الكوزنة سلوك

بسم الله الرحمن الرحيم

يوسف البروف
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يا سلام على برى الشريف وجناينها ورحلها وبحرها وناسها ذاتو كمان ياخى، ياخى برى دي انا قضيت فيها اجمل سنين العمر، ياخى عليك الله شوف النقلة دى ذاتها عاملة كيف، من قرية املس النشيوية الكردفانية ذات التلال الرملية والطبيعة الريفية وعلى طول الى برى الشريف الهندية ذات الطبيعة الحضرية، الاجمل موقع برى القريب من اى حتة ذاتو، ياخى برى دى حتى مقابرها قريبة من البيوت، ما شفت لى مقابر فى الدنيا دى أقرب من مقابر برى الشريف، خمسة دقايق وجبل التراب بفوق للمرحوم والفاتحة وينتهى العزاء بعودة البرش والعنقريب لبيت ناس المرحوم ، بالمناسبة نادرا ما تجد زول من برى يركب مواصلات، ياخي اقول ليكم حاجة برى والسجانة وجبرة ديل باصاتهن كانن لمن يقولن يتملن الواحد لو مشى برجلينو بكون وصل بيتهم، ولو البص اتحرك وانت كنت شاب مانع واخدت ليك جكة برضو عادي بتصل قبالو، لكن بعد دا كلو مرة اخدت لى منو وقعة، يا زول شفت ليك عيال المدينة ديل البص قبال ما يقيف كويس الواحد بتلب، اها يا زول مرة تلبت وانبرشت والتراب كال القدوم والنخرين والشلاليف، لكن استفدت من خبراتى القوازية من وقوع من التبلدى والهشاب والحمير ومطاردة الصبر والارانب اكلت ليك الوقعة على اللباد وقمت صوف وسط ذهول السواق وابتسامات بنات الدرايسة وابو حشيش الحلوات، اها كنت قاعد مع خالى ادم موسى، من حسن حظى، خالى دا عندو ولد اسم الحبر، اها الحبر دا قدري الخالق الناطق طول وعلا وشحم ولحم وكدارين ووجاهة، اها المقاس دا استفدت منو شديد خلاص، البنطلون فى غضب الله وبرضو كمان القميص والجزمة، عراريق وسراويل املس المكرفسات المسقيات المحسكنات ديلك والقجة شوفتي ليهن يومى الوصلت برى، اها يا زول طبعا الحبر دا مفتح شديد خلاص، ياخى كيف ما يكون مفتح، زول مولود فى برى الشريف معقول يطلع اللمبى، يا زول طبعا مبارى ليك الحبر دا حتة حتة، مقرن النيلين وسينما كلوزيوم وقاعة الصداقة وقصر الشباب والأطفال والبحر والرحل والحفلات والجوابات والهدايا والجرايد والروايات والمسلسلات والاستادات والهلال والمريخ والايسكريم والباسطة، يا زول بعد شوية كلامى ومشيتى واستايلى وشكلى كلهن اتغيرن وكلامى ذاتو بقا بالطريقة دى، فى راى الشخصى وعلى ما اعتقد ومن وجهة نظرى الشخصية والرؤية المستقبلية والحلول الصفرية والوردة الجهنمية والحب والشورت والحلاقة والريحة وبلير كريم وكده، اها يا زول الكلام دا كلو كوم والعصريات دى كوم تانى براهو، العصريات دى حصريا لكورة القدم، بصراحة كده كورة القدم دى انا بموت فيها موت عديل كده لكن بجليها واقفة، ياخى مرة كان الجامعة عندها اسبوع ثقافى فى بلدنا، ودبندا، لعبنا مباراة مع ناس ودبندا، اها انا كنت لاعب مع تيم الجامعة، الجمهور طالب باستبدالى من العشرة دقايق الأولى، طبعا الناس قالوا لاول مرة فى تاريخ كورة القدم جمهور يطالب باستبدال لاعب من الفريق الخصم، اها الحبر دا كان عكسى تماما، الحبر دا لعب في وادي النيل وتوتي وهلال الابيض، ، ياخى ناس برى ديل يعجبوك في الكفر، برى كلها صغار وكبار بتلاقوا فى ميدان الكورة عشان يمتعوا عيونهم وشعورهم بالدهشة.
اها يا زول في يوم من الايام الجمهور كبس ليك ليك الميدان دا كبسة الناس للسوق يوم القفة، تفاجأ الجمهور باسرة محددة قالت دايرة المباراة الليلة تكون اسرية خالصة، يعني لو ما كنت من الاسرة اياها دما ولحما ونسبا وجدا ما بدقها حتى لو كنت ميسى ذاتو، تفاجا الجمهور بالقرار الدخيل على الوسط الرياضى وعلى برى ذاتها كمان، كانت اسوا مبارة فى تاريخ برى العريق ، مباراة افتقدت اللمسات السحرية والمواهب الفطرية والابداعات والتابلوهات والتمريرات البينية َالعرضية وغير المرئية، فر الجمهور من مباراة الرفس والعفص والدفس كما يفر الزول النصيح من الزول العندو كورونا والكوز، انتهت المباراة قبل زمنها الاصلى واكتشف أصحاب الفكرة الاسرية عظمة خطلهم( عليكم الله خطلهم دى كيف؟) وسخفهم وتعلموا درس بليغ وهو ان الكورة موهبة فطرية وليست دماء وروابط اسرية وان الجمهور بيجذبوا الاداء الجَماعى المعجون بالابداع والمعطون بالامكانيات الكروية الساحرة.
الشعب السودانى سطر باحرف من نضال وتضحيات وارواح وشرف أعظم ثورة عبر التاريخ القديم والحديث بشهادة العالم اجمع ، وتشوق الى رؤية سودان مبنى على أسس العدل والمساواة والتسامح والمؤسسية، َوتفاءل اكتر بتكوين الحكومة المدنية برئاسة حمدوك الذى ابهر السودانيين والعالم فى اول مؤتمر ليهو فى المطار حيث أوضح ملامح حكومتو التي ذكر انها سوف تعتمد على الكفاءات الوطنية غير الحزبية ولا شئ غير ذلك، شكل حمدوك حكومتو، ولكن للاسف جاءت دون طموحات الشعب السودانى، حيث ظهرت الشلليات والاصحاب والاحزاب والأمراض بكل أشكالها والوانها َ، تعاهد الشعب السودانى على ان يدعم حكومتو التى اتى بها رغم ما بها من عيوب عسى أن تتدارك أخطائها بمرور الزمن، لكن للاسف وضح ومن خلال ما رشح من معلومات فيما يتعلق بتشكيل حكومات الولايات والولاة انو ام طيطى فى ام طيطاها، تم تقسيم الولاة على أحزاب قوى الحرية والتغيير ولا مكان للكفاءات الوطنية غير الحزبية بين الحلقة الضيقة التى فصلت كل المهام التفاوضية والتنفيذية ولجنة تفكيك النظام ولجنة الترشيحات ولجنة السلام واللجنة القانونية ولجنة الجاز والغاز والولاة والسكر والبامبرز وفير اند لفلى والدلكة والفركة كانو حواء لم تلد غيرهم.
اعلموا ايها السوبر ناس، والله الثورة لم تقدم مئات الشهداء والمفقودين والمكلومين والمغتصبين عشان تشيل كيزان مكنوا لأنفسهم باسم الدين والقبيلة والامر الالهى وتجيب سوبر ناس دايرين يمكنوا لانفسهم باسم الاحزاب والشلليات والاصحاب والدفعة والعبط.
نحن ضد تقسيم الولاة بهذه الطريقة المستفزة.