‫الرئيسية‬ آخر الأخبار ولسه الوجع مكبوت ولسه الوطن مسروق!
آخر الأخبار - رأي - أبريل 7, 2021

ولسه الوجع مكبوت ولسه الوطن مسروق!

ميسرة عبد الرحمن :

الوجع الحقيقي لمن تشوف ڤيديو الشهيد عباس في الترس ، بوستات حنفي قبل يومين من موتو وهو بتمنى الجنة ، لمن نشوف ڤيديو محمد عادل في الجامعه وهو بدي صحبتو الورده!!
وجع كبير لمن نشوف ڤيديو محجوب وهو بغسل العده!
الشهيد عباس الصفحتو كلها عن الثوره وحبه لوطنو!
عبدالعظيم التعب لكن ما استلقى عشان ما بقدر!
لمن نشوف يا جماعه مطر وصورو مع اصحابو في لندن وهو عارف انو لو جا الثوره حيموت وفعلا حصل!
صورو في الشغل وهو رافع بوسترات الاضراب..
كلام اخت الشهيد نمير عنو..
حنفي الادا ضهرو للتاتشر ومشى فيهو!
مجتبى الجاتو منحه لليابان ورفضها عشان وطنو ومات عشانو برضو!!
وليد المرتو اتوفت وما لقى وقت يمشي ليها من الزحمه كان بحاول يحمي الثوار ويقول ليهم حياتكم اهم من الترس ابعدو!!
رزقا الامو بتفتش في صور ليهو ولقتها عند صحبتو!!
عن وجعها لمن شافت نتيجتو ولقتو جايب +A
وجع ام عباس وهو طالع الصباح لمن سمع انو في محاوله لفض الاعتصام والناس تكون كتار!!
وجملتها البتتردد في اضاني وهي بتقول ليهو
(عباس انا عارفه شفقتك دي ما لخير)!!
الوجع الحقيقي لمن نشوف ولد عمرو ١٣ سنه ضربو رصاصه ومات!!وتاني يوم امه تشوف نتيجتو بتاعت الاساس وتلقاو ناجح عن الوجع لمن نلقى طفل صغير جسمو كلو محروق و وشو مشوه
ولسه الوجع مكبوت ولسه الوطن مسروق!
دم الشهيد غالي و الانكسر في الروح ما بيجبرو الوالي..

‫شاهد أيضًا‬

واخشي ان يكون لابس سفنجة!

د. محمد صديق العربي : في تسعينيات القرن الماضي عندما التحقنا بجامعة الخرطوم مجمع شمبات وعل…