العضة خيار الشعب

بسم الله الرحمن الرحيم

يوسف البروف

قالوا يا خوانا الاسد والمرفعين والثعلب اجتمعوا، اها قام ملك الغابة قال للَمرفعين والثعلب، يا خوانا لو لاحظتوا نحن التلاتة ديل كل واحد فينا قاعد يجازف جومتو براهو، ومن وجهة نظرى الاسدية، دا يعتبر تشتيت للمجهودات وكده، قال ليهم، اها رايكم شنو يا خوانا نعمل تحالف بيناتنا نحن التلاتة ديل، وذلك فى اطار توحيد الجهود وتعضيد اواصر الاخوة والصداقة والجيرة والمصالح المشتركة، اها قال ليهم، انا اقترح لكى نوقع بالضحية، نقوم بتقسيم مجهوداتنا بين الاستدراج والمطاردة والانقضاض، اها فى نهاية اليوم نقوم نقسم الغنايم والولايم بالعدل والمساواة والجبهة الثورية تطبيقا لشعار حرية سلام وعدالة والعضة خيار الشعب، يا زول هوى هم التلاتة توافقوا وتواثقوا وادوا قسم الخاين الله يجيب ليهو الكورونا، اها يا زول، اول يوم قبضوا ليهم تيتل سمين عريض المنكبين وطويل القرنين، قاموا جروا وختوا تحت شجرة ظليلة وتانى دقشوا ليك الغابة، المرة التانية، يا زول قبضوا ليهم غزالة من ذوات الشحوم واللحوم والجضوم، قاموا جروها وختوها جنب التيتل، واخيرا جازفوا ليهم صبرة وزن الريشة وشالوها وجدعوها بفوق للتيتل، اها يا زول الاسد قال للمرفعين، قسم بيناتنا الولايم دى يا حبيب بالشفافية وكده، اها المرفعين قاَم قال للاسد، يا اسد انت زول كبيرنا ودليلنا وحامينا وملكنا عشان كده تستاهل التيتل السمين دا يا حبيب وانا استاهل الغزال دا والثعلب يستاهل الصبرة دى لانو هو زول صبور وقنوع ومكار وكده،اها يا خوانا التقسيمة دى ما عجبت ليك ملك الغابة كلو كلو، اها قاليك الاسد دا خبت ليك المرفعين دا خبتة كسرت ليهو سبعطاشر سن وخمسة وعشرين ضلعاية وعملت ليهو فتاق فى البطين الاوسط، اها بعداك قام الاسد اتلفت على الثعلب وقال ليهو، هو عليك الله كما هبالة وخرف من عمك الاسد فى حضرة جلالك يطيب الوقوف فى الصفوف يا ثعلوب اقول للمرفعين المعفن دا يقسم بيناتنا الولايم دى، الاسد قال للثعلب، يلا يا ثعلوب كواى القلوب ورينا فلاحتك وشطارتك وذكاءك فى التقسيم يا وسيم، قام ثعلوب قال للاسد، جدا يا ملك زمانو، الثعلب قال للاسد، اول حاجة التيتل دا لفطورك براك، شية ومرارة وام فتفت وجقاجق وبالجنبة كده كان لقت ليها برمة مريسة بصلها كبار كبار كده تكون الناقصة تمت، والغزال دا لغداك وحدك حتى مرتك اللبوة ام فنيسة دى ما تديها معاك والصبرة دى خلى عمتى اللبوة تعملها ليك شوربة فى رمضان لزوم الحنان وكده، وان شاء الله تصوم وتفطر وتترع بالشفاء والهناء يا سيدى، اما انا والمرفعين الوهم ديل خلينا ان شاء الله ناكل الكورونا التطلع ابو اهلنا ذاتو، قاليك الاسد ابتسم حتى بانت اخر انيابو وقال لثعلوب، يا سلام عليك يا ثعلوب ياخى، من اين تعلمت هذه الحكمة العادلة توزيعا وولاياتا وولاة ومجلس تشريعي؟ ثعلوب قال للاسد، تعلمتها من المرفعين المكسر قدامى دا يا عمو الاسد.
