تفاصيل جديدة عن فضيحة تسريب امتحانات شهادة الاساس بولاية الخرطوم

الخرطوم – الشاهد:

على صفحتها بالفيسبوك نشرت م م وثائق تؤكد تطابق بعض أوراق امتحانات المواد في شهادة الاساس بأوراق عمل لإحدى المدارس الخاصة المشهورة وشهادات أمهات تلاميذ بتلك المدرسة ان الأوراق تم توزيعها قبيل الامتحان.. واستطردت (ولانو الكلمة مسئولية و لاني مسائلة قدامكم من البقولو بحب أكون دقيقة و واضحة في كلامي، خصوصا لمن يكون في قضية بتمس مصالح شريحة كبيرة من الناس، ح اتكلم فقط في الحصل معاي، بعد داك اترك التقييم للقارئ.
قبل امتحان العربي بي يوم بتكلم مع زولة من معارفي ولدا بقرا في المدرسة المشاع عنها انها بتكشف الامتحان للطلبة، قالت لي بالحرف انو القطعة حقت القرأة الصامتة الجاية في الامتحان في كتاب النحو في الدروس المحذوفة و اسمها ((البدل)) و التعبير جايبين ليهم الرياضة و دور الشباب في المجتمع.
انا افتكرتو اسبوتنق فسألتها عن ورقة الاسبوتنق قالت لي ما بدوهم الورقة بحلوها معاهم في المدرسة و حتى ما بسمحو ليهم يكتبو المراجعة في كراسات.
سألتها ليه بعملو كده قالت لي
(( بي صراحة لانو ده الامتحان))
و فعلا الدرس المحذوووووف من المقرر جاء في الجزء بتاع القراة الصامتة والتعبير جو الموضوعين المرشحات ديل.
الناس العايزين يجو يقولو ده اسبوتنق و ضرب ح اقول ليهم معليش اسبوتنق من المحذوف؟؟
حاجة محذوفة و انت متاكد انها جاية ببساطة لانك كاشف الامتحان.
و برضو الناس ال ح يجو يقولو لي اولادنا اجتهدو و ساهرو و ذاكرو بقول ليكم ده كلو ممكن يكون حقيقي لكن الحقيقة الاوضح انو مدرسة اولادكم بتكشف الامتحانات وبي علمكم و تحت سمعكم و بصركم.
والله يعين اولادكم لي قدام)