زول ظريف

جعفر عباس:

لما أكون زهجان بفتش على يوميات علوب وخلال دقائق أكون برفس من الضحك، الله يحفظك ويحفظ لينا قلمك يا الطيب عبد الماجد)
كان معانا واحد في الجامعة اسمو ( الحبر ) …..البسمع ( الحبر ) يقول إمام الجامع …!! ( إسم وقور صاح) أها ( الحبر ) مرمط الاسم دا في الواطة دي.!!! ( محبرة وانكشحت …)، هو زول لذيذ شديد …وبقول: أنا الجامعة دي ما في شي جابني ليها غير البنوت ديل! قال هو من عشاق الجمال ! وبي أدب ….!!مرات بقول شعر ….!! مرات بجدع دوبيت ….!!! وأحيانا قف تأمل ….!! وصراحة نظرتو مابتجلي …وعينو نجييييضة …!!كنا مرات بنستدعيهو عديل كدا إذا حدث خلاف قانوني في تقييم إحداهن …!! نقول لي فلانة دي هسا سمحة ولا الحاصل شنو…!! يعاين ليها كداااا وبدينا النتيجة …..!! ( في ملاريا ولا مافي…!! ) بعدين حافظ البنات السمحات ديل في الجامعة أكتر من المقررات …!! وفِي كل الكليات..!! ( الحبر يعتمد اللامركزية نظاما للحكم هو أصلا بقرا ( اداب ) قال لي أنا كان رغبتي هندسة بس خذلتني الرياضيات ….!!.،….( إتخيل ليك منظر )قال لي كنتا شاطر فيها شديد لحدي ما ظهرو ناس ( س ) و( ص ) ديل …إتعقدتا منها شوية …..!! ولمن دخلنا في ( المربع) ( وشبه المنحرف) أنا ذاتي انحرفتا ، أها لمن ظهر ( جيب التمام …!! قال بديت اقنع واليوم الأدونا فيهو نظرية الاحتمالات عرفتا إنو أنا إحتمال كبير أجلي فكرة هندسة دي أصلا .. لحدي ما وصلنا ( جتا ) و ( جتا٢) الواطا ضلمت ويووووم الظهرت ( ظتا ) طوالي ( شتتا ). قال لي إنتا ( جتا وظتا ونق ٢ ) ديل شنو هن؟ إنس ولا جن ….!!! نقعد نستنا ( شبه المنحرف لحدي ما ينحرف رسمي … ونشارك في الجريمة دي …..يفتح الله ….!!! طوالي اتخارجتا …المهم الله جابني ( اداب ) ( الحنينة ) دي ….!! هسا لو ما ( اداب ) دي ذي ( سلافة ) دي كان نشوفا وين ..؟ وصدق الحبر ) …!!! ( كلنا سلافة كان اسمها سلافة الزرافة …) أطول من العميد ……!!! سماحة قاطعة ….وبعد دا كلو ظريفة …..تضحك مع أي زول زي المضيفة…!! وأي واحد بتخيلا ضحكت معاهو حصريا ويرجع مبسووووط ….!!! اها دي سلافة الفن ….! بت زي المطرة تهطل علي الجميع
المهم الحبر حافظ البنات السمحات الفي الجامعة ديل حفظ ….!!
يقول ليك ( هويدا ) بت صيدلة …( وسحر ) بت هندسة ….( أماني ) بيطرة …وسعاد بت القانون …اها ( سعاد ) دي كمان كتاب برا …!! جاية من حتة بعيدة كدا في السودان الكبير دا ….لكن بالله الحق وقفت ليك بنات ( المنشية ) ديل في حدودن …!! سماحة اصلو مامعقولة …مرات بتلبس توب …!! كرهت ليك البنات التوب ذاتو …..سامنها وكيل النيابة الاعلي ….!! ( حلا ووقار وبهناك كمان ( إنتصار ) أيقونة إقتصاد …..!!
