يا معتصم انت وين ؟

قمرية عمر :

ايام اعتصام القيادة
يا معتصم خلاص بعد عدت الايام الأولى تاني ما تبيت في الاعتصام السهر يومي حار اتبادل مع الاخرين
بي ضحكة كدا تشبهك
يا خالتو نحن ثوار الليل
يا خالتو في ناس ظروفها ما بتسمح تبيت في القيادة انا ماعندي حاجة ببيت يومي…..
اجتماعات التنسيقية دائما مساء ايام الاعتصام
وتنتهي متأخر خالص واحدة ومرات اثنين او ثلاثة صباحا
يا معتصم انت وين
اهلا يا خالتو قاعد جنبك هسي بجيك
اوصلنا انا وخاله حذيفة الحاج يوسف وتاني ارجع الاعتصام برفقة اخوانه
محمد الجلاد ويحيى الجلاد كما يحلو لنا أن نناديه
وتاخدنا الونسة في الطريق وكل يدلو بدله حول الاعتصام والتفاوض وحال البلد
معتصم
يا خالتو انا ما عندي علاقة بالسياسة ولا بهمني يحكم منو
بس عاوز حاكم عادل والناس تتعلم وتعالج والحياة تتيسر والحاجات تبقى متوفرة ورخيصة كل زول يقدر اشتريها
وانا اضحك واقول لي يا معتصم ياها دي السياسة ذاتها
وتضحك الضحكة البتشبك
يا معتصم
اهلا يا خالتو
تعالي لينا
حاضر يا خالتو
ما بسألني عاوزاني في شنو
طبع الشباب البكون عاوز ازوغ
وجعي عليك يا معتصم
واااحسرتي على شبابك
ما كلمتنا ولا ودعتنا
انا لله و انا اليه راجعون
لا حولة ولا قوة الا بالله
يا الله قوة وصبر من عندك
ربنا يرحمك يا ولدي واغفر لك واسكنك فسيح جناته
لا الله الا الله محمد رسول الله