‫الرئيسية‬ رأي حكم حمدوك وحكم العمبلوك.
رأي - فبراير 15, 2020

حكم حمدوك وحكم العمبلوك.

يوسف البروف
يا جماعة اعزرونى على تكرار القصة دي، لكن والله عاجباني شديد خلاص، وكل مرة بلاقي لي حدث بشبها.
اها يا زول قالوا فى قرية من قرى دار حمر فى كردفان فى واحد عندو بتو ماتت، اها يا زول كل ناس الحلال مشوا عزوا فى بتو الا حلة واحدة ما قدرت تجى، اها يا زول بعد كم شهر كده ناس الحلة حددوا ليهم يوم كده عشان يمشوا يعزوا فى بتو، اها يا زول كل زول شد جملو والحلة جوكي جمال، اها يا زول الناس دى لمن خلاص قربت من الحلة فى واحدة من بنات الحلة منظر الجمال دا عجبها شديد خلاص، اها يا زول البت لمن ما قدرت تتحمل منظر الجمال قامت انفزرت وقالت كده وفكت ليك العنان للسانها، قاليك البت دي زغرادها شق ليك قلوب الجمال وأصحابها، اها يا زول الـ”60″ جمل ديل لمن سمعن صوت الزغراد دا خرطن ليك الرسين وبيت البكاء جوك ستين جمل من فوقهن ستين شاب وستين سوط ، اها يا زول الجمال كبسن فى بيت البكاء وتانى الشباب رجع بالجمال لراس القوز ومن هناك كل واحد رخا لجملو الرسن وتعال شوف ليك سباق، اها يا زول منظر الجمال عجب ليك بنات الحلة وقالن كده وشبكنهم ليك زغاريد وبعد شوية الدلاليك دورت وبعد شوية السلاح دور وبعد شوية السوط دور وبعد شوية الضبايح دورت هبطرش ام فتفت وشية وسفن اب، اها يا زول قاليك بيت البكاء انقلب لبيت عرس واصبح تاريخ ليومنا هذا.
منظر حمدوك بجانب انجيلا ميركل داير جمال ودلوكة وضفاير وشية وام شوشو،،، غايتو يا الكيزان ما عافيين ليكم، تلاتين سنة كاتلننا ببطولة سيكافا وحارمننا من دورى ابطال اوروبا.. البعرف ام شوشو عندو جائزة عندي، عطر باريسى ماركة (حكم حمدوك وحكم العمبلوك).

‫شاهد أيضًا‬

محلية ريفي وسط القضارف مثال لاستمرار الظلم (الريف المنتج مسخر لأجل المدينة المستهلكه)

الخرطوم الشاهد بسم الله الرحمن الرحيم محلية ريفى وسط القضارف بانسانها المتميز ومساحتها الز…