‫الرئيسية‬ ثقاقة ناس حلتنا …!!
ثقاقة - يناير 28, 2021

ناس حلتنا …!!

الطيب عبدالماجد :

يوميات علوب ….!!

أميرة ( فلقصة ) داخلة ليك في الشخصية اليومين ديل
لما تقول ليك ….
( مفروض يكون في ارضية حوار بين العسكريين والمدنيين )
تحلف تقول البت دي مقطعة السياسة …(!

( فلقصة ) دي أيام الثورة ديك كلها نايمة
كانت كاتبه ليها بوست وقتها قالت فيهو حكومة البشير دي ما بتنقدر …استريحو ليكم راحة …!!

(( في الوقت الذي كان فيه الثوار يجوبون المدينة وهم يهتفوا مرددين وبإصرار …أرجع ورا وثورتنا دي ما بتقدرا …!!وكانو يعنون ما يقولون ….!!!))

اها أول ما سقطت طوالي غيرت ( شريحتا ) …!!

( البروفايل ) كان فيه صورة ممثلة هندية كدا ما عارف اسمها منو ….طوالي ختت ليك ( آلاء ) البت بتاعة القصيدة ديك
والبوستات كلها قلبت ثورة ….وكل يوم سيلفي من الاعتصام ….وطرحة جديدة …!!

غلطت قبل يومين كتبت وقالت
(( حتى الكوفير تمنو زاد نمشي وين نطير ))
( بس وقعت وماسمت ) …!!!
وبنات الحلة ما فوتن الفرصة ردموها ردم ترباس
قالو ليها الناس في العيوش وأنت في الرموش …!!

( وأمونه ) شاركت في عاصفة الحزم دي وأدلت بدلوها….!! ( دي كمان اصلو ما بتكضب طوالي بتستخدم الكيماوي )

قالت ليها هو وينو الشعر البودو الكوفير ….!!
( با ظت )

( فلقصة ) كتبت ليها أنا ما برد على المجانين ….!!

( لقاء السحاب ) ….( إنها الحرب )

من اليوم داك ( أميرة )!كل يوم بتطلع بي شارع مختلف قالوا ( امونة ) رابطة ليها وحلفت تحلق ليها شعرها

المهم دي واحدة من مظاهر الثورة في حلتنا ….!!

بهناك عمك ( كروم ) داخل في الدور ….
( كروم ) دا كان في اللجنة الشعبية هسا برضو تاني جا متلب قال هو داعم للجان المقاومة ….
عمك دا كان مدير بنك مامعروف كدا…
( نوع البنوك المغمورة ديك ) ….!!
ورغم دا كان شغال بي مكنة محافظ بنك السودان ….!!
أحبطت له محاولتين زواج في مرتو ….!!
والتالتة نجحت …!!
ومساخة السنين ….كان مشخت للحلة دي كلها ….!!
وهو ذاتو ما كوز اصلي …!!

( الكيزان ديل ما خشم بيوت كمان ) …!!

في النوع المابتكلم كتير داك …. تشوفو في الحلة تقول الغنماية تاكل عشا …وهو بكون مسؤول من قطاعين ومحلية …!! وبحضر الاجتماعات البعد واحده بالليل ديك …..!!

اها ( كروم ) دا كان مركب الشريحة دي ….!!
براهو كدا مافي زول أداها ليهو …
أول ما يلقى ليهو جماعة طوالي بخش في الموضوع
يقول ليك ( حنعيد النظر في القصة دي ) …
( بجرأة كدا ) ….!!

( القصة شنو هو ذاتو ما عارفا ) …..!!

ويقول ليك وفلان داك ليس بالقوي الأمين …!!

وشابكنا ليك يا أخي الكريم و يا أخي الكريم ….!!
( طبعًا دي مصطلحات الصف الاول ) …!!

المهم حافظ القصص دي وعايش بيها ….
لكن اجتماع واحد بحضرو مافي ….!!
كضاب ساي ….!!
هم ذاتم ما مابدخلوهو ……!!
جنهم وجن الزول الخشمو خفيف وبلفح الكلام …!!

