‫الرئيسية‬ آخر الأخبار موجهات لمليونية 30 يونيو
آخر الأخبار - يونيو 29, 2022

موجهات لمليونية 30 يونيو

الخرطوم – الشاهد:

تداول ناشطون ما سموه بديهيّات للأغلبية ” بس لتنبيه من يحتاج، بما إنّ الموكب القادم دا حيشمل ثوار غير منتظمين في المواكب، لظروفهم الخاصة والمختلفة:

– أقوى دفاع للموكب هو العددية الضخمة وانسياب الحركة، فما تطلع قبل الناس ولا تفارق مسارهم، ولا تتهور وتتقدم بعيد من مقدمة الموكب، ولا تتأخر عنه شديد، عشان ما تتقصّ او تتصاب.
– الكمامة ونظارة السباحة والخل وصفق النيم وموية الخميرة، بيخففوا كتمة البمبان، وسبحان الله أي زول بتنفع معاه خلطة مختلفة، في ناس بيحلّها غسيل الوش بالبيبسي مثلاً، اعرف البيحلّك شنو، حتى لو ما شايلو معاك بتلقاه في العيادات الميدانية في الموكب (احتمال تلقا الشايل اسعافات شايلها في شنطة وكاتب عليها ما يفيد) .
– لو سمعت رصاص حي، استخدم اقرب ساتر، او افترش الأرض لتقليل مساحة التعرّض.
– لو تم قذف البمبان بكثافة على الحشود، خلي عيونك في السماء عشان تتجنب الساقط منها.
– أكل كويس واشرب موية واستخدم دورة المياه قبل بداية الموكب، حتحتاج الطاقة وفراغ المثانة.
– قدر الإمكان اطلع مع موكب حلتك، او مع كمية من الناس البيعرفوك وبتثق فيهم، او مع اللجنة الميدانية البتعرف اعضاءها شخصيّاً، بالذات في حالة قطع الانترنت.
– ما تشتبك مع عسكري، ولا تأذيه، نجاح المليونية دي وأي مليونية مفصلية بعدها (وان شالله ما نحتاج) بيعتمد على انهم يشوفوا قضيتك ويختاروا صفّك بدل صف الفاسدين المتحكّمين، مش بيعتمد على انتصار واحد فيكم.
دي معركة حياة او حياة، وليس حياة أو موت.
– طريقة حمل المصاب وسرعة نقله نحو المختصين، قد تكون اخطر عليه من الاصابة، افسحوا المجال لأصحاب الاختصاص عند الضرورة (وان شالله ما نحتاج).
– عبّي الحناجر بالهتاف
– اتحصّنوا، وادعوا الله القوي الجبّار يرفع عننا بلاء الحكم العسكري، والكيزان، والمليشيات، والفساد، والاضطراب السياسي، والانقلابات، والمجاعات، وتجار الدين، وتجار هيبة الدولة، والجنجويد، والعنصريين.. ادعوا الله ان يجعل على ايديكم الخلاص، ويحفظكم ويغطي عليكم”

‫شاهد أيضًا‬

الاضية زكريا تنضم الى الميثاق الثوري لسلطة الشعب

الاضية زكريا – الشاهد: عن لجان مقاومة الاضية زكريا صدر بيان فيما يلي نصه : الظالمون …