‫الرئيسية‬ آخر الأخبار بخصوص ثورتنا العظيمة
آخر الأخبار - مايو 7, 2022

بخصوص ثورتنا العظيمة

إبراهيم البكري:

الليلة إتذكرت حاجة عجيبة: كان في راجل ظاهرة عليهو علامات الجنون والتشرد .. كان بينوم في راس حاوية جنوب شرق الكلينك .. عمرو ستيناتي كدا وشعرو مبرم بوب .. مرات بتلقاهو لابس صديري مع جلابية وبنطلون أو قميص وسروال بلدي وفيها لطخات من ألوانو البيرسم بيها وبكون شايل بقجة فيها ألوانو وعدة الرسم .. كان دايماً بتشوفو مولع سجارة عادية ومرات بتلقاهو مولعها سجارة بنقو ماسكها بين أصابعو الملطخة بالألوان بتاعتو ..
القصة إنو كان راسم رسومات على طول الممر اللي شرق التدريب المهني ومستشفى الكلينك ومستشفى العيون لغاية موقع كولمبيا ومرات بتلقى ليهو رسومات قصاد القيادة من الناحية الغربية على جيهة كلية الأشعة وتمشي شمال لغاية جامعة الخرطوم بي إختصار منطقة الإعتصام كلها اللي كانت فيها جداريات الثوار المليانة حياة ..
رسوماتو موضوعها يكاد يكون واحد .. بتلقاهو راسم تاتشرات وجنود شايلين بنادق في حالة إطلاق رصاص وفيها ناس واقعين مضروبين واقعين أو واقفين يادوب الطلقة ضربتهم ..رسوماتو فيها دايماً صقور منقضة أو في حالة طيران يحسسك بي ضراوة الصقر اللي بتجيب ليك فكرة الموت والجثث ..
الراجل دا مات قبل الثورة بي سنتين او تلاتة .. الليلة إنتبهت لي إنو الفنان دا رسم فض الإعتصام قبل يحصل بي سنوات. أتاريهو كان شايفو .. أتاريهو ما مجنون

‫شاهد أيضًا‬

اعتصام طلاب جامعة الضعين يتواصل

الضعين – الشاهد: يتواصل إعتصام طلاب “جامعة الضعين” أمام البوابة الرئيسية…