أها لما قامت الثورة ….قال هو ضد النظام وكان شغال
بحفر ليهو من الداخل …!!!

ود الحاجه قال اها يا ( درمة ) ….!!
تحفر شنو إنتا يا كروم …إنتا قايلا صبحية …..
داير تاكل هنا وهناك ……!!
دي ثورة ياخ ….ثورة …..!! ما سماية…..!!!

أها ناس ( قاسم ) اتدخلو ….!!
( قاسم ) دا من فلاسفة الحلة ….!! سامنو ( سقراط )
مشي قال يقرا طيران في ( الفلبين ) …!!
عملنا ليه اكبر حفلة وداع شهدتها حلتنا منذ عقود ….!! ومسيرنو لحدي المطار ….قلنا كان الحلة تجيب ليها طيار ….!!
مشى جانا بعد تلاته شهور ..قال خلاص أخد الرخصة ….!!

صبري أب رأسا مبري ….!! بتتذكروه …؟؟؟
صبري ياخ أب لسانا عريض داك ….

طبعًا دا ولا بدسها ….!!

(((قال ليهو والله يا قصيم الريد ( في إشارة ل ( قاسم )
لو امتحنطا تصوق ( ركشة ) ما بضوك ليها في طلاطة شهور خلي طيارة …!!
والله دي جراضة ما تطيرا ….
ياخ كورص الكمبيوطر أربعة شهور …!! )))

( انتهى تعقيب صبري بشأن الحادثة ) ….!!

المهم صبري كلامو صاح …بس نحن خجلنا ساكت وشابكنو ليك يا كابتن ويا كابتن ….
لمن هو ذاتو صدق ……!!
بقى يمشي ( مجنح ) …!!

المهم قاسم دخل السياسة بي رخصة ( الفلبين ) دي
قال البلد دي أصلاً من قامت ماحاسبو فيها زول
اشمعنا المره دي …حيث لابد من إعمال مبدأ التساوي

أها ناس أنور والصادق وعبد الوهاب وجعفر
( طبعًا ديل الكانو بترسو الشوارع أيام الثورة ديك ) ومؤثرين في باقي الشباب
( أنور ) دا لي هسا مخدتو ( لستك ) ….!!
أولاد ( لهبة ) بس
كل ما اقنع من الثورة دي أعاين ليهم بطمن انها لسا محروسة ….!!!
اها ديل قالو ( قاسم ) دا أصلا ( طيارة ) ما تشتغلو بي …!!
وتحول ( قاسم ) من ( كابتن قاسم ) لي ( طياره ) حاف كدا من غير اسمو ذاتو ….وبقي اسمو طيارة ….!!

( زولك طار …وركب التونسية ) ….✈️

في الجزء الآخر من الحلة عمك ( التوم ) كل يوم في صف العيش يكيل للحكومة أقسى أنواع الاتهامات ويصفها بالحكومة غير المسؤولة والتي لاتهمها مصلحة المواطنين والناس …وجارين ورا المناصب و إننا وقعنا في اكبر ورطة …..!
وجزء كبير من الصف يعقب بالثناء والاتفاق في الرأي
لكن الواحد فيهم أول ما يشيل عيشو ….بفرتق طوالي ولا يعقب على عمك الذي يتحمل وحده عبء
الهجوم الضاري على الحكومة بشقيها المدني والعسكري ودون هوادة ….!!
طبعًا الوحيد المساندو هو ( كلبم )
اشهر كلب في حلتنا
اسمو ( كلب ناس حاج التوم ) ….!!
( عديل كدا مدنو ( إسمن )
و كان بجي معاهو الفرن …..
مرات كتيره بحس بالكلب دا عارف الحاصل كلو بس ما قادر يعبر ….!!
ياخ الكلب دا مره زي القال ( نحن اتلعبنا ) ….!!!
ولا يتخيل لي ماعارف ….!!

