تجربتي مع السرطان

هيفاء حمد :

الفترة الفاتت دي كانت أصعب فترة في حياتي مرضت فيها شديد و ما عرفت انا عندي شنو و الدكاترة ما قادرين يقررو انا مالي من دكتور لي دكتور و من معمل لي معمل الفحوصات و ريحة المستشفيات جاتني منها صدمة و بعد ده كلو من غير فايده الدكاترة شاكين انو عندي سرطان بس الفحوصات كانت بتطلع نضيفة.
وزني بقى ٤٧ كيلو من ٦٢ و دمي بقى٤٦ و الدكاتره برضو ما عارفين يدوني اي حاجه الحمى والصداع كانو معاي شهرين قادرين تتخيلو حمى شهرين تهرس فيك من غير رحمة و الدكتور يقول بندول بس في النهاية مشيت لي اخصائي أمراض دم وقرر بعد الفحص السريري انو يعمل يشيل عينة من النخاع و قال لي احتمال ٥٠ في ١٠٠ يكون عندك سرطان عشان كده لازم ناخد العينة لمن قال لي العينة خفت شديد عشان انا عارفه انو التجربة دي حارة قعدتا ابكي وقلت ليهو انا مستعدة ابدأ الجرع طوالي بس ما تعمل لي العينة دي 😭😭😭 قعد يضحك وقال لي شوفي انتي صغيرة قدر شنو العينة ما بتاخد مننا زمن كتير كانت بتكون في مشكلة لو كنتي سمينة وقد كان مشيت واخدت العينة و كانت تجربة قاسية علي جدا لي هسي ما قادرة انسى وجع الحاجة دي لي هسي منظر الحديدة الدخلت في ظهري و خشت جوه العضم عشان تشيل عينة حاجة كانت فظيعة ما قادرة اسامح التجربة دي واعتبرتها حاجة ما إنسانية ليه ما يكون في تخدير كامل.
المهم العينة برضو ما قدرت تثبت وجود السرطان من عدمو و هنا انا صحتي ادهورت شديد و الدكتور قال لازم تاخد دم عشان ما نخش في مضاعفات تانية و بعداك قررنا نسافر مصر و قد كان سافرنا مصر و عملت مسح الذري قال لازم ناخد عينة تاني 😔😔 هنا انا انهرتا تماما عشان جسمي ما كان استحمل اي حاجة وصلت لي مرحلة ما كنت بقدر امشي
دكتور الأورام قال لي العينة ضرورية و كان الجدال تخدير كامل ولا لا قال لي دمك ضعيف ما بقدر اعمل تخدير كامل نشوف رأي اخصائي التخدير بعداك جاء يوم العملية الأخصائي قال تخش عملية كنت فرحانه
و طلعت نتيجة العينة و كانت النتيجة انو جسمي مليان أورام يعني السرطان وصل المرحلة الرابعة وطبعا دي اخر مرحلة و انتشر في كل جسمي بس الدكتور حقي كان إيجابي شديد قال لي من مكانك ده و تمشي على المستشفى تاخدي دم و تبدي الجرع طوالي ما عارفه اوصف احساسي شنو في وقتها احساس غريب بس انا كنت متوقعه النتيجة دي و فعلا من اول جلسة بتاعت كيماوي انت اتحسنت جدا وواصلت الجرع لي ما كملت ٨ جرعات و عملت الفحص او المسح الذري تاني عشان يكشف لينا لو في اي خلية سرطانية في جسمي و الحمد لله طلعت النتيجة نضيفة بس في ٤ شهور و شوية ديل انا عانيت جدا مع الجرع و كنت تعبانه بس كان سند الاصدقاء لي و دعواتن لي كانت بارياني شكرا نبيلا على الدعم الجميل ده
اخيرا : اتمنى في سودانا الجديد تبقى الأولوية للصحة عشان الدكاترة ما كان قادرين يحددو مرضي بسبب المعامل ما عندنا معامل مؤهلة و لا كادر مؤهل و انا وصلت المرحلة الرابعة من المرض بسبب الجرجره و انهم ما عارفين انا زي كتاااار و كمان يمكن ما عندهم إمكانية يسافرو و يموتو من غير علاج حتى الجرعة حقت الكيماوي او البرتوكول العلاجي الأنا اخدتو في السودان مافي شفتو المصيبة دي
الحمد لله و الشكر لله عشان انا اتكتب لي عمر جديد

اخيرا خالية من السرطان