زول زي ده تشكريهو ولا تبشعي بيهو في المجالس؟

محمود ميسرة السراج:

كبيرة المذيعات في تلفزيون السودان في عهد الانقاذ الظلامي البائد والتي تفاخر بانها هي التي تلت بيان انقلابهم على الديمقراطية ومبسوطة من البشير عشان طلب مقابلتها واداها قروش كتيرة جدا عشان توزعها علي مذيعات التلفزيون يشتروا (زي اسلامي).. المذيعة دي زعلانة من لقمان (مدير التلفزيون الذي اقاله البرهان مؤخرا) قالت مشت ليهو في مكتبه وقالت ليهو المذيعات بقوا يعملوا رموش صناعية ويركبوا عدسات لاصقة وما ملتزمين بالزي الشرعي وقام لقمان قال ليها هو ما بقدر يلزم المذيعات بزي معين..
كلام المذيعة دي اسعد الكيزان العايزين يقنعوا الناس انهم في زمنهم نشروا التقوى والفضيلة بين الشعب السوداني ثم جاء الفاسدون بتاعين قحت فنشروا الفساد وقلة الادب لدرجة انو امين حسن عمر شخصيا عمل شير لكلام المذيعة دي..
طيب يا ستي اول حاجة الرموش الصناعية والعدسات اللاصقة دي أول من ادخلها للسودان هم ناس الانقاذ وغالبية مذيعاتكم سواء في النيل الازرق او تلفزيون السودان كانوا مركبنها..انا ما داير اقول انها حاجة كعبة او حاجة كويسة بس من ادخلها للبلد هم الاسلاميون..بعدين حكاية الزي الشرعي كيف تقدري تفرضيهو في بلد متعدد الاديان والتقاليد والاعراف وفيهو ناس مسيحيين وناس وثنيين وناس لا دينيين مع الاقرار بان الغالبية مسلمين لكن حتى بين المسلمين هناك ناس عندهم رأي في الحجاب والرأي ده عنده جذور دينية برضو ويمكن مراجعة بعض مشايخ وعلماء المسلمين البقولو الكلام ده..
انا ما عايز اتطاول واقول ليكي انو الفساد الاخلاقي والانحلال المجتمعي وحاويات المخدرات والفسق والفجور والحاجات الكانت بتحصل في نهار رمضان الذي شهدته سنوات الانقاذ لم تشهده بلادنا لا قبل الانقاذ لا بعدها…
بعدين ياخ انتي اعترفتي انك قريتي بيان الانقاذ الاول وكنت الكل في الكل في عهدهم ثم جاءت ثورة شعبية اطاحت بالانقاذ وجابت لقمان مدير لتلفزيون الثورة وبعد ده كلو هذا اللقمان لم يفصلك من عملك بدافع الانتقام وخلاك مستمرة واكتفى فقط بانو قال ليك هو ما بقدر يفرض زي معين على المذيعات.. زول زي ده تشكريهو ولا تبشعي بيهو في المجالس؟