‫الرئيسية‬ آخر الأخبار (إنهاء) أم (شرعنة)
آخر الأخبار - يناير 20, 2023

(إنهاء) أم (شرعنة)

هشام علي ودقلبا:

كدي تعالوا ببسااااطة وواحدة واحدة ناخد المصطلحين الفوق ديل نفرتقهم ونسقطهم على الواقع الماثل قدامنا ، عشان نسمي الحاجات بمسمياتها الواقعية الصحيحة

الحصل شنو ..

= شلة العساكر على رأسهم (برهان) عملوا إنقلاب .. إستغل فيه إنه هو (القائد العام) للجيش ، ورغم إنه ده منصب (بوكو) إتلغى من قانون الجيش ، لكن ده ما موضوعنا هسي.

= حسب الدستور والقانون الزول البعمل إنقلاب مجرم عقوبته معروفة ومكتوبة بالنص.

= إنت لحدي الآن بتسمي الحاجة العملها (برهان) إنقلاب ، وإنت جيت قعدت معاه فاوضته على أرضية (الدستور الإنتقالي) العجبه وإحتفى بيه وقال ياهو ده الحل.

= قعادك وتفاوضك معاه نتج عنه توقيع إتفاق سياسي حالياً في طور الإطاري ، وماشي بكرة توقع معاه إتفاق نهائي.

= حسب الأتفاق السياسي والدستور الإنتقالي بعد التوقيع النهائي (برهان) حيستمر في منصب قائد عام الجيش ، نفس المنصب الإستغلاه وعمل بيه الانقلاب.

طيب ..
= مجرم (حسب الدستور والقانون) كان قائد عام (بوكو) ، عمل إنقلاب نصب بيه نفسه رئيس وقائد عام (بوكو البوكو) .. إنت جاي دستورياً وقانونياً (بالدستور الإنتقالي) وسياسياً (بالإتفاق الإطاري والنهائي) عاوز تمسح جريمته وتكفل ليه منصب ويبقى قائد عام (شرعي) دستورياً وقانونياً وسياسياً.

بالتالي ما تقول (إنهاء الإنقلاب) ، لأنه البتعمل فيه ده نتيجته الطبيعية والمضمونة هي (إنهاء) حالة وجود (برهان) كقائد عام غير شرعي ، وحتنقله من خانة (قائد عام أجرم وخرق الدستور والقانون) لخانة (قائد عام شرعي).

ببساطة دي (شرعنة) ما (إنهاء)

‫شاهد أيضًا‬

الدعم السريع يفرج عن 28 من عناصر الجيش

كادقلي – الشاهد: أطلقت قوات الدعم السريع سراح 28 من الجيش تم أسرهم قبل نحو اسبوع في …