ثلاثة أشياء لا قيمة لها في الثورة

محمد أحمد شيكاغو:

1.الهتافات الإنصرافية والهزلية.
2.إلغاء البمبان علي الثوار وبالقرب من المستشفيات.
3.إحتكاك الثوار بالأقسام والمراكز الأمنية.

1.الهتافات الإنصرافية والهزلية، لا إستفادة من هتاف غير مطلبي وكل هتاف إنصرافي و هزلي يحتسب نقطة ضدك وضد ثورتك المجيدة، الهتافات المطلبية هي التى تحتسب لك وتعبر عنك وعن حالك وعن حال ثورتك و وطنك وعن كيفية كيف يسير قطار الثورة العظيم، والهتافات الإنصرافية بتقلل من شأنك ك ثائر وبتخلى الناس تتنافر منك وتبعد منك.
الهتافات المطلبية هي السلاح الرابح والسلاح الذي يحشد ليك بدون معاناة وبعمل زخم ثوري والإعلام ممكن يركز معاهو وينتشر لغيرك في كل أطياف المجتمع المدني، و بالعمل الجميل دا إنت كدا بتكون عملته ليك أرضية ثوريك صلبة من كل جماهير الشعب السوداني.

2.إلغاء البمبان علي الثوار وبالقرب من المستشفيات، لما تجدع ليك بمبان في نقطة تجمع أو في حي أو بالقرب من مركز صحى أو مستشفى كدا إنت بترجع مية سنة ضوئية للخلف والمستشفى دي فيها حالات ممكن دخان سجائر يأثر معاها ويمكن يسبب ليها الوفاة وبالطريقة دي بتعمل عوائق عليك وعلي أخوانك الثوار وغيرهم بتأذى بسبب هذا التصرف الغير أخلاقي والغير ثوري أبداً، عبوات الغاز المسيل للدموع بترجع للعساكر فقط لحماية المتظاهرين السلميين في الموكب؛ وإنت تشيلها وتجيبها معاك للحلة أو غيرو دا في نفس الوقت عامل مساعد للإعتقال ليك لولا قدر الله إذا حصل ليك إعتقال وإنت عندك كمية من عبوات الغاز المسيل للدموع دي براها أدلة ومعروضات ضدك وبدون محكمة ممكن تتصور معاها ويتم عرضك في كل مواقع التواصل الإجتماعي وح يكتبوا عنك أشياء لا تخصك ولا تشبهك ك ثائر ( قتل عسكري ، طعن نقيب، حرق تاتشر شغب، طرف ثالث) يلا عشان كدا الحاجات دي الناس تخليها في ملعبها ( محل الإشتباك) ما تجيبها معاك لأنو بتجيب الكوابيس معاك.

3.إحتكاك الثوار بالأقسام والمراكز الأمنية، وما هذا إلا خطأ كبير وخصم كبير عليك يا ثائر، هذه أقسام شرطة بها متهمين ينتظرون المحاكم، وبها أوراق ومستندات وشهادات وبلاغات وأدلة جنائية، ومعروضات وبها افراد شرطة ثوريين للنخاع.
الإنقلابيين وبعض الجهات بتجرك وبتخليك تمشى تخلق إشتباك من العدمة مع القسم الفي حلتك وفي نفس الوقت القسم فيهو أشياء لو إتفقد جريمة في حد ذاتها وإستخدم الرصاص وارد في كل الأحوال بسبب حماية ما بداخل القسم أو المراكز الأمنية والغلط هنا بتكرر مراراً وتكراراً بسبب الجهل والغباء المتصنع ونسبة الوعي ضعيفة بسبب ضعف اللجان الميدانية وعدم المخاطبات وتوزيع القصاصات وإحتلال المنابر للتحدث عن الوضع الراهن وغيره من الأحاديث المفقودة تظل في أعناق التنسيقيات واللجان لا نخون جميع أفراد اللجان بس ياريت التروس الحقيقيين الفي اللجان يشتغلو تعريا علي كل عضو يظل عائقاً ويخدم خط غير خط المقاومة داخل اللجان والتنسيقيات.