من خال الشهيد محجوب إلى سيدنا حمزة بن عبد المطلب سيد الشهداء

متابعات – الشاهد :

كتب خال الشهيد محجوب طالب طب الرازي (عبد المطلب الننقة) رسالة الى سيدنا حمزة بن عبد المطلب رضي الله عنه يوصيه فيها على ابن اخته (يعني تبقي ولي أمرو) ويعصر ويشد حيلو ليتخرج مع دفعته سنة 2022 وفيما يلى متن المقال الوصية.
بسم الله الرحمن الرحيم
جنة الفردوس الأعلي/قسم الشهداء
سيدي/حمزة بن عبد المطلب (سيد الشهداء)
السلام علي إبن أخيك سيدي محمد وعليكم جميعا آل البيت وصحابته الكرام وزوجاته أمهاتنا جميعا ..
أما بعد
طبعا إنت ياسيدي حمزة مابتعرفني انا عبد المطلب من السودان سموني علي ابوك(الله يرحمو). ومابتعرف مناسبة الجواب دة شنو بإختصار أنا عندي ود أختي جاكم شهيد يوم الخميس 24.1.2019 .اسمو محجوب التاج محجوب( ولد وداد اختي) داير أوصيك تبقي عشرة عليهو وتبقي دليلو (يعني تبقي ولي أمرو) .. والله والله أنا لا شايل هم أكلو ولا شرابو ولا لبسو . عندنا خبركم لابسين حرير والدايرنو من الأكل والشراب يجيكم هوا .. ماشاء الله وعيني باردي عليكم .. عليك الله تمشي تشوفو وتخليهو قريب منك .

أنا مع الجواب دة برسلك صورتو .. وليد أخدراني (سمين ومبغبغ) .. وشيهو طفولي وفيهو فرح كتير في دواخلو .. وزي ما قال ((الطيب صالح) وكتين ود عمتو مات .. قال :(كان به فرح داخلي كأنه كان يتكتم نبا سارا) .. شايف ياسيدي حمزة محجوب المعاك دة وكتين كان معانا في الدنيا كنا نشوفو فرحان طوالي .. وطبعا نحن المطرطشين ما عارفين زولنا فرحان فوق كم ؟؟ أتاريهو قاعدلو فوق راي.. المهم زي ماوريتك تخليهو تحت عينك

سيدي حمزة

سمعنا إنو الناس الفي النار (يكوركوا) لي ناس الجنة عشان يدوهم موية عشان يشربوا وطبعا ياسيدي حمزة أهل النار من السودانين كلهم من (الحركة الشيطانية) .. أنا خايف محجوب يشوف زول سوداني يكورك في النار يقوم يديهو موية (محجوب زول طيب) .. تكلمو مايديهم موية .. أهل السودان ياسيدي حمزة موحدين و (أهل طريق) وناس طيبين ومسالمين وما عندهم لف ولا دوران و ما بيغضبوا ربنا يعني لا (قتلة) ولا (حرامية) . عشان كدي كلهم في الجنة بإذن الله
ونصيب السودان من النار شالوهوا ناس (الحركة الشيطانية) .. كرر علي محجوب ما يديهم موية ، ما يديهم يعني ما يديهم ، (يشربوا السم)..

سيدي حمزة

وكتين كنا (زافين العريس محجوب) في (مقابر الصحافة )، الناس كانوا ب الآلاف وكلهم كانوا يرددوا (لا إله إلا الله ، الشهيد حبيب الله).. وكتين الناس كانوا يرددوا (الشهيد حبيب الله). كان في المقابر في تلاتة كلاب تنبح ، أنا نهرتهم (جر) قامت الكلاب سكتت .. زمان وكتين كنا صغار كنا نسمع إنو الكلب وكتين يشوف الملايكة ينبح ، والله أنا ما كت مصدق الكلام دة .لكن شفت الكلام دة بي عيني لانو الكلاب نبحت
والملائكة بالتأكيد كانت حاضرة في الوقت داك.