إنتصار دي كمان نااااار…… الحبر قال: إنتصار انتصرت للحق والفضيلة والجمال …مفروض يعلقوها في مدخل الكلية ويدفعو ليها راتب ….!!!
والحبر ) عندو ( مسادير) في البنات ديل …لدرجة إنو نص بنات الجامعة عندهن خبر بالقصة دي …مره قال في ( سحر ) بت هندسة دي:
سحر سحرتنا بي ديسا وجمالا الهادي/ وسحر كتلتنا خلقه لمن هناك بي غادي/ وكت الليل يجن…! والجامعة ليا تنادي/ ما بسمع غير سحر …!! ساحراهو جوه فؤادي
وقال: في سعاد مابقدر أقول مسدار/ سعاد اللبن الحليب بالرقاق الحار/ سعاد كاتلاتا ) رقة وسماح ونضار/ سعاد ( الزيت ) والزيت تحرم عليه النار
أها نوع الكلام دا بعجب البنات…!! فبقن يتقربن من ( الحبر )
كان يجدع فيهن مربوع ….ومن حظيت ….!!! عبرت.، الحبر بقي زي الزين …..!! مكتول في حوش الجامعة تنتظره الحسناوات ليقول كلمة والبنضم فيها الحبر …ذي الجابوها في غلاف ( سيدتي ) يذيع صيتها …!! وترتفع إسهمها ….!! ويتردد صداها في ردهات الجامعة
أها لمت ليك فيهو ( وعد ) ودي شهادة لندن ….إسما ( وعد صلاح ) شوف الأبو ذاتو إسمو منو …!!؟ أها ( وعد ) …. اللسان من الانجليزي لما معووج …وهي خدورية ولذيذة كدا …!! كل يوم لبسة جديدة وهي مع ناس ( الحبر ) في اداب ….!! علي الانجليزي العليها دا…!! ماخدة فرنسي وروسي ..( ابو الزفت ) ( التلاته في مجلس الأمن ) ( ذي ذي عادي بكون عندها حق الفيتو ) !!
( الحبر ) قال لي أول مادخلنا الجامعة كان بتحكي لينا أفلام كدا حضرتا بالإنجليزي ….وبي نفس ( الاكسنت ) بتاع الخواجات داك ونحن الوكت داك جايين بي ( برزنت كونتينيوس تنس .وبرزنت بيرفكت كونتينيوس تنس . تعبو فينا ساكت ستفونا ( قواعد ) وخلو الانجليزي …
المهم قال لي هي تحكي ونحنا مافاهمين ولا حاجه أول ما تحكي حاجه مضحكة في الفيلم بنضحك معاها ….!!! نشوفا صرت ..بنصر ….!!! الغريبة قال لي كانت بتقول لينا اسماء الأبطال ديل عشان تحفزنا نحضر الفلم قايلانا بنعرفم …!!! قالت ( كاميرون دياز ) روعة الأداء في الفلم الأخير؛ واحد صاحبنا اسمو ( التاج ) متفلسف كدا قال ليها ماغريبه عليهو دايما أدوارو متميزة ، كاميرون دياز طلعت مره التاج أسبوع غايب من الجامعة ….!!!،
أها( وعد ) قالت لي ( الحبر ) قالو بتقول شعارات، قاصدة الشعر والقصايد البقولا ( الحبر ) دي …!! دي معناها لو دايرا تقول ( مسادير ) … نجهز أنبوبة الأكسجين بس ….!!! مافي حل …..!! حتفقد سوايل …….( الحبر ) طبعا لو مالجامعة هو ووعد دي الا يتلاقو صدفة في الاستوب ……يازول حسا ليك بي عظمة قال ليها …..!! أيوا بقول…!! ويا السمحة خاتي القول …!! عليك الله اتصلح ما تجيب جنس الكلام البفلق دا …..هي ( وعد ) دي …الشعر قالت شعارات …..!! شابكنا خاتي ….!!! وبعاتي …!! داير تكتل البت …صاح ..!!!
