‫الرئيسية‬ رأي السودان الذي نريد ..!!
رأي - يوليو 15, 2020

السودان الذي نريد ..!!

الطيب عبد الماجد

مالم تتدخل الدولة وتصبح هي نفسها منتجة لبعض السلع الاستراتيجية لن تنزل الأسعار …!!
والدولار سيظل مولع نار …وزيادة المرتبات سيبتلعها السوق
لو مافي إنتاج …!! مافي أي حاجة …!! كدا من الآخر

الحلول المقترحة

الكهرباء ….فكروا في الطاقات البديلة بشكل جاد خاصة الشمسية
ممكن يكون عندنا أكبر مشروع للطاقة الشمسية في العالم ….!! وشمسنا ياها الشايفنها دي ( سبعتاشر ) ساعة في اليوم ….!! ومساحات مهولة تبحث عن حياة
يقول قائل ومن وين التمويل لهكذا مشروع ….!!؟؟؟
ودا سؤال مشروع ..!!
إذا استغلينا المزاج المعتدل لدول العالم مع السودان الان …!! كلو ممكن …وهناك دول من مصلحتها ان تتحسن الطاقة في السودان ….. لأنهم خاتنو للكبيرة وأنا أجزم أن هناك دول ستدعم بقوة هكذا مشروع ..!!ليس حبًا في سواد عيوننا ولكنها لغة المصالح المشتركة… نحن نعلم وهم يعلمون …!! وهو لقاء المصالح ( المشروع ) والمضمون …!!

بالنسبة للرغيف …مخابز ضخمة تتبع للدولة …!! دي سلعة استراتيجية ما بخليها لي إتحاد مخابز …!!

الأكل والشراب …..سلة غذاء العالم + نيلين ما واحد
( إذن العطل عندنا ما من الشبكة ) …!!
لابد أن تكون الزراعة هي أولوية الأولويات لدينا …!!
( الجوكر في يدنا راجين بيهو شنو !!؟ ) ..!!

( الصحة …والتعليم ….) الإتنين دايرين قروش ..!!
مالم نصدر بضاعتنا الزراعية والحيوانية والمعدنية وعائد الصادر يعود مباشرة للخزينة باقتصاد حقيقي وإنتاج ملموس ما بكون عندنا دولار …!! وبالتالي ما حنقدر نستورد الأدوية ونستجلب المعدات الطبية للمستشفيات ….!! وندعم التعليم …القصة دي قروش بس …
في كاش …..!! أي حاجة ممكنة …!! ( الكاش بحسم النقاش )

لابد من حدوث شراكات حقيقية وضخمة مع القطاع الخاص وإشراكه فعليا في حركة الاقتصاد بعيدا عن مصانع ( الصلصة ) و ( الشعيرية ) …!!

والأهم من دا كلو هو إجتذاب الإستثمارات الأجنبية
حيث لابد من إنجاز قانون إستثمار محكم الصياغ ..!! مكتمل الأركان …!! مستوفي الشروط ..!!
فيه من الضمانات الحقيقية للمستثمرين من جهة والسودان من جهة أخرى ….!! ( تفيد وتستفيد) …!!
البلد دي لازم تجتذب إستثمارات أجنبية…..!! لازم
أي دولة في العالم صغرت أو كبرت شغلها الشاغل وهمها الأكبر هو اجتذاب الإستثمارات ولا أستثني أمريكا وأوروبا والصين ….!!
نحن مالنا …أنا ما قادر أعرف…!؟؟؟؟؟؟
رغم إننا في الصف الأول من حيث الفرص ..!!
يجب ان نروج لهذا البلد في أي ( حيطة ) في العالم …وهم عارفين كويس جدا مقدراتنا ومواردنا

هذه رؤي و أفكار قد نصيب وقد يجانبنا الصواب
بس النية واصلة ….ونظل نبحث عن الحلول ونساهم بالأفكار حتي الوصول بمشيئة الله …!!

‫شاهد أيضًا‬

من يحب الامام؟

مرتضى فراج الامام الصادق المهدي رجل صاحب تجربة سياسية وفكرية لا يستهان بها وهو السوداني ام…