لكي نسقط الانقلاب !

هشام علي ود قلبا:

ما حأستفتح بالترحم على الشهداء ولا حأجيب سيرتهم ونحن ما عملنا شيء مثمر يحقق حاجة واحدة من الحاجات الضحوا عشانها .. ولا حأجيب سيرة التحول المدني الديمقراطي لانه البنعمل فيه ده (مستحيل) يوصلنا ليه .. ولا حأدعوا بالطريقة التقليدية للجملة الفقدت مغزاها من كترة تكرارها بالنوايا فقط من دون عمل مثمر ، وهي جملة (وحدة قوى الثورة) .. حأختصر وأدخل في الموضوع مباشرة بدون كلام معسم وغلاد ، كلام زول ساي مليان وجع.

نحن بنعمل في شنو الان ؟؟
الإجابة :
بنسقط في الانقلاب ، وبنبني في السودان زي ما بستحق هو حتى لو نحن ما بنستحقه.

إسقاط الإنقلاب محتاج شنو ؟؟
الإجابة قطعاً :
التنسيق والعمل المشترك ووحدة كل الصف الثوري ، لأنه كضااااب البقول بسقط الإنقلاب براه.

طيب .. تنسيق ووحدة كل الصف الثوري عشان يتحققوا مطلوب شنو ؟؟ ومن منو ؟؟

الإجابة حسب تقديري

* مطلوب من الحرية والتغيير :
1/ موقف واضح من شركاء الانقلاب الموجودين جواها .. ما بنفع إني أقعد معاك عشان نتفق وننسق نسقط الانقلاب وانا ما شاعر معاك بالامان ، دي ما حسابات سياسة ، دي حسابات زول ساي ، حسابات بتقول الحرية والتغيير مخترقة ، أيوة مخترقة رغم كل مواقفها .. عدو الثورة الوااااضح شريك جوة الانقلاب وشريك جواها ، كيف يستقيم انت تكون شريك عدوي ودايرني أجي أقعد وأتحالف معاكم !!
المطلوب موقف واااضح من الجبهة الثورية .. عارف الوضع معقد ، لكن دي مشكلة الحرية والتغيير ما مشكلة الآخرين ، تحلها الحرية والتغيير بطريقتها تمرق لينا بموقف واضح وحاسم.

2/ ما بقول للحرية والتغيير إتفرتقي .. لكن المانع شنو الاحزاب تنسق مع بقية الصف الثوري منفردة ، ويخلوهم في تحالفهم ده ؟؟ ما بقول لازم تتفرتق طالما هم مجتمعين او فرادا مقتنعين بالتنسيق والعمل المشترك .. من ناحية تانية لجان المقاومة ذاتها تحالف .. والاجسام والمبادرات القامت بعد الانقلاب كلها عبارة عن تحالفات .. بالنسبة لشخصي – لو رأيي عنده قيمة – ما بتفرق معاي الحرية والتغيير تنسق مع البقية كتحالف او كل حزب منفرد لأني شايف مواقفهم من الانقلاب منفردين ومجتمعين واضحة .. لكن من وجهة نظر اطراف فاعلة كتيرة في الصف الثوري رأيهم عنده وزن وقيمة بفرق معاهم ، المانع شنو يقعدوا كللللهم في الواطة ويتحاوروا مع بعض بدون شروط مسبقة ، ويوصلوا لحل ؟؟

* المطلوب من الجبهة الثورية الغير مشاركين في الانقلاب شنو ؟؟
نفس الكلام .. موقف واضح من رفاقهم شركاء الإنقلاب وبس .. أبيض وأسود مافي رمادية بتسقط دكتاتورية ولا الوضع بتحمل استمرار الرمادية ، ولا كتلة الحرية والتغيير بتقبل عضوية افراد .. الحل الابسط عندهم ممكن يعفوا الحرية والتغيير من الحرج.