المهم ( وعد) بقت لو ما لاقت ( الحبر ) ما بترتاح…!! ونحنا مستغربين في العلاقة بين التيمز ونهر الدندر دي ……يازول خلت الورا والقدام ….!!! بس مركزا ليك مع ( الحبر …) والحبر يتجرجر ….( ليلة القدر وجاتو) لقيناها تشرب معاهو في الشاي في كافتيريا (ضاربه ) كدا جنب الجامعة اسمها كافتيريا (العائلة السعيدة ) غايتو أهلها كان شافوها قاعدة هنا كان نفضوها ….!!! كويس إنو شاي….!! دي لو أكلت كان اتسممت وسجنو الحبر
الحبر ) قال لي ( وعد ) دي زي بت ( ام لعاب ) سمحة ومتمرة الا ما طاعمة ……
خلينا مع القمري السوداني الأصيل البقوقي دا …بنات يشفقن
….!!! سلافة بكل هذا الجمال الطاغي وكت تقول ليك
( اصلو ما بصدق ) ….لما تفهم حاجه …!! وتشعر وقتها أنك داخل السودان الحنان …..!!!
وعد شابكانا …( اووه ماي قود ..) ….!!
تجاذبنا أطراف كل هذه الذكريات بعد أن التقيت ( الحبر) صدفة في مجمع الجوازات ….وَيَا لها من صدفة ….!!!
ياهو ( الحبر ) ذاااااتو بكل عفويته وعذوبته ….. إتقالدنا واتطايبنا مساااافة …..!!! قلتا ليهو أوعي بس تكون لسا متابع السمحات ….!!! ضحك جنس ضحك …قال لي فضلو فيها سمحات …طارت لينا في راسنا دا ….!! اشششش براحة ديك المدام الجاية ديك ….!!! ( صدق من سماها الحكومة)
فعلا وصلت زوجته ….سلمتا عليها قال ليها دا صاحبي شديد وفردتي من الجامعة ودي ( تماضر ) زوجتي وطبعا ماكانت معانا في الجامعة ….!!
قلتا ليهو سلامة الله شافك كان قبضتك بالثابتة …!!
قعدو يضحكو الاتنين ….!! قال ليها دا بتاع مشاكل …!قلتا ليهو أقوووول …قال لي قول ..أتحداك ..(معاها غمزة في العين …)
قلتا ليها بالجد انت محظوظة…!! ( الحبر ) راجل كلس وخاتي القول كان مميز في كل حاجه ….( لما قعدت تتبسم ) …قلتا ليها حتي إختياراتو كانت مميزة …!!
قالت لي ( سجم خشمنا ) اختياراتو ياتا …!!؟؟
(سجم ….!! وخشم ) تعالي يا ( وعد ) اخدي ليك نقلة
وشوفي الكلام …!! وحلات النضم …!!!
قلتا ليها زول يشيل الإنجليزي تخصص رئيسي ومعاهو
تاريخ …دا مازول جدير بالاحتفاء ….!!؟؟ ( كبير يا ود) ( الحبر لما امن ) …!!
(ما عارفاهو كان شايل سلافة و إنتصار ) ..
أداني ليك حضنة قوية وقال لي في أضاني ….!!! عزيتني بردها ليك ….( انا ذاتي صدقتا …!! )
قلتا ليها صدقي زولك دا خلي الهندسة عشان رغبتو العظيمة دي …!!
بس في اللحظة دي ( الحبر ) ضحك شديد قال لي هيااا ما كلمتك ما اكتشفتا ليك ناس ( جتا وظتا وسين وصاد …) طلعو ديل البطيرو الصواريخ … وبشغلو النت …وبدورو الطيارات …!! …..!! بتصدق ….!!!
وفقعناها ضحكة ….!!! وتماضر تضحك لضحكاتنا التي تعالت تلامس السحاب …..!!
الله يجازيك يالحبر
تبادلنا الذكريات وأرقام الهواتف …وافترقنا علي أمل لقاء
الحبر أعاد للاسم البريق ….وحتما سيجمعنا الطريق ….
ياحليلك ياخ …..!!!
كانت لنا أيام