تاريخ الأطباء المزيفيين

د. أحمد الطيب إبراهيم :

قول واحد :
شنو يعني شابكننا القبض علي طبيب مزيف و اعتقال طبيب مزيف و كأنكم اكتشفتوا الذرة __
ويعني شنو ما زيو و زي اخوانه المزيفين الباقين في زول قبضهم .
زي ما في سيارات بوكو حلال في سيارات بوكو حرام …وفي رتب ضباط قوات مسلحة و في ضباط رتب خلاء ..
.انا شخصيا من خلال تجربتي مريت بي تجارب تفوق العشرين مع أطباء مزييفين لكن ح أذكر منهم تلاتة فقط لطرافاتهم :
التجربة الأولي كانت في مستشفي الخرطوم في التسعينات و كان في نائب اختصاصي جراحة شاطر و وجيه مكسر المرافقات والطبيبات و اليوم كله داخل عملية وطالع من عملية والغريبة يوم واحد ما حصل دخل عملية و حصلت ليه مضاعفات مما يؤكد أنه المضاعفات دي نحن بعلمونا ليها في كلية الطب عشان نعملها للعيانين….و الله اعلم ؟
__ اها في دكتورة حلوة و بنت ناس النوع البجيبوا بالسيارة و يرجعوا بالسواق __ النوع المتخيلة الدنيا كلها باسطة وناس كويسين وطيبين و صادقين …
عموما الدكتور الشاطر و وجيه ده اتقدم لي المزة دي و طوالي الموضوع جاب المأذون و شبك شبك كوستي ربك ….
و بعد شهر من العسل و الدكتورة اتكشفت أنه الراجل لا دكتور ولا نائب جراحة ولا نائب فاعل بل هو الفاعل نفسه ….
و طلع زولنا طبيب مزيف وجراح مزيف لكن عريس اصلي اصلي …
__ و الدكتورة طلبت الطلاق و العريس رفض يطلق وقال الشرع معاه والما عاجبو يسأل دكتور ابراهيم الشرعي ذاتو … و طالب بي تعويض لو داير يطلق ___ لكن يا اخوانا زي ما الحلة فيها عمد وشيوخ حلة المستشفيات فيها برضو عمد كباااار و شيوخ مستشفيات قعدوا معاه يا يطلق يا نمشي نجيب اي مريضة دخلتها عملية و نخليها تفتح بلاغ فيك وفي ابو اهلك
__ و كمان في مدير طبي مفتح و شفت جاب دفتر الوفيات ختاه قدامه و قال ليه ديل كلهم تبعك كدي ورينا المقابر البنسجلها باسمك بتطلع منها برأة كيف …
__ صاحبنا طلق و الدكتورة شالت أوراقها و هاجرت وهي تلعن في بلد المواسير الحتي عرسانها مواسير ..
ومن اليوم داك لو في دكتور اتقدم ليه لي دكتورة مافي طريقة توافق الا تتأكد عن طريق دفعته في الكلية أو عن طريق المجلس الطبي .
__ استمرت ظاهرة الاطباء المزيفيين في ازدياد و مرات بتكون برعاية الدولة نفسها حيث شهدت الإنقاذ اكبر مرحلة من ظهور هولاء الفئة و كان اي اضراب اطباء ينسحب فيه الأطباء و الكوادر الطبية من المستشفيات يتم استدعاء كوادر الحركة الإسلامية من ممرضين و تقنيين و حرس ابواب و يلبسون لاب كوت و يتم ملئ الفراغ الناتج من انسحاب الاطباء المضربين طبعا مع وجود عدد من الأطباء الإسلاميين الكاسرين الإضراب و قد اضرب نواب الاطباء لمدة خمسة وتلاتين يوم سنة 2010 مما ادي الي شلل في الخدمة الطبية تم ملء الفراغ علي مرأي و مسامع الشعب السوداني الكان عامل فيها ما عارف أو عارف وعامل فيها رايح ( و تلاتين سنة ما حصل زول كضب علي الشعب ) …
نفس السيناريو حاولت الحركة الإسلامية أن تقوم به في 2019 لكن التصوير ورفع الصور في الفيس و كشف معلومات الكوادر التي حاولت أن تستعين بهم جعل حتي الأطباء المتخرجين من كلية الطب يبتعدون عن الزج بأنفسهم في هذا المعترك الذي قد يلحق الاذي بسمعتك الطبية و مؤهلاتك العلمية وقد يطول افراد اسرتك و سمعتهم إذا رفعت صورتك الي قروب منبرشات للافادة والتحقيق …—
— القصة التانية حدثت سنة 2013 وكنت وقتها استأجر عيادة بمجمع بشارع الدكاترة امدرمان انا ومع د اسكندر ادم الطاهر اختصاصي الأذن والأنف والحنجرة المعروف ..
اها يوم جاءنا دكتور كبير صلعة و كرشة و عنقرة ما شاء الله …و النظارات و خاتي السماعة في رقبته ..و أجر عيادة في المجمع.
__ الراجل ضايرنا انا واسكندر بي جنبة و استلم المجمع عدلة وقلباء …
والمرضى ديل ماشاء الله شي عربات وشي جايبنهم بالاسعافات وشي شايلنهم بالنقالات …
__ بتاع المعمل اسمه الطيب عثمان قال لي ديل الدكاترة وللا بلاش .. الواحد في روشتة واحدة يكتب ليك خمسطاشر فحص ما زيك اسبوعين حتي تطلب فحص بول عمومي و كمان تتصل علي تقول لي طلعوا سريع …
__ ستة الشهور الصيدليات الجنبنا دواهن قرب يخلص مع النابغة الذبياني الفتح معانا في المجمع ..
__ اها ربك رب الخير مشيت للدكتور ده قلت الراجل ده جارنا و زميل نتونس معاه و نشوف العيادات دي بشغلوها فللي كده كيف ؟؟؟
عرفتو بي نفسي وسألته من تخصصه قال اختصاصي باطنية جهاز هضمي ( الراجل في الباطنية طلع باطنية حُرة ما شاء الله ).
