‫الرئيسية‬ رأي ينوحن لي حماماتن …!!!
رأي - يناير 11, 2021

ينوحن لي حماماتن …!!!

الطيب عبد الماجد :

في السودان الجار سند …!! والبيت أمان …!! ناس الحلة أهلك …!!
وأولاد الحي أخوانك ….!!!
الأخو شيال تقيلة ….والأخت الكبيرة أمك التانيه …!!
حنية الدنيا والعالمين …!!

وبخت الأخوات بي أخوهن ..ضلهن وسندن …!!
وبخت الأخو بي أخواتو ….. ضهرو وحياتو ….!!!

السودان دا ( حلو ) بي ناسو عشان كدا لما يمرق لي بره بمرق بالقَيِّم دي ……!!

حضن وربى …!! وعلم و أدي …ولم يستبق شيئا …!!!

حرام نلاويهو ….!!! عمرو ما لاوانا …!! وكل الحنان أدانا ….

فيهو ملامحنا البتشبهنا …وذكرياتنا الحنينة …
آمالنا المؤجلة ……وأحلامنا القبيل ….!!

فيهو ( صرتنا ) المدفونة ….وطفولتنا ( المجنونة )
….!!
فيهو مدرستنا القرينا فيها ….واتعلمنا …واتسكعنا في الطريق ….وحكينا لي بعض في ( فسحة الفطور ) كيف دقسنا ( الحاج ) ..

لما أدانا قروش الرحلة والرحلة لغوها لكن ما رجعنا القروش ….!!
ولما كبرنا عرفنا انو ( الحاج ) عرف بي تأجيلها قبل ما نحن نعرف ….!! لكن عمل رايح ولم يطالب بحقه في الضمان …..!!
وطلعنا نحن الداقسين …!! وكم كان كبير …!!

فيهو جيرانا البفرحو بيك لما تجي من السفر أكتر من ناس بيتكم….!!

فيهو أول بت ( حبيتا ) في حياتك ….!! حتى وإن لم تسجل اعتراف وتحلف بالمشاعر ….!!

ومين علمك يا فراش تحضن عيون القاش …!!
( البت الكراش )

فيهو مدن وفيافي ( حبيتا ) من غير ما تشوفا …لانك شفتا ناسا وأهلها ….!!
لاقيتم في مدرسة أو جامعة ..اشتغلنا معاهم أو حتى اتلاقيتو في الجامع …!!

لما تسمع اسمها بتتذكر زول منها نقل ليك كل سحرها في شخصو ….!! ووصل ليك ( روحا ) في طبعو ….!!

كان عندي صاحبي كدا من ( أم روابة ) …
وكان من أجمل الناس ( الله يطراهو بالخير ) …!! إسمو الصادق
من شدة ماهو لطيف ومهذب وروحو حلوة …!!
لما تجي سيرة ( أم روابة ) دي ساي كدا في أي مناسبة بتبسم براي ….( رغم إني ما شفتها ) …

لكني علي يقين إنها بتشبه ( الصادق ) دا …

شفت كيف لما الزول يبقى مكان …والمكان يبقى زول …!!
وياهو دا السودان ….!!
وسلام عليك يا صادق أينما كنت ….!!
وكان …!

السودان فيهو روحنا وحبنا وساهرنا في عينيك ولسا قلوبنا بيك متجننه …..!!

فيهو الهلال والمريخ …ونيل الحصاحيصا …وهلال الأبيض وحي العرب سوكرتا …ومريخ الفاشر ..والأهلي سيد الأتيام ….!! الميرغني كسلا .. رابطة كوستي وسهم القضارف …شندي ونيلها
والأمل دايماً بجي من عطبرة ….
( العلم ) رفاعة ( بالفتحة والكسرة ) ….!!
ولكادقلي هلالها …!! وضيعني ساكن الموردة …..!!
وبقية الأتيام مع حفظ الألقاب والمقام …

فيهو عمك ( التهامي ) ….يتقدم المناسبات بأفراحها وأتراحها ….!!! صاحب موقف وسيد راي ….!!
تشوفو في ( كشاتين ) الجمعة ..( الخمسين ) دي بجرها
زي الهزار وبقلب الطربيزة ….
أول ما الآذان الأول يأذن بجدع الورق زي الضربتو كهربا ويقوم جاري يتوضا وجري على الجامع….!!
قال لو ما قعد في الصف الأول كأنو ما صلى ….!!

