسميها ” الطبقية المعلوماتية ”

يعني في طبقة ماعارفة اي حاجة
وفي طبقة عارفة اي حاجة
وفي طبقة وسطى عليا عارفة اغلب الحاجات

وفي نحن ناس الطبقة الوسطى الدنيا عارفين حاجات وحاجات ماعارفنها

متمرجحين كدا

لازم يكون في نفير ، انو الفقر المعلوماتي دا عند الطبقات المعدمة اعلاميا يقل

ويكون في حاجة كدا زي كيس المعلومات ، على وزن كيس الصايم

كيس مليان يتم تداولو يشبع فعليا الفضول الاعلامي دا ويخلق طبقة في صحة معلوماتية جيدة تسهم في البناء

دا في حال كان في صدق معلوماتي وكان الكيس دا لوجه الوطن وليس للرياء المعلوماتي

لانو لو ظلت الطبقة العليا براها بتحتكر المعلومات ، التمايز المعلوماتي الكبير دا حيخلق ازمات عظيمة وعدم ثقة

وحيكون في ترميز تضليلي لانو الطبقة العارفة كل حاجة دي بتمتلك اضافة للمعلومات بتمتلك منصات كمان وخشمها كبير جدا

والحاجة دي مرات بتنزلها للطبقة المعدمة اعلاميا لانها ماعندها حاجات تقارن بيها فبتاكل المعلومات في ثانية وبتتبني مواقف ماحقتها لكن حقت ممتلك المعلومة وبتمثل مجرد انعكاس، وعموما بتكون اكلت معلومات ما ماشة لعقلها انما لعقل محرك الاحداث

المهم لازم يكون في نظام تكافلي معلوماتي

لانو بغير كدا حيموتو الفوق بالتخمة الاعلامية
والتحت بالانيمياء الاعلامية

والناس الفي النص ديل حيقعدو ياكلو في حاجات ماجاية مع بعض ، سمك ، لبن ، تمر هندي وحيجيها تسمم وتموت برضو

وبكدا نموت كلنا موت اعلامي عظيم