سالته وشغال في ياتوا مستشفي حكومي ؟
قال لي شغال في مستشفي ابن سيناء …
__ والله بختكم يا ناس ابن سيناء جاكم عالم جديد … الراجل شبكني ليك مصطلحات و مناظير و الرويال كوليدج و الامريكان بورد . .. غايتو اخدت بعضي وقلت باقي ونستي اكملها مع اسكندر …
__جيت لي اسكندر وقلت لي جارك ده كتر خيره جاب لي قزازة بيبسي وانت انا معاك عشرين سنة ما اكرمتني بي كباية شاي … ضحك وقال لي الوقت للعمل ..
__ اها طبعا بدينا قطيعة الدكاترة مع بعض وقلت ليه الراجل شغال في ابن سيناء ..
_اسكندر قال لي يا زول انا قال لي شغال في مستشفي المناطق الحارة جهاز هضمي …
__ قلت لي المناطق الحارة دي مافيها جهاز هضمي لكن كدي قوماكا نمشي عليه الاتنين مع بعض نشوف الزول ده حكايته شنو ….غايتو الراجل عصرناه لمن جاب الزيت و نحن جوة و المرضي برة و العيادة لسوء حظه مافيها شباك ذاتو يتخارج بيهو ..
__ قلنا ليه بكرة نحن منتظرنك تجيب شهادتك و تسجيل الاختصاصيين و لو اتاخرت حنجيب البوليس و نجيك …
و من اليوم داك ما ظهر و لا فتح تلفونه ولا عرفنا عنوانه لكن لي يوم الليلة في مرضي بجوا يسألوا من الاخصائى بتاع الباطنية الشاطر الكان هنا في المجمع و كلمنا السكرتيرة تقول ليهم هاجر استراليا …
__ هي السكرتيرة لو قالت ليهم طلع مزيف ما كان دقوها بعد الدفع الرباعي الدفعتهم ليهو.
التجربة التالتة :
ودي احلا واحدة فيهم :
كنت جراح عام في رجل الفولة كردفان و معزوم غداء في عرس واحد من أعيان البلد فجأة جاء واحد بنادوهوا الدكتور الدكتور …
و سلمت عليه كيفك يا دكتور واخبارك و صحتك …و اتغدينا و شربنا الشاي وبقينا علي القهوة قلت اتونس مع ابو الزمل شوية في الخلاء ده كان نتذكر ايام كلية الطب و مآسيها …
اخدته بي جنبة وقلت ليه انت اتخرجت من الخرطوم وللا الجزيرة وللا قريت برة السودان .. الراجل كبير احتمال يكون قبل جامعة الجزيرة نفسها …
__ ضحك وقال لي اتخرجت من جامعة ام (دور ور )..
ام دور ور ده سوق متجول في كردفان كل يوم بيكون في حلة … و بيرحل مع العرب الرحل حسب المواسم ..
قلت ليه كدي احكي لي ..
__ قال لي اصلا انا قريت لحدي أولي ابتدائي بس و شغال تاجر بتاع (ود المعََلق ) يعني ببيع عراريق و جلاليب في سوق ام (دور ور ) و جنبي مساعد طبي برضو بفرش دواء في الأرض جنبي و سوقه حار شديد …
الراجل مشي مشوار خلي بضاعته جنبي جوا مرضانين وهو مافي طوالي كشفت عليهم هم و أطفالهم و اديتهم بندول و كلوركين وشراب كحة و فتامين المهم اي حاجة اديتها منهم شوية شوية…و حاسبتهم بي قروش خيالية و فاتوا…
__ المساعد الطبي لما رجع لقاني بعت نص الدواء و قسمت معاه المبلغ و مشينا ..
__ اسبوعين انا فارش العراريق من هناك شايف الجماعة العالجتهم جايين بي جمالهم و السيوف مدروعة في السروج …اقسم بالله قلبي رقد موية واتشهدت وانتظرتهم …قلت بيكون شفعهم كلهم ماتوا ..
_ بركوا جمالهم وجوا قلدوني سلام تقيل …الدكتور كيفنك و كيف حالك و كتر خيرك يا دكتور العيال ما شاء الله نصحت تب و جبنالك تاني عيانين ( العلاج يا اخوانا ما نفسيات ).
__ قلت ليهم ياهو داك الدكتور الكبير أشرت ليهم للمساعد الطبي ..
__ قالوا لي حرٌم دكتور غيرك ما يعالجنا ويعالج اهلنا.
المساعد الطبي غمز لي بي عينه و كشفت عليهم و جيهتهم ليك تاني ..
__قلت ليه و اها بعدين ؟
__ قال لي اها شنو يا زميل … من اليوم داك انا ركبت معاكم في سرج واحد و احتمال كبير اكون اشطر منكم .
__ ضحكت وقلت ليه كضاب ما بتركب معانا في سرج واحد لي يوم الدين ….الا لكن بلعت ضحكتي يوم شفت قائد الجيش بحيي في حميدتي
__ نيابة عن أطباء السودان انا بطالب بدمج الأطباء المزييفين في وزارة الصحة والمجلس الطبي و أعطاهم و ظائف حسب اتفاق جوبا و في حالة رفضهم الدمج اعتبروني منسحب من الاتفاق الإطاري و نواصل كده عسكرية انتقالية والما عاحبوا الفورة مليون .

و دمتم سالمين

د احمد الطيب إبراهيم
استشاري جراحة الكلي والمسالك اليولية