غايتو في ناس كدا في السودان دا يحيروك ذاتو في الطيبة والجمال والأخلاق …
عندنا جارتنا إسمها ( حاجه السارة ) لما تلاقي كلب ناس حاج التوم دا راقد قدام البيت وتكون شايله ليها حاجه طوالي بتدي منها….!!

أتخيلو بتقول للكلب دا شنو …!؟؟

بتقول ليهو ( اكل أبوي ) ..!!

ياسلااااااااااام

بالله بلد فيها زي ناس ( حاجه الساره ) ديل ممكن تروح ….أصلو ما ظنيت …!!
إن كل الظن حب ….!!

المهم حلتنا تغيرت تشكيلتها مع هذا التغيير ولغتها …!!

جيت داخل البيت لقيت ليك المجلس التشريعي عديل كدا منعقد ….!!!
الحاجه ومعاها سنيه وفوزية وملكة
وحوار عالي شديد …!!
وطبعا غلاء المعيشة والأزمات على رأس الموضوعات والقهوة مدورة …!!

( فوزية ) قالت والله لو عارفنها كدا ما كنا طلعنا ….!!

( طبعًا فوزية دي يوم واحد ما طلعت ) …..!!

بالعكس قالت هي متضررة من الحكومة الجديدة ….زادت الدولار …
كان عندها ( ملايات ) بتجيبهم صاحبتا من الصين اسمها ( الزهور ) ( ما الملايات ..!! دا اسم المرا ذاتا )
وفوزية الوكيل الحصري في حلتنا …!!

اتشاكلت مره مع ( سنيه ) ….!!
سنية قالت ليها ..
يا ( مندسة ) …!!
ودا أول لقاء تصالحي منذ ذلك ( الكوماج )…!!

اها ( سنية ) طبعًا مسؤولة الصندوق في الحلة ليها سنين …ورغم انها بتدي الصرفة الأولي والتانيه ومرات التالته ليها وذوي القربى … لكن مافي زول غيرا بقدر يدور الشغلة دي …..!!

( سنية ) قالت والله ( هبة مالية ) دي لوقعدت معاي ساعة بس الا أوقع ليها الدرب ….!!
قالت هي مالا ومال صناديق الخواجات
تعمل ليها ( صرفة ) هنا جوا وبالكتير مع جيرانا الأفارقة ديل ونصرف قدر لحافنا …!!
ديل بنقدر عليهم الخواجات بلحقونا أمات طه ….!!!

يازول أنا بسمع في الكلام دا جوه قربت أقول ليها كدي عيدي لي الكلام دا تاني ….#سنيه _للسيادي ….!!

وكان لابد ( لملكه ) ان تشارك ……!!
وملكة طبعًا عادي بتجيب العيد ….!!!

قالت إنتو في دا ولا (هبة ) دي ذاتا قالو عاملة ريجيم ….

( درعتا الملكة وبكرت بالعيد ) ….!!

نطت ( مشاعر ) من جوه المطبخ قالت ليها هيا يا خالتي ( ملكة ) هو السودان كلو عامل ريحيم …!!
في ذمتك هسا دي رغيفة يتسمو بيها ….!!
وضج المكان بالضحك رغم الحال ….!!
وياهو دا السودان …..!!

لتتمايل الحلة وتتماهى مع الأحوال … والسودان بين تغيير حدث ….وتغير منتظر ….!
شعب جرب كل أنواع الحكم لكن الحرية والكرامة تجري في شرايينه مسار الدم …!!
ورغم كل الجراح سيأتي الصباح …..!!!

بلد فيها ( حاجه السارة ) ستظل تعطي …..ولن ينقطع مدد السماء ….!! .
والصباح إن لاح …….!!!

ولا شنو يا أمي

‫شاهد أيضًا‬

الإرادة

ريم عثمان : كتابات حرة الحياة رحلة طالت أو قصرت تحتاج أن نعيشها بسعادة وعطاء، أن نأخذ منها…