رفع ( الهم ) …

الطيب عبد الماجد

أتفهم عندما يقدم النطاسي البارع والطبيب على إعلان قراره الحاسم
بضرورة التدخل الجراحي لإنقاذ حياة المريض رغم صعوبة القرار ….

وهذا تحديداً مايدور في ذهن صناع القرار الإقتصادي عندنا فيما يتعلق بالمضي قدماً لرفع الدعم لأن النظرية الاقتصادية نقول إنه يرهق كاهل الميزانية ويكبل الحكومة والشعوب ولا يجعلها تنطلق إلى فضاءات أرحب

دا كلو كلام جميل ….

لكن هذا المريض لما يكون ضغطو عالي والسكر عندو مرتفع ويعاني نقص حاد في الدم والحديد
يكون القرار بأن حالة المريض لاتسمح بذلك وترجأ العمليه لحين تهيئته …

وهذا بالظبط ينطبق على السودان والمواطن السوداني
والذي ينوي عرابو الاقتصاد تطبيق هذه النظريات الاقتصادية وروشتات الصناديق الدوليه عليه …

وبغض النظر عن صحتها من عدمة

نحن نتحدث الآن عن مدى ملائمتها والتوقيت

ناس ياخ تعاني الأمرين في سبيل توفير الضروريات
دعك من الكماليات مع عدم توفر كثير من السلع الأساسية
وغلاء طاحن ومداخيل ضعيفة لاتذكر …ونسبة بطالة هي الأعلى في المنطقة …
وتتحدثوا عن رفع كامل للدعم في بلد فيه المرتبات قياساً بالدولار مخجله وضمن الأقل في العالم …

ماهو الدولار دا ما بوقفو من الزياده الا دولار زيو ….
دا كلو كلام ساكت …
يعني هو ليه برتفع قدام جنيهك دا …؟؟
لأنو ببساطة جنيهك هامل ما عندو قيمة
القيمة بتجي بالإنتاج ..ومافي انتاج …
عشان كدا مافي دولار ….وبالتالي النتيجة الحتمية إنو الدولار حيرتفع حتى لو حاولت تحوشو ببعض الإجراءات …..
نحن نتحدث عن المعادلة النهائية ….!

إنت كحكومة متضايق لأنك بتشتري جالون البنزين على سبيل المثال بي عشرة جنيه والمواطن بشتريهو بي ستة جنيه وأنت تتحمل الأربعة جنيه دي ….داير ترفع الدعم وما تدفع الفرق دا لأنو قلت بهلك الميزانيه …..!!
طيب كويس ….
السؤال ….!!! خليك من الرفع الأخير الناوي عليهو دا
إنت لما رفعت قبل كدا

مش كان في فرق وفرتو ……..!!

مشى وييييييييييييييييييييييييييييين !!!!!؟؟؟؟؟؟؟؟؟؟؟؟

ماهو الأسعار ماشه زايده …والقوة الشرائية ماشه ناقصة
إذا كنت أنا كمواطن بشتري رطلين لبن حأضطر أشتري رطل واحد لأنو ما بقدر …
يقومو ناس ( شركة اللبن ) عندهم واحد من اتنين

إما يزيدو سعر اللبن لأنو الكميه البشتروها الناس نقصت
أو ينقصو الإنتاج وبالتالي ينقصو حتى العماله وبالتالي
عاطلين جدد ……
دا على سبيل المثال وعلى ذلك قس ….!!!

معناها إنت القروش الوفرتها من رفع الدعم ما وديتا
للإنتاج….سديت بيها بعض ( القدود ) البتجيب هوا

دا كل الحصل ….!!

وهسا الفرق البتوفروه من رفع الدعم دا برضو ما حيمشي لي إنتاج حقيقي بجيب دولار حقيقي عشان يقيف ترس قدام الدولار ….!!

لذلك برضو حيستمر نفس المسلسل ….

المشكله الان مش في هذه الروشتات الدوليه ولا
موضوعيه الطرح …!!
الأزمة في عدم وجود خطط واضحة
للتنميه والبناء والإنتاج

حتقول لي والله نحن بندفع مليار دولار
دعم للمواد رايحة ساكت كان ممكن نستفيد منها في حته
تاتيه عشان كدا حنرفع الدعم عشان نوفرها ……!!

