( عزومة ) والناس (مظلومة)

الطيب عبد الماجد:

يوميات علوب

ناس عمك ( مضوي ) عازمننا فطور رمضان !!
عازمنا ( أشرف) ولدهم دا قرا معانا الجامعة

ولا اتسحرنا ليلتها ….الفطور القبلو ذاتو أكلنا خفيف
استشرافًا لهذا اليوم المجيد …..

ناس ( مضوي ) ديل ( ضحاكات ) الدنيا والعالمين
هم تجار قديمين كدا لكن طورو تجارتهم دي وعملو ليهم كم مصنع كدا ما عارف ( شعيرية ) و ( مكرونة ) والقصص دي …….!!
المهم القروش ( رز )

هم جذورهم اصلاً من خارج المدينة لكن بحكم الدولار ساكنين في قلبا …
بيت ذاتو عجيب ….!!

المهم معزومين أنا و ( جعفر ) الشمشار و ( ود الحاجة )

( ود الحاجة ) عندو تعاون تجاري معاهم …..

( بورد ليهم عماله مرات بحكم علاقتو مع العطالة ) …..!!!
ومعانا برضو منتصر ومعمر ……
نعد في الدقايق من الصباح زي الحكام …
متين يا المغرب تجي … !!

( زي عضة ناس ( مضوي ) دي بتمشينا لحدي نص رمضان ؛ ….!!

يازول فعلاً جاءت ( ساعة الصفر ) واتحركنا قبل وقت كاف تلافياً لمفاجآت الطريق …!

( أنور ) ما معزوم لكن ( الأمجاد ) بتاعتو أهلتو للنهائي دا سايقنا بيها التقول ماشين عقد …!!

وصلنا قبل المواعيد بي نص ساعة كدا …. قلنا عشان ما يقولو الجعانين ديل جايين من وين …!!

لاقين حول المطار زي ربع ساعة كدا فضينا البنزين وعملنا ( لاندنغ ) …

وقفنا ( الأمجاد ) دي بعييد ….على العليها الباب ما بقفل
قال طقشتو الركشة ….؟! جعفر قال لي وين أسياد اللواري

المهم بعد داك جينا هاجمين ليك والشوق دفرنا ….!!

أول حاجه في زي تلاته كدا خاتين كراسي قدام البيت
الظاهر ( تأمين ) …!!
والله ليهم حق ..ناس ( مضوي ) ديل أهم من الماليه الساكا قروش الكهربا والموية دي …حتى الميتين لحقتم …
( ديل بكونو قالو أي حاجة هناك )

واحد فيهم قال لينا أهلًا وسهلاً….عايزين منو ..!؟؟

( ياربي قايلينا شحادين ولا شنو …!!)

( وأنا القميص كاوياهو لي ( مشاعر ) مرتين ) …..!!

طوالي انبريت ليهو قلت ليهو ( عزومة ) يا …
( بي نهرة كدا )
( منتصر ) براحة كدا قال لي معمر عزومة عرفناها ….
( يا ) دي شنو ….!!؟؟

( سمعتو لكن هسا مافاضي ليهو العواليق دا ) …!!

بتاع السكيورتي قال لي العازمكم منو …!؟؟
قلت ليهو هو تحقيق ولا شنو …
نادي لينا أشرف..

المهم ربك رب الخير ( أشرف )ذاتو في اللحظة دي جا داخل بي عربتو الما خمج …!!
ونحن اتنفشنا ليك قدام الحرس ….التقول شركا معاهم في المصانع …..!!

المهم اعتذر لينا كدا إنو كان في مشكله في مصنع
الصلصة لكن حلاها …!!

( هو انتو بالله برضو عملتوا مصنع صلصة ….)
( سبحان الله )

( نحن عندنا مشكله مع العلبة ذاتا )
….
( ود الحاجه ) طوالي دخل في الموضوع قال ليهو آي كلمني ( مصعب )
( مصعب دا اخو أشرف الكبير ..)

تسمع كلمني دي تقول بتناقشو في الميزانيه
أكيد داير عمال للمصنع …..!!

المهم إتفضلو إتفضلو دخلنا …..
يازول النجيلة دي مغطيه المكان وخدرااااااا
( مؤكد دافعين ليها ) …..
عندنا بتقوم براها …عشان كدا بتتنهر فينا …
مزعطة ومنتفة والبعوض بنزل فيها ويقلع زي (الميراج ) 🛩……..عاملا مطار
ومرات بالنهار شدة ما البلد هامله…..!!!

المهم مشينا مسااافه كدا …شجر النخيل الأملس داك
مرصوص بالجنبات زي الحرس ….

أنا ما عارف علاقتو شنو بي القروش الشجر دا
أصلو مالقيتو يوم لافي في الشارع …. بقوم في البيوت الزي دي بس …!!

