( محركة ) التنفيذ في السودان

هادي بورتسودان :

العام 2016 أثناء زيارة لألمانيا شاهد أو عرضت على معتز موسى وزير الكهرباء في وكتها معه وفد برفقته 5 ماكينات سيمنز من روسيا البيضاء على الفور قرر شراءها وقرر تركيب تلات في قري و2 في بورتسودان – يقال أن التمويل كان من الصناديق العربية أو بنك التنمية العربي بحوالي 600 مليون دولار – ونتيجة العقوبات الغربية على الكيزان – تم وضع التركي أوكتاي شريك آل المخلوع في نص عشان تمرق سيمنز من المشاكل القانونية :-
– الماكينات كان مفروض تشتغل في أغسطس 2017
– الماكينة الواحدة بسعة 187 بإجمالي 900ميقا كفيلة بتغطية العجز الحالي لتوليد الكهرباء في الصيف
– لكن نتيجة للجوباق في الشراء الأساسي من دول باردة أغلب المهندسين الأتكلمت معاهم بيقول درجة الحرارة المثلي للمكنات دي 15 درجة مئوية – بعهدها ما بتديك الطاقة القصوي للتوليد حقتها
– برضو الكيزان عشان يخفضوا تكاليف الوقود تم أجراء تعديل داخلي فيها عشن تشتغل بالزيت التقيل – بعض المهندسين بقولوا بكده ما بتصل 150 ميقا للماكينة – ولو حسبت معاها مخاطر بلد حار زي السودان بعضهم بقول ليك حدها 120 ميقا
-تحتاج الماكينات في قري لحوالي 3آلاف طن مكافيء خلال 24 ساعة وهو تحدي لوجستي كبير لو عرفت أنك محتاج ما بين 60 إلي 100 شاحنة نقل يوميا – بخلاف مشاكل مرابط البترول في الميناء التي تتاوب عليها بواخر الجاز والبتزين – يقال أنو حا يتعمل خط أنابيب بس متين ما عارف
حقات بورتسودان أختارو المنطقة عشان يتجاوزوا التعقيدات اللوجستية ويقللو التكلفة وكان يفترض بورتسودان يكون فيها 1000 ميقا تاني غاز .. بس كلو كلام ورق لكن تنفيذ صفر
– المكنات دي يفترض تدخل فيها مراجل بين كل مكنتين – يعني 2 في قري واحدة في بورتسودان عشان تديك توليد مزدوج مائي ممكن تديك حوالي 600ميقا تاني – بنفس تكلفة الوقود .. بس دي ممكن بالوضع الماشي والنزاع الحاصل الله أعلم نحضرها ممكن تكون بعد 2100 م
– التكلفة المحسوية لتشغيل المكنات دي حاليا بين 23 سنت و 20 سنت لكيلو الكهرباء حسب تقديرات أكتر من مهندس سالتهم يعني كيلو الكهرباء توليد يكلف بين 120- 140 جنيه
…
نجي للمعضلة التي عجز أنشتاين لحلها – التركي الشفت شريك آل البشير أولاَ ما عندو أمكانيات للتشغيل وده سبب المحركة لكن عقدوا مأمنو بشكل كبير لو مع سيمنز أو الحكومة – سيرفراتو وتصميماتو في تركيا يعمل شط داون ليها من هناك يخلي الحكومة لافة صينية – لما جات الحكومة العسكرية الأولى بعد الثورة لقت تأخير كبير في الدفعات وغرامة قام حميدتي دفع ليهو كل العايزو عشان يرجع يشتغل دفع ساكت شال قروش وأداها ليهو ما عارفها كم لكن عشرات الملايين (هو داقي فيها حجر دقش ؟) – المهم المحركة حاصلة أها أتشكلت حكومة بعد اتفاقية السلام ودخلت ( قحت )وكان متابع الموضوع ده خالد حسب لايفاتو الزمان ديك وكان مفروض الماكينات تخش في ديسمبر 2021 حسب كلامو
أها وقع الأنقلاب واظن التركي مافي زول هبب ليهو وتاني رجعنا للتأخير لو قلنا نشغلها هسه – السمعتو حاليا غراماتو في حدود 35 مليون – تاني حا ندفع ليهو تشتغل بعضها ولا يحصل محركة الله وأعلم
أما حقات بورتسودان ديك من يوم نزلوها وختوها في 2017 تاني ما هبشوها عايزة اعمال مدنية كتيرة
….
لفايدك اصلاً ناس معتز موسى مشو لسيمنز حاكو حاكو ساكت سينمز كان وكتها وقعت عقد ضخم لإنتاج 14.4 جيجا وات مع المصرين بحوالي 6 مليارات يورو ( يعني قدر مكناتنا دي 18مرة – المصرين قالو وفر الوقود بس يخليهم يسددو قيمتها في 5 سنوات – المكانات تقريبا اشتغلت بعد تلات سنوات – وهي السبب الرئيسي لفائض الأنتاج الحالي للكهرباء في مصر
..
المهم البوست ده لتحديث الذاكرة عشان الصيف على الأبواب- ممكن يكون فيهو جدل في المعلومات الفنية لأنو المهندسين فيهم المتفائل وفيهم المتشائم منها – وجبريل ما عندو رحمة ولا عندو عندو موارد غير يمص المواطنين – وكل الشعب السوداني مفروض يدفع تمن بقاءه في السلطة
.