* والمطلوب شنو من الحزب الشيوعي ؟؟
مطلوب منه حاجات كثيرة ، لكن مختصرها وملخصها إنه المواقف المسبقة الشروط والسابقة للقعاد مرفوضة وما بتودي لقدام ، ولو عاوز تفصل أي نقطة تخطر في بال اي زول حتلقى تمترس الحزب الشيوعي خلف المواقف المسبقة الشروط هي السبب في الإختلال .. لانه ببساطة اذا انا متفق معاك في كل شيء لزوم القعاد سوا شنو ؟؟ ولو البلد كلها بتمشي بشروط جهة واحدة ، لزوم التنوع شنو ؟؟ خلاص الناس تشيل كلام الحزب الشيوعي كمسلمات وتلغي تفكيرها وكلامها ، وتبقى صدى لصوته !!
أقعدوا مع بقية الصف الثوري بدون شروط مسبقة .. إلا إذا الحزب الشيوعي عاوز يشغل وضع صكوك الوطنية ويعتبر مافي صف وطني غيره والبقية خونة ، كده ده يكون كلام تاني ، بخلي كلامي الفوق كله مافي داعي ليه.

* والمطلوب شنو منهم الاثنين ، الحرية والتغيير والحزب الشيوعي ؟؟

لو ما عاوزين يعملوا حاجاتهم الفوق دي .. ما مطلوب منهم شيء غير يرفعوا يدهم من لجان المقاومة .. معضلة تدخلهم في اللجان بقت ما سر ، ولا في زول فيهم الاتنين مجتهد يدسها ، أياديهم شغالة جوة اللجان إستقطاب بشع .. وممكن نتكلم ساعتين ثلاثة على مئات الشواهد والأمثلة ، لكن بس لو اخدنا مثال “ميثاق لجان المقاومة” خير دليل وشاهد .. فكسباً لزمن الناس بقول إختصاراً “أرفعووووا أياديكم من لجان المقاومة”.

* ومطلوب شنو من لجان المقاومة ؟؟
1/ الممثلين والمنسقين المرفوعين للمكاتب الفوق في هياكل اللجان .. ديل مع احترامي ليهم وحفظ حقهم في الرأي موقعهم في هياكل لجان المقاومة بفرض عليهم يكونوا “موصل ممتاز” لرأي القواعد فقط لا غير .. يشيلوا راي قواعدهم يوصلوه حرفياً وشكراً ، صح او غلط ما شغلتهم ، بوافق هواهم الشخصي او بخالف ايدلوحياتهم دي ما مهمهه ولا عندها قيمة .. تكليفهم “موصل ممتاز” فقط ما عندهم راي شخصي او أيديلوجي جوة المكاتب دي .. إنت كممثل ومنسق لجنة مقاومة رأيك حق ومحل إحترام لكن تمشي قوله كواحد من القواعد ، وتنتظر الله يعمل شنو في رايك وسط اراء باقي أخوانك واخواتك بالديمقراطية .. وهنا ما داير أتهم زول بالسواقة .. لانه السواقة هينة مقارنة بنتائج البحصل الان .. لو عندي إتهام لزول فيهم بكون بالفرتقة المتعمدة عدييييل ، وما للجان المقاومة وبس بل للبلد كلها .. وهنا النوايا ما بكون عندها معنى وقيمة طالما النتيجة المؤكدة فرتقه.
2/ لما يتحقق البند 1 بكل تأكيد الميثاق الجامع لكل لجان مقاومة السودان حيرى النور خلال 72 ساعة بالكتير .. الميثاق المعطل البلد كلها بفعل مية فاعل ، الميثاق الكان مقرر ليه يطلع آخر أسبوع في يناير ، نحن الان في مايو ومحلك سر.

