مواهب متعددة

يوسف البروف

الذ تلفون كان من زميل الطبشيرة استاذ يونس تيراب امبارح، قال لى الايام دى قادينا بخمجراتك دى، اها يا خوانا طالما المساحة للخمجرات خلينا نقدكم شوية لانو قليل من للخمجرات لا يضر، هو عليكم الله كما الخمجرات دى وكت دا ما كان جنيتوا مع ناس كباشى وحميدتى والبرهان وذو النون والصادق المهدى بتاع الترميمية والحزب الشيوعى والحزب الجمنورى وحزب البعث وتجمع المهنيين الاصلى والصينى والكيزان ونبيل اديب ومنى والحلو وعقار وهجو وعبد الواحد نور وكتايب الظل وكتايب الحر والثورية والزحف الأخضر والعساكر الشغالين تهريب للبشر رغم انف دكتور أكرم والجوامع الشغالة صلاة رغم موت معظم ناس الكراسى والصف الأول،،،
استمرارا للاستهداف الواضح لموهبتى من قبل المدام امبارح ما قالت جيب العيش الا مع زمن التمرين، مشيت شديت ليك الصف ولمن جيت راجع لقيت ليك التمرين بدا، يا زول قلت مافى مشكلة على الاقل الواحد يختبر موهبتو التحكيمية، قلعت ليك الصفارة من سيف جارنا المغضوب عليه من الفريقين ودورت ليك تحكيم، يا زول هوي التحكيم دا حاجة عظيمة خلاص، قرارك يمشى رغم انف اى زول، يا زول ربطت ليك وش كولينا اب صلعة وقدت ليك التمرين لبر الأمان بعد احتساب ركلتى جزاء وطرد لاعبين اتنين،،،
الغريبة الفريقين هتفوا بفشل التحكيم،،،،،
نواصل الخمجرات اذا لم تتحسن الحالتين السياسية والنفسية،،،