والله العظيم مافى زول أتعرض لهجوم من الحكومة ومعارضيها قديما، والحكومة ومعارضيها حديثا ذى الصادق المهدى دا، البيان الطلعوا حزب الأمة الاخير ده وجمد فيهو نشاطو فى قوى الحرية والتغيير، اى زول سالتو من رايو فيهو، قال لى، كلنا مع الإصلاح الطالب بيهو حزب الأمة دا لكن الصادق دا لكن دا ما وقتو، سبحان الله رغم ذلك ظل الصادق المهدى رقم لا يمكن تجاوزو، الكلام دا شفناهو بعيونا ديل ما حكوا لينا قصص، شفنا المجلس العسكرى قبل السيادى وتوددو، شفنا حمدوك وزيارتو للصادق المهدى فى بيتو، شفنا سفراء َوممثلى أعظم الدول الغربية والشرقيةوالخنفشارية برضو كمان، شوفوا يا ناس، نحن الكضب ما بنعرفوا واهلنا علمونا نقول الكلام العديل، يوم الليلة دا حزب عندو كوادر على امتداد ربوع الوطن غير حزب الامة مافى، حزب عندو كوادر جاهزة على امتداد ربوع الوطن غير حزب الامة مافى، حزب قادر يحقق مقاعد اكتر من حزب الامة مافى، خلونا من التنظير الما عندو فايدة، الكلام يتعلق بالاحزاب المطروحة والمقسومة والمضروبة والمجموعة فى الساحة الان، أما إذا تكون حزب جديد بمفاهيم جديدة وبرامج جديدة ورؤى جديدة وآراء جديدة، عندها يمكن ان نتحدث عن كيفية تقسيم التيتل والغزال والصبرة، بعدين تعالوا نوريكم سر الخطوة الاخيرة لحزب الامة التى ادت لتجميد عضويتو فى قوى الحرية والتغيير دى، حزب الامة لاحظ انو فى احزاب وزنها وزن البعوضة واخرى أعضائها لا يتعدون أصابع اليد الواحدة واخرى صنعت بعد الثورة وواحدة تانية كاتب هذه السطور ما سمع بيها ودايرة تخت راسها مع راس حزب الأمة، وزراء ووزارات وولاة وولايات، عشان كده داير يرسل ليهم رسالة مفادها انو هم بدون حزب الامة صفر كبير على الشمال، انا مع حزب الامة طالما المسألة اصبحت تقسيم ولايم، كل زول يشيل لقمتو على قدر يدو َوخشمو.
تمنيت ان ينظر السياسيين ونشطاء السوشيال ميديا والمناضلين للموضوع بشكل مختلف، تمنيت ان يتم التركيز على مبدا المحاصصة الذى جعل من قحت هى الكل فى الكل وبقية مفجرى الثورة الحقيقيين عبارة عن مشاهدين، نحن نرفض المحاصصة مبداا ونطالب باشراك الشعب السودانى صاحب النصيب الاكبر في الثورة فى إدارة شؤون البلاد، نتمنى ان يطال الاصلاح الذى طالب به بيان حزب الامة موضوع المحاصصة الذى ادى إلى الكوارث التى تعيشها البلاد بريفها وحضرها، نطالب ان تحل الحكومة وتشكل من كفاءات وطنية حقيقية وان يشكل ولاة الولايات والمجلس التشريعى من كفاءات وطنية حقيقية بعيدا عن حزبى وحزبك وصاحبى وصاحبك وان تتفرغ الاحزاب إلى الانتخابات وبعدها كل حشاش يملا شبكتو، أما إذا اصرت قحت على المحاصصة فمن حق حزب الأمة ان يطالب بعدم مساواتو مع الاحزاب الوهم،،،
كاتب هذا السطور ما عندو علاقة لا بحزب الأمة ولا باى حزب فى الدنيا دى، كاتب هذه السطور يننمى لحزب الاغلبية الصامتة التى فجرت الثورة والان بتعاين للانتهازيين يقتسمون المناصب والمكاسب والكراسى والخزى والعار على أرواح الشهداء وشرف المغتصبات والم و جراح المعاقين والمفقودين،،،
تصوموا وتفطروا على سودان بدون انتهازيين يا مسلمين،،،،