‫الرئيسية‬ رأي النداء قبل الاخير للسيد د.عبد الله ادم حمدوك.
رأي - سبتمبر 10, 2020

النداء قبل الاخير للسيد د.عبد الله ادم حمدوك.

علي الكوباني :

ـ اول شي بصراحة كده زمان ناس حاضنتك السياسية ديل غشونا عديل وقالوا لينا مجلس السيادة ده تشريفي ساكت وانت العندك كل سلطات رئيس الجمهورية بتاعت زمان ما عدا (الجيش والشرطة)..اها قصة (تشريفي) دي طلعت مكنة ساي وضنب ككو ممسح بفازلين..بس السؤال: انت عارف كده ولا غشوك معانا..؟
ـ يا اخوي المكاجرة بقت عديل من السيد برهون وجماعتو..واللعب بقا في الضاغط وعلى المكشوف..وكمان جابت ليها مغارز ولقاءات مع بقايا الكيزان للتفاكر حول الفترة الانتقالية..وشايفك برضو لسه باقي على العشرة وما عايز تواجهم قدام شعبك وهم ماسكين قوي في شركات الجيش والمنظومة التقيلة ديك..وكمان طوالي ضابحين البهائم ومودنها مصر واهلنا بايتين القوى.. وكلهم قاعدين بعاينوا في الازمات المتلاحقة النازلة على شعبنا الصابر وعليك ويصرحون بفشلك انت وحكومتك وكأنهم غير معنيين بالامر وما مشاركين معاكم في السلطة..وراجين التفويض عيني عينك
السؤال: لمتين حتشيل وش القباحة..؟
ـ يا اخوي الدولار صبأ وكفر وجنح وفات ال250 جنية عديل..وانت يا ود باقير ما قلت خبير..ليه ما شرعت في تغيير العملة المضروبة دي والراقدة بالاطنان عند الكيزان والمزورة بالكونتيرنات من مخابرات الدول الراقدة لينا زي الدبيايب في القش..وخليت الشغلانة روكة..!؟ لعل المانع خير ولا ما من صلاحياتك تغيير العملة..ولا ناس الحاضنة عندهم رأي..؟
ـ فرحنا معاك بالسلام وحييناك على جهدكم المقدر في جلب الحركات المسلحة لحضن الوطن… لكن يا حمدكة يا اخوي معقول..تصالح البره وتخاصم وتنسى الجوه الواطين الجمر ومصطلين بالنار وشايلين معاك الهم ..ويبقى عليهم الغلاء الفاحش وكمان الفيضان… ولا عملت تقشف حكومي(زي ميزانية القصر الفيها نثريات مليارية لمكاتب اعضاء السيادي كلهم.. وال3 الف موظف وال1700 عربية.. دي ممكن تكون اضخم من ميزانية تسيير المستشفيات في البلد)..ولا وقفت الاستيراد الا للدواء ومدخلات الانتاج الزراعي ولا عملت خطط اقتصادية عاجلة…الخ.. وما عارفنك راجي شنو..؟
ـ يا اخوي لهسه ما وقع ليكم انو اي وزير معاكم بهاجموه الكيزان واذنابهم وبعض الناس البركبوا الموجة ساكت.. هو الوزير الكويس والبكون شغال تمام من اجل الوطن..؟ هسه عليك الله شفت ليك كوز هاجم الوزير مدني عباس مدني القاعد ساي ده..؟
ـ زمان قلنا ليكم نظفوا الوزارات والمؤسسات من الكيزان لانهم ما بدوروا ليكم الخير ولا للبلد ..وببساطة حيعوقوا مسيرة الحكومة الانتقالية والثورة…وكذلك فعّلوا قانون (من اين لك هذا) ولقطوا الكيزان كلهم الاغتنوا على حساب السودان وتطاولوا في البنيان واكتنزوا المال الحرام مع انو الواحد فيهم جا الخرطوم بشنطة حديدوما تخلوا ليهم قروش البلد يأذوها بيها ويدمروها…ما سمعتوا الكلام..اها خموا وصروا..
جدعة اخيرة:
قال ليك ممنوع استعمال صالة(VIP) في المطار الا للمسئولين الحكوميين والعاملين في مجموعة شركات دال..اجي يااا كده
يا اخوي انتوا اسامة داؤود ده ماسك عليكم شنو..؟ وقصتو شنو معاكم..؟ يا ربي كان داقي خيمة(دال) في الاعتصام..ولا موّل الثورة..انا ما عارف لكن شامي لي ريحة عفنة زي عفنة المشرحة لمن يكون فيها جثث متحللة..
# اسمع كلام البكيك يا حمدكة والله همنا الكبير انك تنجح لانو انت خيار الثورة الاول..وكمان كيتن في الكيزان الفاسدين..بِسس
#حبا_وكرامة_علي_الكوباني

‫شاهد أيضًا‬

غابات في المدن لمناخ معتدل

نجيب صعب : الموجات الحارة التي تجتاح العالم تترك أثراً مضاعفاً في المدن. فمباني الإسمنت وا…