واقع الحال يقول لاخليتوها للدعم ولا استفدتو منها في حته تاتيه

نحن قاعدين هنا مهمتنا نكلم الشعب دا ونوريهو
زي ما انتو بتعملو تنوير بي دواعي ومسببات وموضوعيه رفع الدعم

نحن بنقول ليهم إخفاقات وعثرات الحديث باسم رفع الدعم
….
ونذكر مره تانيه المشكله مش رفع الدعم كسلوك اقتصادي بحل ليهو مشكله

الأزمة في زول قالو ليك عندو فقر دم
وانت دايرو يتبرع بالدم كقيمة انسانيه عظيمة
دي المشكلة ….
…..!!

أعي جداً وأفرق بين العاطفة والواقع وبين ضرورة إتخاذ القرارات الصعبة أو دفن الرؤوس في المال
لكني في المقابل أعي وأعلم واؤمن بدراسة حالة المريض ( السودان )
وبشكل حصيف وموضوعي وإنساني وعلمي
وبعدها نحدد العملية

الجراحة والكي هي اخر مراحل العلاج…..
الزول الدايرين يعملو ليهو عمليه بشاوروهو ….
ونحن للاسف مجلس تشريعي تشاورونا فيه ذاتو ماعندنا
عشان كدا متجدعين فينا

…
مثل هذه الاجراءات بحب أن تتم على مراحل وجدول زمني واضح وفي إطار متابعة وتقييم متواصل لآثار القرار وتبعاته على مجمل الأوضاع وبمشورة الشعب ….!!

ليه بتفاجئونا دايماً بالقرارات خاصة الصعبة دي
لماذا نحن آخر من يعلم
اين هي النقاشات المجتمعية التي تسبق ذلك هو الاعلام دا ( نشرة تسعة ولا شنو )

مثل هذا التوجه يجب ان تسبقه تهيئه للرأي العام وجداول زمنية
ونقاشات مع الناس …!!
مش ممكن تلقو آراء من الشعب الشايفنو مسكين دا تقيكم شر القتال وبي افكار خارج الصندوق

الافكار التقليديه بتاعة نرفع الدعم ونمشي نتدين من صندوق النقد دي اسهل حاجه

هل درستو الإجراءات والترتيبات الأخرى المصاحبة والمترتبة على هكذا قرارات

وينو هو الشعب البترفعو عنو ميه في المية دا
اي ظهر هذا الذي يحتمل كل ذلك ….!!

وخلونا نتحدث حديث علمي اقتصادي

هل قرأتم مستويات الدخل للناس على كل المستويات ونسب البطالة!!؟

هل لديكم احصائيه متكامله عن العاملين في القطاع العام والخاص ومن هم بلا عمل والنازحين وسكان المعسكرات !!؟

هل راعيتم الترتيبات والإجراءات التي تنسحب على
المواطنين وكيف يتم تعويض الفئات الضعيفة وهي
تشكل النسبة الأكبر

ماهو ( بتاع الدرداقة ) حيزيد اجره ( وليهو حق )
لأنو ما حيقدر يعيش لانو القدامو زادو

الأهداف لرفع الدعم معلومة لدينا بالضرورة
ولكن هناك فرق بين النظرية والتطبيق وظروف وملابسات تطبيقها …

وهل استصحبتو تجارب الدول الاخري في هذا الجانب

أنا أعي صندوق النقد الدولي جيداً واتابع قروضهم المليارية لمصر وتونس وماينجح في مصر ليس بالضرورة
ان ينجح في السودان

لما تعملو خطط انتاج واضحة وقابله للتطبيق
وتدونا نماذج صريحة لذلك
نشوف بعدها قصة رفع الدعم وصندوق النقد او غيره من الصناديق ….!!

إنتو ليه بتتجاوزوا هذا الشعب ….
الشعب دا لما عمل ثورة وضحى من أجلها عشان يكون لاعب رئيسي في معادلة الحكم وليس متفرج ….!!

نحن صوته وسنقولها صادحة نخطئ أو نصيب دي اجتهادات لكن مخندقين معاهو للنهاية
فرجاء لا تتجاوزوهو …

وكلمه منك حلوه كنت مستنيها للأمل والسلوى من زمان راجيها …..

ننتصر ….أو ننتصر ✌️