سيدي حمزة

أهم حاجة تخليهو يواصل قرايتو ويواصل كلية الطب .. هسع إنتهي من سنة تانية تخليهو يعصر نفسو عشان إنشاء الله يتخرج سنة(2022) مع رفاقتو .. في دكتور جاكم قبل محجوب بي كم يوم اسمو دكتور بابكر ممكن يساعد محجوب ويذاكر ليهو. إنشاء الله بعد التخرج شوفو داير يتخصص شنو ؟؟ وداد دايراهو يتخصص باطنية والتاج دايرو يتخصص إصابات ملاعب . المهم إنت شوفو داير شنو وخليهو علي راحتو .. وإذا شاورك في موضوع التخصص قولو خالك قالك إتخصص التخصص بتاع الناس (البيشرحو الجثث) عشان دايرين تقارير التشريح تكون مافيها لف ولا دوران ..

سيدي حمزة

طبعا في حاجة أنا ما وريتلك ليها يا سيدي حمزة .. محجوب المعاك دة كان في جامعة إسمها الرازي بتاعة (غندور) (وولد عثمان رزق) .. ودة مدير الجامعة الرسل رسايل للطلبة وقالهم إذا ما جيتو الجامعة (مابخليكم تمتحنو) .. ووكتين مشو لقو الناس الكتلو محجوب حارسنهم .. شفت الحصل ياسيدي حمزة ؟؟ وطبعا قبل نجيب جثمان الشهيد من المشرحة البنبان والتاتشرات ما تديك الدرب .. حتي كمان في تاتشر ضربتلها ولد قدام بيت البكي .. والله ياسيدي حمزة نحن البنبان شغال فينا 7 يوم ..

سيدي حمزة

طبعا شيخنا حاج الماحي معاكم وتكون قابلتو كتير . دايرك تقابلو وتسلم عليهو وتقولو نحن دايرك تمدحلنا تلاتة مدحات ونحن واقفين عليهن تب . قصيدة( التمساح) وقصيدة( بالفور والدلك) وقصيدة (طالبات النبي المحبوب).. طبعا قصيدة (التمساح) وقصيدة (بالفور والدلك) ياهو دا وقتهم..وقصيدة (طالبات النبي المحبوب) لانو حاج الماحي كان عندو ولدو صغير مات (اسمو المجذوب) وكان وكتين مات أصغر من محجوب لكن مابي كتير .. قام حاج الماحي عمل تعزية ومواساة لي نفسو في قصيدة طالبات النبي المحبوب . يقول فيها
لاتكتب علي ذنوب *** وتعظم أجري في المجذوب.
دايرك تكلم محجوب تقولو أهلك كلهم يمدحو في القصيدة دي:

طالبات النبي المحبوب***قوافل درجن يادوب
يا المنك الرزق مكتوب*** ربا حاشا ماك مربوب
أستغفر إليك واتوب*** لاتكتب علي ذنوب
تعظم أجري في (محجوب)
إلهي بفضلك الموهوب***سامحني القليب مخروب
أكون بي عافيتك مصحوب***عدوي مهما قصد مغلوب
أدوس فوق راسو بالمركوب

معليش طولت عليك سيدي حمزة سلم علي محجوب وقولو شد حيلك وبطل النوم الكتير .. وريهو إنو التاج أبوهو رجع سلطنة عمان وقولو أمك وداد حصلت أبوك وساقت معاها (أنسام)و (أحمد).. حبوبتك نفيسه تسلم عليك .. أعمامك وعماتك وأخوالك وخالاتك كلهم يسلموا عليك .. تقولو أولاد أهلك وبنات أهلك يسلموا عليك وكمان أخواتك وأخوانك الطلبة المعاك في الجامعة كانوا معانا وما فارقونا يوم واحد (ربنا يبعد عنهم ولاد الحرام).

شكرا سيدي حمزة ..
سلام علي كل الشهداء وسلام خاص إلي شهداء بدر وأحد ..
مخلصك عبد المطلب عثمان الننقة……