* المطلوب من تجمع المهنيين والمبادرات الجامعة أجسام مهنية شنو ؟

تجمع المهنيين بفروعة الثلاثة والنقابات واللجان التسييرية والاتحادات والروابط والتجمعات المهنية ، وجميع الأجسام المهنية الموجودة قبل الأنقلاب والمنشأة بمبادرات وحراك بعده .. منتظرين شنو والمعطلكم شنو والناقصكم شنو عشان تقودوا فعل ثوري ملموس على الأرض يتشاف بالعين المجردة ؟؟
مطلوب .. وحدتكم + عدم تبني وجهات نظر إيدلوجيات بعينها + تشتغلوا شغلكم في إنجاز الدور الاعظم في العصيان المدني والاضراب العام لانه ده شغلكم ومهمتكم ودوركم .. مؤخراً بقينا نشوف دوركم ده ونسمع بيه من جهات تانية أحزاب ولجان مقاومة وغيره .. نعم في حراك داخلي معلوم واجتماعات وتنسيق على مدار الساعة ، لكن لمتين ؟؟ وين وحدتكم البتخلي شغلكم المناط بيكم يتشاف بالعين المجردة ؟؟

* مطلوب شنو من المجتمع المدني والاجسام المطلبية والفئوية والمرأة … إلخ ؟؟
نفس البنطبق على لجان المقاومة والكتل المهنية بنطبق عليهم .. ممكن تسرد قائمة فيها مية جسم منهم ، حتلقى كيانات كثيرة منهم لو ما بتعبر تماماً على اقل تقدير فهي مائلة لمعسكر الحرية والتغيير او معسكر الحزب الشيوعي وكأنها واجهات خفية ليهم ، وده الشيء المخليهم مية جسم ، ليه يكون في عشرين او خمسة وعشرين جسم لقضايا المرأة ؟؟ الثورة حتستفيد من التشتت ده ؟؟

مافي زول مؤمن بالثورة ما بردد إسقاط الانقلاب مشروط بانه كل الناس في الصف الثوري ينسقوا ويشتغلوا مع بعض .. سموها وحدة توافق إئتلاف ما مهم الأسم المهم الفعل .. والحاجات الفوق دي لما تتعمل بنكون وصلنا أوتامتيك للتنسيق والعمل المشترك لإسقاط الإنقلاب ، ما محتاجين زول يدعونا لوحدة او غيرها .. ده المطلوب عشان الكتلة الحرجة تتفعل بدرجة تنتج فعل ثوري حاسم .. الكتلة الحرجة جاهزة ومنتظراهم ، هم المأخرنها ما هي المأخراهم.

وحاجة اخيرة .. عشان نسقط الانقلاب ده ، مافي حاجة إسمها حد أدنى وحد أعلى .. الحدود دي من صنع أيدلوجيات الناس البتخدمهم وجود حدود عليا ودنيا ، وما موجودة إلا في خيالهم .. في حاجة إسمها الحد المطلوب لاسقاط الانقلاب وبس .. لو عاوز فعلاً تسقط الانقلاب شوف انت واقف وين من الحد ده ، لو بعيد منه تعال عليه .. تطلع ليه او تنزل ليه ، تجيه يمين شوية او تجيه شمال شوية ، المهم تمشي عليه لأنه ده ياهو الحد البسقط الانقلاب ، أي تمترس فوق تحت يمين شمال الحد ده بغض النظر عن الأسباب بكون مشاركة في اطالة عمر الانقلاب بس ما أكتر .. وبرضو الحسابات هنا ما فيها نوايا فيها نتائج أفعال ، والنتيجة المضمونة خسارة للكل وللبلد ، وبالتأكيد إنت من ضمن الكل الخسرانين ، الرصاصة ما بتفرز ولا التسلط والاستعباد بفرز.

ده بالنسبة لإسقاط الإنقلاب ، بالنسبة لبناء السودان زي ما بستحق ، فموجود أصل وفروع ضمناً وتصريحاً جوة تحقيق المطلوبات دي.

ده إجتهاد زول موجوع ومتألم ، أقرب للنقصان والخطأ ومحال الكمال والصح المطلق.

اللهم فأشهد