جنب الدكان ….!!!

الطيب عبد الماجد :

بت على قناعة شبه كامله إنو بعض النفوس في البلد دي ( صدت )
الصدا الواحد بتاعتى الحديد دا ….محتاجة صنفرة

أنا لغاية المرحلة المتوسطة كنت على قناعة تامة إنو ما في زول ممكن يقتل زول في السودان دا …!!
والله جد …!!
وحتى لما تحصل جريمة زي دي كان بتخيل لي دايماً إنو الجاني دا ما سوداني …!! أو من كوكب اخر …!! وهو حسن ظن أعتز به ..
وتطورت مخيلتي بعد ذلك وعرفت إنو دا ممكن دا يحصل لكن بدوافع وشروط موضوعية …!!

ولما دخلت كليه القانون وتبحرت أكثر في القانون الجنائي وقرأت السوابق القضائية وجرائم القتل في السودان …ازددت قناعة إنو السودانيين كانوا وديعين حتى في قتلهم زمان ..!!

وأنا أقرأ مثلاً سابقة قضائية حقيقية من مجلة الأحكام القضائية التي تورد قضايا قديمة عفا عليها الزمن
وكانت هذه المره بين اثنين …!!

واحد اسمو ( الكلس ) او هكذا يلقبونه ….والتاني إسمو ( الزين )
مافي داعي للاسماء بالكامل رغم أني لازلت اذكرها ….!!!

وتعود تفاصيلها إنو ( الكلس ) دا كان عايز قروش من الراحل الإسمو ( الزين ) دا ….منحه لها على سبيل السلف والدين ..

والظاهر عمك ( الزين ) ماطل صاحبنا دا و ( زايغ ) من السداد والإيفاء بالمبلغ و الإلتزام …!!

المهم مره كدا ( الكلس ) دا لاقى ( الزين ) دا في الدكان بتاع الحلة مع المغربية كدا والدكان مليان رجال ونسوان وشفع …وزحمة …!!

وطالبو بي قروشو دي قدام الناس ديل كلهم …!!

قام ( الزين ) قال ليهو ماعندي ليك قروش ….!!

( ولم يكتف بهذا البيان الناري بل أردفه بملحق تحذيري )

و إنت كان راجل تاني اسألني من قروش ….!!

والكتمة حصلت …..!!!

أها اللمة القدام الدكان دي كلها توجهت بأنظارها لهذه المناظرة …!!
( أناري الشمار دا من زمان موجود )

الكلس سمع ( كان راجل دي …) فخرج عن الشبكة وطلع من الشارع ….وأداهو ليك ( بنية )
من أمها ..!!

وقع على اثرها ( الزين ) وارتطم راسو بي حجر تاكلين بيهو باب الدكان …. ونقل على اثرها الي المستشفى ليفارق الحياة متأثراً بجراحه للأسف ….!!

في معرض دفوعة نقل محامي ( الكلس ) للقاضي أن موكله ….قال لما الضحية دا قال ليهو كان راجل …وقدام النسوان بقى لا بسمع ولا بشوف ….
فقام ضربو لكن ماكان قاصد يقتلو ….!!

واختلف القضاة في منحه حق الإستفزاز الشديد المفاجئ الذي يخفف من تهمة القتل العمد الي شبهه

وأظن المحكمة الأعلى فعلت ذلك ومنحته هذا الحق فالحادث عارض غير مخطط له وبلغة القانون ينتفي عامل سبق الإصرار والترصد ….!!

ولعلكم تذكروا جيداً ذلك الفيديو الشهير في مثل هذه الايام قبل عامين بتاع ….

( إنتو لو رجال أمرقو الشارع …. كان ما خليناكم زي اخواتكم بالطرحة…..!! )

انتهى الفيديو وقتها من هنا …. وبدأ الطوفان من هناك
فنزل اخوان مهيرة من كل حدب وصوب الى الشارع
وقالو ليهو نحن جينا ….!!! .لكنهم لم يجدوه …!!

