‫الرئيسية‬ آخر الأخبار النخب لازال عطاؤهم متعثرا لا ينسجم مع هذا التغيير
آخر الأخبار - رأي - مايو 31, 2021

النخب لازال عطاؤهم متعثرا لا ينسجم مع هذا التغيير

الطيب عبد الماجد :

نعيش وننتصر …

( النخب ) لازال عطاؤهم متعثر لا ينسجم مع هذا التغيير …
ويريدون فقط ان يشربوا ( نخب ) الثورات ولا حتى دافعين ( شيرنق )
دوماً هم في حالة انتظار الي أين ذاهبة فيذهبون

وهولاء جزء اصيل من أزمتنا العاصفة ولا أعمم ….

الشعب السوداني شعب عظيم وكبير ومحترم
يكفي أنه أنجب هؤلاء الشباب الذين هزوا عرش ( البشير )وأسقطوه ….
وخرج قبلها مرتين و انقلب اليه البصر خاسئاً وهو حسير ….!!
( والتالته ثابته )

شعب لم يجد تحفيز لذلك يتهم بالعطالة والكسل
ودونكم السودانيين في كل أصقاع الدنيا
ما ياهم ديل شغالين وداعكين ومحل تقدير
وفي كل الوظائف الوسيطة والعليا ليس لسبب
بل لانهم وجدوا دول عندها نظام وحافز ….!!

لو كنت محل والي الخرطوم لجعلت راتب عامل النظافة
مجزياً ومغرياً واسألني عن الخرطوم بعد شهر

( تديني خمستاشر جنيه مسطبة ما بنضفا ليك )

عاصمة نضيفة يعني بيئة نضيفة يعني أمراض أقل يعني ضغط مستشفيات أقل يعني ميزانيه صرف صحي أقل يعني إنتاج أكتر ….!!
( نص الأمراض في السودان بسبب تدهور البيئة )

يعني مرتب عامل النضافة الزدتو
زاد في الميزانيه ما نقص منها …!!

هذا أبسط نموذح لعملية التحفيز ومردوداته

وبعد ذلك يحق لك وبعين قوية ان يكون الجزاء من جنس العمل …..وفرض غرامات لمن يخالف
ذلك ….!!

( لكن الخور مليان وشوارع الزلط تزينها القمامة وداير تغرمني عشان رميت لي كيس في الشارع ….!!
ما عندي ليك بلحة ) …!!

ادعمو المشاريع الصغيرة ومتناهية الصغر والأسر المنتجة عشان الإقتصاد دا يتحرك ….
دي ياها عصب الاقتصاد من ( الكونغو ) حتى أمريكا

بتسوانا استقلت بعدنا بي عشرة سنين وصنفت وقتها افقر دولة في أفريقيا …..
مقفولين ( ميناء ) ما عندهم …وموارد مافي برضو ….الله أداهم شوية ( ماس ) جابو شركات تستثمر فيهو قدر النصيب ألجاهم كبوهو كلو في البنية التحتيه والطرق والجسور ….الان بتسوانا صف اول
تضاهي الدول المتقدمة ونحن يا حليلنا متابعين الدولار
وقفة الملاح المتعثرة ….

أدونا خطة واضحة كدا فيها الخطوط العريضة
نحن ماشين على وين ….!!
أي قروش تدخل ( كبوها ) بنيه تحتيه الشعب لما يشوف الكلام دا بترفعوا روحو المعنوية
( ما تبقي عليهو العيشة الغلط ومافي شارع زلط ) ….!!
على الأقل يشوف ليهو حاجه تصبرو

ورونا الترتيبات الأمنية حسب سلام جوبا وصلت وين ..!!؟
ملفات العدالة وتقصي الحقائق في ياتو حتة …!!؟
والسودان دا حيكون عندو دستور دايم ولا لا …؟؟ ومتين ..؟؟
ماشين ساااكت كدا نحن لا إحم ولا دستور …
( !!
( البيضة أولًا أم الدجاجه ) دي شكلها نظرية الدستور وكدا حننتظر كثير ….!!

وبي دستوركم ) …

بس كلموا الناس بالقصص دي عشان الناس ما فاهمة حاجه بتجيب معلوماتها من ( الأسافير )
والأسافير دي زي ( السوق الصيني ) فيها أي بضاعة ومن أي نوع …
الدولة الأبوية بتاعة يا شعب نحن أدرى بي مصلحتك
انتهت زمااان مع ( شاوسسيكو ) زمن في اذاعة وتلفزيون حقات الحكومة تحرسها المجنزرات …

هسا أي مراهق بطلع لايف من قدام الدكان
وأي حساب ( Facebook ) ممكن ينقل ( حريقة )
وإذا حصل شير ( المطافي ) ذاتا بتعرف من ( الفيس )
إذا تركتم الأجهزة الرسمية لنقل اخبار الاجتماعات واللقاءات
ورونا الحاصل عبر ( الأسافير ) دي نفسها وصفحاتكم المعتمده ذات العلامة الزرقاء …!!
ترامب برفع النفط وبنزلو بي تغريدة …..
ووقف أمام الCNN بكل ترسانتها من منصة ( Twitter )

شعب وجد الفساد يستشري في جسد الأمة فأصابت العدوى ضعيفي المناعة منهم لانهم وجدوا النموذج الفاسد في ظل عدم مساءلة واحتفاء احيانا
فضربتنا جائحة الفساد. …حيث لا كمامة وفقدان لحاسة الشم ورائحته تزكم الانوف ونتيجته لاتظهر في ال PCR ….لانو متحور …!!

زي ما قال الشيخ البرعي في لقائه التلفزيوني ذلك المحضور …فقد قال ساخرًا عليه رحمة الله…
قال يقول ليك ومن باب الفخر
فلان داك ( شيطان ) خلاص ….
(يعني حاجه لطيفة كدا )
زول ( شفت ) بعرف يطلع القروش …!!
وهو في حقيقة الأمر
مجرد ( حرامي ) ولا توصيف أدق غير ذلك
( هو الحرامي دا الا يتلب البيوت ) …!!
أي زول يأكل حق الناس ان شاءالله عشرين جنيه فهو حرامي …

لقد جملوا الشيطان نفسه أو يصعب عليهم تجميل
أقرانه ….

مشكلتنا الكبيرة الفساد والأنانية وتضخم الذات في بعض الأحيان …

( السودان حيجوط شوية كدا ….وهو في حاجه لذلك ….!!

( الغربال لو ما إتهزا ما بغربل …!! )

لن ننهار ولن نذوب نحن ما ( قطعة بسكويت ) نحن بلد له تاريخ وجذور ….والأمم العريقة لا تسقط ولا تندثر
تنتكس وتمرض …لكنها حية لاتموت …!!

يجب ان نؤمن بذلك ..ولا نسمح لكائن من كان ان يهز ثقتنا في أنفسنا …..!!
ننتقد ذاتنا هذا واجب ومطلوب ولكن لن نقلل من
شأنها وذاتنا ولن نسمح بذلك …..
أذهبوا وجملوا الشيطان لكن لن تشيطنوا السودان
نحن هنا ….!!

ومخندقين مع هذا الشعب الصابر عزة وإباء
لقد خلقنا لنعيش وننتصر …!!

و نلتقيك اليوم يا وطني لقاء الأوفياء

صحي يابلد …!!!!؟

‫شاهد أيضًا‬

جوبا : توافق تام بشأن توحيد الجيش ودمج قوات الدعم السريع فيه

جوبا – الشاهد : أكد خالد عمر، وزير شؤون الرئاسة المتحدث باسم وفد الحكومة السودانية ف…