( ياربي ( اشتراك )

قالو دا ( جوز الهند ) …!!والرويال

( والهند علاقتا شنو بالسودان ..)
صحي العصر بجيب الزيت ……!!
( مضوي رقصو هندي )

المهم أخيرًا وصلنا موقع النزال …

يازول لقينا حلتم دي كلها هناك ….
أتاري دا فطور أهل ناس اشرف ديل جو من أي حته ……سبعة وأربعين نفر كدا …..!!
( عمم تقيلة )

جعفر قال لي طيب ماكان نفطر في الجامع ……
مع احترامنا لي ( حلتم ) يعني نحن دخلنا شنو في الموضوع دا …
( أهل مع بعض )

( منتصر ) طبعاً ابو الحساسية والذوق قال خلاص
يا جماعة الدنيا رمضان مافي داعي للكلام يا أخوانا …..
إنتو جايين عشان الأكل…..!!؟؟؟

والله سؤالو دا ضحكنا ضحك …!!

جاييين لي شنو يعني ….!!!؟
نشوف الانتاج ماشي كيف في المصانع …..!!
حاجة غريبة والله …

( معمر ) ولا دساها ….قال هو ما بفطر في جوطة زي دي وطبعاً الصلاة بتكون قبل الاكل ….هو طوالي حيمشي على الأكل…..!!

فعلا هم مجهزين ليهم جامع متحرك كدا باقي ليهو المئذنة
السجادات ترقش مرصوصه كيف
والإضاءة…..وأي حتة فيها ماسورة للوضو

( غايتو إلا تكون مابي براك ) ….!!

يازووول شغل مساحات … القروش دي ما سمحة ….

المهم فعلا الآذان أذن ..أكلنا التمر وتوجهنا للصلاة

وانتهت الصلاة وقالت كدا ( العصايد ) دي نزلت
و ( الملاحات ) وسلطة الروب والطعمية
المهم كل الأكل الشعبي بتاع رمضان داك ….
قالو حاج ( مضوي ) قال دي أجمل ليهو ليله في رمضان
بتلمو فيها الأهل وبياكلو الأكل الأصيل بعيد عن ( المشاوي ) و ( الكبد ) و ( الفراخ ) والكبد والكلام الفاضي دا

( الغريبة نحن جايين للكلام الفاضي دا )

(جعفر ) قال غايتو عمك بالغ …..!!
ما لقى الا يتشهى فينا نحنا …
كان يكلمنا ….أقسم بالله نجيب ليهو عصيدة بي ستة ( ملاحات ) ……..وهو يورينا بضاعتو …!!

( ودالحاجه ) قال أنا لو عارف كدا ولاكان جيت
من البيت يمين الحاجه عامله ( نعيمية ) أخت الموت
قلت ليها دي خليها لي بكرة ….. الليلة نحن ناس
( ضان ) بس …..!!
يمين طلعنا نحن ( الضان )

( منتصر ) طبعاً مستاء منناً وتعليقاتنا دي
قال يا اخوانا الكلام دا عيب والله الناس في رمضان ما بتقول الكلام دا ….!!!

من الزهجه قلنا ليهو ( بنقول ) ….!!

المهم ولا شاركنا ذاتو …… عصيدة وملاح بتاعات شنو
ما كل يوم مدورين فيهم ….الجديد شنو يعني

المهم إنتهو من ( عضتم ) دي وقعدوا يتقالدو …..
ونحن في النص زي الدراويش ( أشرف ) بجينا مره مره مشغول مع أهلو ديل …!!

بعد شوية قالو ننتقل لي المكان التاني …!!

( البيت ما وسيع عاااادي ممكن يستضيف سيكافا )

فعلا مشينا بهناك ..جو سبعة مداحين كدا بي طاراتم ودورو ليك مديح ….!!

( عمك ( مضوي ) داير يتشرط من الفرح ) …

( أهلوا والعصيدة والمديح ……).
قفل الدنيا …بفتح في الآخرة

ونحن استغفر الله …دنيا مجهجة ….والآخرة ذاتا مع مشاغل الدنيا ما مدنها حقها …….نطير وين ما عارفين ……

المهم يازول أول مره تكون عندنا قرارات سريعة
عملنا إجتماع أزمة صغير كدا ..وصوتنا بالإجماع على ضرورة المغادرة … من هذا الوضع المؤسف

( منتصر امتنع عن التصويت )

قلنا لي ( أشرف ) ماشين نصلي التراويح في جامع بعيد شوية مواعدين لينا شباب هناك عندنا تمرين بعد الصلاة فنستاذن ….!!

