الموضوع ما سماح بس

هاجر سيد احمد الشيخ :

**للناس البتقول ماوقتو-التوعية ماعندها وقت وكل المواضيع تتناقش في كل لحظ يعني ماعندكم حد

*موضوعنا عدم امان وجنجويد وقتل للثوار واعتداء علي الناشطين وعدم التزام بالقانون وعدم وجود قوانين مناسبة وعدم وجود حماية للضعيف والمحتاج وموضوعنا اطفال مشردين واسر ماقادرة تعيش وموضوعنا مستشفيات مافيها خدمات وناس ماعندهم زمم وموضوعنا تجارة بارواح الناس في المستشفيات الخاصة وموضوعنا عنصرية وموضوعنا تحرش وموضوعنا كهرباء مافي وكلو مافي وعدم اكل وشراب ووظائف واللستة طوووويلة ديل جزء من مشاكلنا الكتيرة وتركيزنا علي موضوع مابعني انو الباقين مامهمين ومابعني انو مفروض موضوع يتخت في الرف لحدى مانصلح الباقين كلو يمشي مع بعض

*للناس البتقول عندنا قضايا اكبر من قضيتك البتناقشها دى-وطيب مالو امشي ناقش القضية الانت شايفه مهمة واعمل دورك ماتحدد للأخرين اولوياتهم شنو
*للناس البتقول بتنادو بتحلل المجتمع-اذا شايفين حقوق البشر وحت حقهم في الحياة مامهم راجعو انسانيتكم
*للناس البتقول ابوها ولا اخوها ولا عمها وغيرو من العلاقات ما… وتمو عليها اي فعل بشع كلامكم ده تحريض علي الجريمة المحددة ويتبلغ عنكم للمعلوماتية
*للناس البقولو ليك دايرين تبقوها قضية جندر ونحن شنو؟ اصلا نحن طالعين للتغيير وعشان نناقش العولاق العشناه نحن ومايحصل لغيرنا

*للناس البتقول ماعندكم موضوع هل تصدق انو معظم الواقفين في التوعية دى ناس ناجحين في حياتهم وعندهم مليون موضوع يعملوه اهم من تضييع زمن يردو ليك لكن اختارو انو حياتهم ماتضيع ساي بدون تغيير واختارو انهم مايشوفو الغلط ويعاينو ليه واختارو انو زي ماهم لقو فرص في الحياة والنجاح غيرهم مستحق ليها وحيساعدو؟
*للناس البتقول البعملو الجرائم دي عندهم اسبابهم طيب لو مريض عالجوه ولو مجنون عالجوه ولو زول عندو مشاكل تانية عالجوه ماتتفرجو وتنتظرو لما يضر زول وتجو تلقو ليه المبررات
*للناس البتجرم الضحية في كل القضايا وتلقي مبرر للمجرم ياخ اتحسسو انساتيتكم
*للناس البتشوف العنف عادى اتحسسو انسانيتكم
*للناس الشايفة دى عادات وتقاليد- لو عادات وتقاليد مضرة وكعبة نواصل فيها ليه
*للناس البحاولو يوقفو اي زولة او زول بحاول يوعي-اطمنطك ماتتعبو روحكم نحن قاعدين وماحنقيف لحدي مايحصل تغيير
*للناس البتهدد في النت وبتحرض للقتل-لازم يتفتح فيكم بلاغات ولانو اذا شايفين القتل والعنف ده عادى معناها بتعملوه في بيوتكم
*للناس البتقول قضية فردية ولا دى مشاكل عائلية خاصة-لما تتعدى علي زول هنا مابقي خاص بقي جريمة وكلام قصص عائلية وتنشرو غسيلكم والاسطوانات المشروخة دى احسن نبطلها ونبطل نتستر عل الجرائم
*للناس البتشوف الجرائم وتسكت انتو كده مشاركين في الجريمة
*البحصل ده كلو تحت سمع وشوف مجتمع يجرم الضحية ويستر القاتل ويغمض عينو ولسة قدامنا كتير

*الموضوع ماسماح فقط سماح اسم بس وغيرها كتاااار سمعنا بيهم وجزء كبير ماسمعنا بيه.
*القضية ما واحدة القضية اكبر والاكبر منها رأي المجتمع وردودو وتحريضهم للقتل وتشجيعهم للاب وانو مفروض يقتلها وانو ماابوها يقتلها وكل التعليقات البتوريك انو قدامنا كتير توعية للمجتمع اولا
*مشكلتنا اكبر اذا كتيرين شايفين اعتراضنا وتوعيتنا هي زي فكرة المرأة السوداء الغاضبة هنا في امريكا وانو بدل مانوعي كلنا ونصلح المجتمع مفروض نعاين لي انو المجتمع ده لسة بعاين لينا انو حقوقنا بتتجزء وانو نحن جايطين ومتلقين حجج.
*موضوعنا مااسباب القتل ولا القصة لكن موضوعنا القتل في حد زاتو
*موضوعناانو في طفلة ماتت واطفال بيتضربو ويغتصبوهم ويقتلوهم ومافي مبرر للبحصل ده ومافي عذر لتقبل المجتمع وسكاتو علي الحصل زمان والبحصل لحدي الليلة.