إلى رافضي تنفيذ عدم تجديد حبس معتقلي لجنة إزالة التمكين

هشام علي ود قلبا:

ماهر سعيد
محمد الأمين حسن
خليفة أحمد خليفة

وكلاء النياية والنائب العام ، الرافضين تنفيذ أمر القضاء بعدم تجديد حبس المعتقلين المحتجزين الآن إحتجاز غير مشروع من أعضاء لجنة تفكيك النظام المباد.

أخدوها نصيحة مني .. شخصي الضعيف مريت بنفس تجربة الشرفاء ديل .. رئيس (نيابة أمن الدولة) في العهد المباد (بابكر عبد اللطيف) إستقوي بالمخلوع وأبقاني في الحراسة بنفس ممارستكم الغير قانونية دي ورفض تنفيذ كذا قرار قضائي بعدم تجديد حبسي لمدة سبعة شهور ونص ، ودي مدة أكثر من أي مدة قانونية لأي بلاغ موجود في القانون .. وفي النهاية ربنا أكرمني وفكت قيدي الثورة .. الان هو بين أيادي الله وأنا الحمد لله حر طليق وما عافي ليه.

نصيحتي .. لو فيكم زول ضامن يعيش لحدي بكرة واصلوا في البتعملوا فيه ده مستقوين بحميدتي .. وابداً مافي مشكلة ، الشرفاء ديل راكزين والنتائج مضمونة ثقة في الله عز وجل .. إن بقيتوا أحياء دنيا الثورة حتكسر قيد الشرفاء ديل زي ما كسرت قيدي ، وحتتحاسبوا في الدنيا ، وإن فارقتوا الحياة برضو حتتحاسبوا حساب أعسر من حساب الدنيا لأنه أمام الله عز وجل ، وربنا ما بظلم مخلوق لمخلوق.

ما بقول كلامي ده إستجداء ، وإنما عن قوة وقناعة تجربة مجرب .. والعاقل من أتعظ بغيره.