المهم شكرنا على الحضور ……(الله لا شكرو )

فاتح نفسو كمان قال يا اخوانا في شاي لبن ظرييييف ومعاهو لقيمات …أشربوا معانا واتوكلو

( خلاص يعني الود جاب التايهة )

( جعفر ) بالزعل قال لي والله لو داير نجيب ليك لقيمات من هسا للصباح نجيب ليك …وعاين لينا كدا
قال يا اخوانا نحن نمشي بالطريقة دي الموكب بفوتنا

( أشرف ) طبعاً ما عارفو قاصد شنو …و ( معمر ) دا
بشرب ليهو في مويه بخخخخخخ بخاها ليك من الضحك ….
طلعنا بره ولسه بضحك … قال لي ( جعفر )
بالغتا ياخ احرجتا الراجل …!

قال لي انا أحرجتو في ( اللقيمات ) …هو أحرجنا في الصينيه كلها …!!
هسا لو كان الفي بالنا والخرفان المشوية دورت ….
و( البسبوسة ) و ( أم على ) و ( العصاير الفريش )
ما كان كتمناها معاهم للسحور …!!

وخرجنا من الغزوة دون غنايم ……مغلوبين تلاتة صفر
نتلبد زي الحراميه لما وصلنا ( الأمجاد …..)
( ود الحاجه ) قال لي ( أنور ) وكت أصلا هي باظت واتقدت فحط بالأمجاد دي كتح بتاعين الأمن البره ديل
يحققو معانا ويستفسرو تقول البوفيه جوه مفتوح
كتحم طوالي ….كتحم البلا ….

( جعفر ) قال هسا لو أدونا حقنا ناشف أكياس ( شعيرية ) و ( مكرونة ) ما كان أخير لينا من البهدلة دي …..!!

( ود الحاجه ) قال هو ما مزعلاهو حاجه غير إنو بتكلم مع واحد من أهلهم ديل …قال ليهو في ناس من الحله شغالين في مصانع عمك دا ..!!؟
قال ليهو كيف ياخ ….وسبحان الله هسا معانا هنا عشره
دايرين نشغلهم ….!!
قال لي ضربوني في اليتيمة …
معناها الشهر دا نضيف ….. لقيمات وعدم توريدات ..

( منتصر ) قافل مننا قال للأسف يومكم دا ضاع ساكت
( جعفر ) قال ليهو يومين لو سمحت ……
من أمبارح نحن عاملين حساب العزومة دي ناكل بطرف أصابعينا …..
هم القروش دي حيشيلوها معاهم يوم واحد ما دايرين يمتعونا …..!!
أصلو الناس الغنيانين ديل ما تقفل عليهم …
بعوقوك بعوقوك ..الناس عمرا دا كلو تكسر ليهم في التلح
راجين الأحد….!!
لا الأحد بجي ….والتلج بسيح …..!!

غايتو ما مضحكني إلا ( معمر ) راكب جنبي ونحن راجعين
يازول العمة والجلابية وعصاية كدا
قلتا ليهو إنت هسا مخمخم كدا لي شنو …!!؟

هو لذيذ كدا قال والله يا ( علوب ) قلت في الفطور دا
الاقي لي بتاع مصنع مصنعين نطلع منهم بي صفقة
…
هو بتاع ( كمبيوتر ) و ( سوفت وير ) وما عارف ( الأمن السبراني ) والقصص دي ..وشفت منقطا

قال لي بتونس مع واحد من الحضور ديل قلت ليهو أنا ( معمر الشيخ ) مهندس شبكات
رد على قال لي أنا ( حسان الإمام ) عضو لجنة ( البير ) جايين لي ( مضوي ) دا يدعم المشروع …
قال لي بالزعل قلت ليهو ( البير ) دي ما دايرين تبرمجوها …

قال لي لحدي هنا كويسين وهو بتكلم معاي جا واحد سلم عليهو … فااااات معاهو ولا قال لي انت بتقول في شنو ….

قال لي لقاني تاني في المديح ..قال لي إنت زول الشبكات قلتا ليهو آي…قال لي عليك الله تلفوني دا شبكتو طاشا رجعا لي
قال لي شلتو منو طوالي ( شفرتو ) …..!!

ود الحاجه راكب قدام في الأمجاد يسمع فينا ….مات من الضحك ….عندو ضحكة بجرها كدا …..
طوالي قعد يغني
نيرانو ولعتو…..هتافي سمعتو …
موبايلو شفرتو …كنداااااكة …..

والجماعة كلهم يشيلو وراهو
يازول ضحك شديد رغم الجوعة ……..!!

والأمجاد تعود بنا أدراجها إلى الحلة ….بعد أن خسرنا
مباراة فاصلة كنا نعول عليها كثيرا في الصعود…!!
لكنها الأقدار …..
( مضوي ) ضوا لي نفسو ….ولعب في أرضو وبين جمهورو ….!!
التحكيم فاشل …ورمضان كريم …
الله غالب …

تصومو وتفطرو على خير

رمضان دخل خط ستة