ألحق يازول ….عمك ( دنا ) من الإمام ( بكر وابتكر )
فكان له في كل خطوه يخطوها له عمل سنة أجر صيامها وقيامها بنص الحديث ….!!

الله الله … عرفتها يا حريف …!!
كلم الكايسنها بعيد ديل …قول ليهم قريبة شديد …!!

وجهه مسالم لكن ملامحو راكزة وقويه ….حافظ الحقيبة حفظ ( رغم ادعائه غير ذلك )
وحافظ أجزاء كثيرة من القران …!!

من أكثر المواقف التي أربكتني يوم عقد بتو الكبيرة ( عواطف ) ….!!

لقيتو ببكي …!! ولم أكن أتصور في حياتي إنو عمك ( التهامي) دا بكل هذه الشخصية والعمر ممكن يجي يوم وأشوفو ببكي …!!
وما أغلى دموع الرجال …!!

السودان دا تلقى الواحد مهاجر في ( باريس ) وفي نص ( الشانزليزيه) يعاين كدا يشوف ليهو ( حمامة ) بأكلو فيها السياح
طوالي يتذكر ليك زمان لما ( الحمام ) بكون راكي في راس بيتم
وياخد ليهو سرحة كدا ….!!
لتفشل الحمامة الفرنسية ( القادلة ) في سرقة انتباهه وما يعتمل في الدواخل …!!

وتأبى ( باريس ) بكل صولجانها أن تنتزع منه اعترافًا بديلاً لقريته الوديعة تلك ….والمستسلمة للنوم وقتها لفارق التوقيت ….!!

وينوحن لي حماماتن ….همن عيني غماماتن
تتوق الروح لي شوفاتن وارجف حين موافاتن ..!!
بريدن ….!!
وشوقي لي لماتن

( ترجف بس ) ….!!

السودان فيها نوبتنا ومشايخنا ….فيهو فرحتنا ومسارحنا ………!!!

فيهو نحنا ….

وحليل ناس ليلى ….ساعة الليل يجن ….!!!

روح الإعتصام ديك لازم تبقى حية …عشان الثورة تبقى حية ….!!!
العيش بجي وإن طال السفر …والمعدوم مصيرو يدوم
بس النفوس لو اتغيرت دولار الدنيا ما برجعا
والبنزين ما بحرك المعطوبة ….

نحن هسا بس نمسك قوي في تماسكنا وعاداتنا السمحة دي …!! في تواددنا وتراحمنا ووقوفنا مع بعض ….!!
في حبنا للناس وللخير والفضيلة والجمال …

بعد ( السبع ) العجاف أكيد ( السمان ) جايات …!!
نحن حارين ……. !!! والحاري ولا المتعشي..!!

اللهم أنت أدرى بحالنا فافتحها علينا فتح العارفين ….!!
وترانا صابرين ….!!

حيجي الخميس واللمة والناس والصفقة والرقيص …!!
ونحضر عرس ( عواطف ) ونهز مع أبوها …ونكفي الضيفان ….!!

وشوق لكل جميل في الحي ..!

صحي يابلد …!!؟

أبششششر يا التهامي …!!
……
…….
……
أبشر بالخير

‫شاهد أيضًا‬

مع السلامة

الطيب عبد الماجد لا أدري من هو هذا المسافر ولكن بالحب والدموع كان الوداع على عتبات المطار …