الداير أقولو ….ليه الناس مستعدة تعمل أي حاجه
من أجل الحكم …!!
عشان يصلو لي شنو…!؟؟؟ ومن أجل منو …!!؟؟؟
ليه لما تجيك فرصة نادرة زي دي لا تخلد نفسك في كتاب الوطن وذاكرة التاريخ …!!

وليه في ناس تمارس أفعال من الممكن أن تؤدي لضياع
ناس آخرين وموتهم فقط ليؤكدوا ان هذه الحكومة فاشلة وتستحق الموت …!!
ولست مدافعا عن إخفاقاتها ا فهي لا تحتاج مني كثير تفسير لكني اتحدث عن المبدأ والطريقة في إثبات الفشل …!!

ودون أن أحدد اسماء …. ليه في ناس أيام الثورة ديك تشوف كلامهم تتابعهم وأنت مغمض ….
هل كانو يجيدو ( التمثيل ) لهذه الدرجة ولا لما دخلو جوه ….شافو حاجات تانيه ….غير التي نراها …!!
أم للسلطة سحرها والبريق وأنا طبعًا قادر علي تصورها وأكثر مما هم يتخيلوا وأعرف جيدا ً بريق السلطة ونشوتها …!! لكنها اقرب للخمر ة ……!!!

مصيرا تفك ….!!!

ليه ما بعاينو لليوم دا …..!! وقد مر أمام اعينهم هذا الشريط ….!!
ياخ خليك من الشريط
الفلم دا هسا شغال في سينما ( كوبر ) ….
ليه ما بتخشو تحضرو ساكت كدا بس للدنيا والزمان
في الدنبا الما دوامة دي …!

ليه الإنسان ما بفكر انو يظل خالد في اذهان الناس وعايش في وجدانهم طالما جات الفرصة ……!!

ليه الشيطان يغلبك في لحظة فارقة وتتنازل كل حاجاتك ………!!
من أجل شنو ..!!؟

هسا لو الزول عندو قصر في شارع الستين والقصر فاتح على شريط حدودي من القمامة
والشارع نفسو الحتمشي فيهو ( اللانكروزر ) كلو حفر ومطبات وأنت من جوه القزاز شايف الناس يخيم عليها البؤس والإحباط جيئة وذهابًا في الشوارع …..!!

المتعة في القصة دي شنو ..!!؟ تستمتع مع روحك بعني .!!؟ ولا شنو ..!! مافهمت ….!!

لماذا تنظروا لهذا الشعب اللاهث والذي لولاه
لم تكونو لتدخلوا هذه الدهاليز وتنالوا هذه السلطات

بالله مش ديل ناس بستاهلو ….!!
ليه بتعملو كدا …؟؟؟

يحدثني بعضكم أن التعقيدات في الداخل أكبر مما يتخيلها الشعب …. وأن السياسة تقتضي تفاصيل قد تغيب عن عامة الناس …!!

وإجابتي دوماً حاضرة
عامة الناس ديل تطلعو تقول ليهم الكلام دا وتشرحو
ما تتجاهلوهم وما تدوهم إحساس انو نحن بنفهم احسن منكم …!!
الناس ديل لو سألوك من حاجاتهم رد عليهم
لأنو دي حاجاتهم ما شاحدنها ….!!
أصلو ما بتفكرو انو ممكن يجي يوم تحتاجو ليهم يقيفو معاكم …!! ؟؟؟

عامة الناس ديل هم الجابوكم هذا المكان….!!
وعامة الناس ديل هم من ماتوا في الشوارع
وعامة الناس ديل هم من صنعو اكتوبر وأبريل وديسمبر
وتبقت تسعة أشهر أخرى في التقويم صالحة للزراعة ….!! أفلا تسمعون …!!!

( الكلس ) لو زهج بنيتو كعبة )….!!!