قبل ما تجي تقلع مني .. وريني حقي العندك وين ؟؟

هشام علي ود قلبا :

حسب الوصفة .. المطلوب أننا نفتح جيوبنا والحكومة تغرف .. وما عندنا مانع تغرف إذا البتغرفه ده برجع لينا خدمات .. في دول حكوماتها بقاسموا المواطن في دخله ضرائب 50% عديل .. لكن بقدموا ليه خدمة أعلى من مستوى الرفاهية في التعليم والصحة والأمن والمرافق الخدمية ..
اقتصار حيلة الحكومة على تنفيذ الوصفة امراً وطاعة كحل أوحد وكأنها قليلة حيلة ده هو أس البلاء .. الحلول متوفرة تفتقد فقط للإرادة .. حلول واضحة ملَّ الكل من ترديدها .. لكنهم مستوطين حيطة المواطن كأسهل مصدر دخل تقلع منه .. الباقيين حيطهم عالية .. حتى مراجعين ومحاسبين الحكومة الماليين ما بقدروا ينفذوا من خلالها ..

قبلما تجي تقلع مني .. انا كمواطن وريني حقي العندك وين ؟؟

عندي إنتاج دهب بمئات الأطنان وما عاوز تعمل بورصة .. البصدره بنك السودان رسمي منتعشه بيه بورصات الخليج الما بنتج جرام .. ونصه بتهرب بعين قوية ، لو في زول قال البغلة في الأبريق حتة شركة طيران خاصة زي (بدر) تجرجر البتكلم حتى لو كان هيئة الجمارك للمحاكم ..
عندي 80% من إقتصاد البلد وخصوصاً البجيب عمله صعبة بتديره شركات عسكرية محرم على مراجعين الحكومة “الملكية” الإطلاع على حساباتها .. والكل عاصر ضنبو وساكت ..
عندي ملايين الدولارات نقاطة يومية في هيئة الاتصالات البتبني الابراج من حر مالنا وبلا خجلة بتؤول ملكيتها لسوداتيل الثلاثة ارباع ملكيتها إستثمار أجنبي .. وحدث ولا حرج عن مليارات دولارات منظومة الصناعات الدفاعية والطيران المدني وزادنا وصندوق التأمينات الإجتماعية البمتلك نص الخرطوم ..
عندي مئات الملايين من الدولارات إستردتها لجنة إزالة التمكين .. ولجنة إدارة الاموال المستردة ووزارة المالية والشركة المنشأة على الورق .. جميعهم حضرنا ولم نجد اموالنا ..
عندي ارض لو زرعتها سيخ تاني يوم ببقى قضبان سكة حديد .. وبنستورد الثوم الصيني لانه جالون الجاز بتتحرم منه المزارع عشان تتحرك بيه أساطيل فارهات الدستوريين ..
عندي وعندي وعندي إلى ما لا نهاية .. فقبلما تدخل يدك في جيبي تغرف أكتر .. وريني حقي العندك وين ؟؟