ناس جابتهم الصدفة عشان يتجدعوا بالانفنتي على حسابنا

علي الكوباني :

النداء الاخير لحمدوك والحكومة بشقيها التنفيذي والسيادي..
في حاجة في علوم الطب والفيزياء يا احباب اسمها(الدخول في دائرة مفرغة).. او بالعربي الخرطومي ( الحاجة البتخليك لافي صينية).. يعني تحصل ليك عوارض ومشاكل طبية كل واحدة بتسبب وبتزيد من التانية..مثلا: القلق بسوي وبزيد من توتر المصران العصبي..وتوتر المصران العصبي بسوي القلق وبزيد منو..اها تكون دخلت في جلجوغنا يحلك منها الله..
وللاسف الشديد الحكومة الانتقالية بشقيها(السيادي والتنفيذي) ولا نستثني منهم احدا دخولنا في دوائر مفرغة متعددة وخلوا الشعب كلو لافي صينية..
يعني مثلاً زي الاكذوبة التي تسمى رفع الدعم.. هي عبارة عن محاولة تحميل المواطن المسكين تبعات انهيار الجنيه السوداني امام الارتفاع الجنوني لسعر الدولار..وحاليا الرفع الدولار لهذا السعر الخرافي هي الحكومة ( الزي السليقة الباردة..لا تقدر تاكلها لانها حتطمم بطنك ولا بتقدر تكشحها مع الظروف الصعبة دي)..نعم حميدتي فتّاهم عديل وقال الحكومة اشترت الدولار من السوق الاسود عشان عايزة تدفع التعويضات للامريكان والطلوع من قائمة الارهاب وطبعا تجار العملة ما صدقوا ورفعوا الاسعار في السماء وحدس ما حدس..بالله يا اخوانا دي ياها حكومة الكفاءات..؟ ديل ياهم الخبراء الدوليين..والان اتضح انو ما عندهم التكتح من الدولية غير جوازاتهم الاجنبية دي ياااخ الميت في تلاجة المشرحة عارف لما تزيد الطلب على العملة في السوق الاسود بترفع السعر شديد جدا (وتاني ما بتقدر تنزلوا كان رعفت)..وبالذات لما تعمل كده في فترة وجيزة..والدولار بقا فوق 250 جنيه وحكومة قطار الهم دي تقول ليك لازم نرفع الدعم..ياااخ كدي ارفعوا لباساتكم وغطوا عوراتكم
وبعدين ياما كررنا لمن فترنا ونحن بنقول ان الحكومة السيادية على التنفيذية من استلمت قبل اكتر من سنة ما عملوا اي تقشف حكومي..مدورين صرف بذخي اولاد اب ذهانة ديل وقاعدين متجدعين (لمن جضومهم بقت زي تمبك العشر)..شي عربات فارهة ومتعددة ..ونثريات مكاتب..وحاجات تانية حامياني وصرف في اموال (ما ضاربهم فيها حجر دغش) من 11 عضو في مجلس سيادة كلهم تمامة جرتق ساكت وغير كمية الوزراء وصرفهم..وصرف كل المؤسسات والوزارات ويا ريت لو في مردود طيب على رفاهية وعيش المواطن.. ولسه زيادة المناصب والانفاق جايه مع اتفاق السلام..
وطبعا ديل كلهم من رئيسهم لصغيرهم ما بنتوقع واحد منهم يعمل زي لويس دا سيلفا رئيس البرازيل السابق والطلعها من اكبر نكبة اقتصادية في تاريخها وكان اول حاجة عملها هي التقشف الحكومي في كل مؤسسات البلد وبدا بنفسو وباع العربات الرئاسية واستعمل لشغلو عربيتو الفلوكسواجن القونجة القديمة حقتو..ويا ريت لو ال11 نفر بتاعين السيادي اختشوا على دمهم واعلنوا التقشف الحكومي هم والوزراء ايضا رحمة بالمواطن البقيف في صف العيش والبنزين من الفجر.. وفي ناس جابتهم الصدفة عشان يتجدعوا بالانفينتي والبنزين الحكومي الهبطرش على حساب السوداني الفقير..
نعم..لا عودة ابدا بإذن الله للكيزان تجار الدين الفاسدين..ولكن ارجوك ما تكون زول منظراتي ساكت وبعد تشبع وتملى بطنك بالمطايب تقوم تكتب شعار(الجوع ولا الكيزان).. وليه اصلا تحصر خيارات بلد الخير والجمال في خيارين تافهات زي.. اما الجوع.. او الكيزان..؟..لييه ما يكون شعارنا نسد الرمق لاي سوداني ونوفر حد الكفاف لشعبنا النبيل ونضع الخطط للنماء والرخاء..؟ واقول بكل وضوح ..لا يجب ان تطمئن هذه الحكومة الهايفة بشقيها السيادي والتنفيذي ويعيشوا في نفس الوهم الكيزاني الزمان بتاع( هذا… او الطوفان)..او لو مشت الحكومة دي (البديل منو..؟) اسألوا ناس نافع وعلي عثمان عن ذلك… وبإذن الله الشعب والشباب الشال غيركم وجابكم..قادر يشيلكم ويجيب غيركم..بِسس
# يا اخوانا دي مصيبة شنو الوقعنا فيها دي
#حبا_وكرامة_علي_الكوباني