من تداعيات سبتمبر 2013

عبد الرحمن الكتيابي :

سكرانه وحُقتها ملانه يوم القيامة سجن سجن غرامة غرامه

لقد هرمنا
من الردح والذم !
من النكد والهم
ياحليل ولاد العم
الفي التراث والدم
ياحليل مواهي الكم
صبحت ضواقا وشم
غضب الله في المنبر
بصوتو يتنبر.
تاتاي يتلولح
يوم صلى ماكبر
خادم الله خجلانه
من قعدة البنبر
والطفله مريوقه
عطشانه في البندر
زعل الملائكه رضاك
شبح المتاكا غُناك
دخلنا في عنبر
وكِلنا شرع الله
بسرعه شان نكبر
اسقينا وارينا—-
اروينا بي شوقنا
قول لينا بالاكتر
خاطرنا كان عندك
خليهو يتكسر
خاطر البلد محروس
والنيل فداهو عروس
عوامه قايلو اشتر
عينيها زي حظك
لابسالا توب اصفر
يوما التنادي عليك
لاقينا سالمنا.

كان هذا ضمن هتاف شرارة سبتمبر من العام 2013م
وكان العمدة الطربان ديك حوش بانقا وقتها في طغيانه وجماعته شبعانين وقوات الدفع العنصرى بالمرصاد وقوات الأمن تستدرج اطفال المدارس للازقة حيث المجازر.
وبعد المؤتمر الشهير للمؤتمر اللاوطني خرج ضار علي نافع وقال في معنى كلامه
ما قالته الفدادية بت كوراك.

سكرانه وحُقتى ملانه
يوم القيامه سجن سجن
غرامة غرامه
وحدث ما حدث .

المهم جرت الأحداث والزمن مشى واتغيرو الحكام ودفع شباب السودان كل فواتر الصمت.
وجات الفراريج لابسه توب المنقذ.

والله كان شفتِ الحصل
يا يمه لي دار العُمد
جوها وليداتً مُلس
كضابين كضب
وقباح قباحةً ما بتنعقب.
واحد مدغلب ومنفنس
والوقفه عاد غالباهو تب
والعجب….
كُنا قايلنو الخدر
والمهدي مات.
المهدي فات
وان قلتي ود
سيدي الحسن
خلاص……… كِبر
والشيوعية الزمان
من موسكو ما مرقت شِبر

الله اكبر يا وطن
جاتك فِتن
اصبحنا لا ضل لا ضرا
وهي القصة مو حكم المرا
الورثت الارباب سعد
ولا الموعين الخلا
والعيشه والمال والعدد
القصة قصة زول صمد
كان بعافر فوق بطر
من ما طلع قوز بت نصر
شاف السحاب ..
قام يمارن في الحفير
وحفيان جرى
يلاقي التساب
ود الذين طلع سراب ..