حكومة عيد الحب

علي الكوباني :

البغلة في الابريق
الناس في انتظار اعلان ربيع حكومة (عيد الحب)
وما تنسوا كمان جابت ليها تفرعن وابراز عضلات من مجلس الشركاء(المشكوك اصلا في نسبو) وإصرار شديد على عصر حمدوك لاعلانها حتى بدون الوزارات المختلف عليها..(امكن عشان يذكروهو لمن كان رافض تماما وحردان..وبعدها ما قال لينا انو وافق على مضض).. غايتو العصر البعصروهو لحمدوك ده ( العسكر والاحزاب) من البسوى وما البسوا (سمسم ام روابة ما اتعصرو)
المهم جاياك (حكومة محاصصات يا وطن..)كيييف يا منقة.. شغل شركاء من مجاميعو(قوقو..وقرب صدرك المرحوم قدرك..ومرايتك حقت عربيتك علينا..والله كتلا..واصطبر)
أجي يااا الماك دريانة واعصابك تلفانة ياااخ دي حكومة عليك أمان الله.. (بأحزابا..ومساراتا.. وباقي كفواتا..وكمان بحركاتا)..
غايتو ما طالبني حليفة لكن قبيل انا في المشرحة واحد من الميتين من المفلقصين ديل قال لي الدولار فات ال400 (اه يا الاهيف)..والغريبة نحن حتى الميتين ديل ما سمعنا البروف رئيس اللجنة الاقتصادية قال شي ولا حكى مع انو بحب المايك جدا… يكون من (الطيارة وللا من قطر)
# يا اخوانا دي مصيبة شنو الوقعنا فيها دي
# المافي شنوو..(حكومة جهبوذا.. وكمان بي كوزا..وقال المالية بضراعي لي محجوذا)
پِسسس